കാവലാന്‍

അഴീക്കോട് മാഷിന് അന്ത്യാഞ്ജലികള്‍.

2012-01-24T21:28:00.000+04:00

അഭികാമ്യമല്ലാത്ത രമ്യതപ്പെടലുകളുടെ,
വര്‍ത്തമാനകാലത്തിന്‍റെ രണഭൂമികയില്‍
വാഗ്ശരങ്ങളുതിര്‍ത്ത ഗാണ്ഢീവം നിശ്ചലം

കനലുകളാളുന്ന കരകളെ തണുപ്പിച്ച
അക്ഷരസാഗരത്തിന്‍ ഗര്‍ജ്ജനം നിശബ്ദം.

സമര മുഖങ്ങളിലെ മനുഷ്യര്‍ക്കിനി
അതിജാഗ്രതയുടെ അമിതഭാരം പേറണം
അവരുടെ ആചാര്യന്‍ വിട വാങ്ങിയിരിക്കുന്നു.

അഴീക്കോട് മാഷിന് അന്ത്യാഞ്ജലികള്‍.

ചിത്രം - നെറ്റില്‍ നിന്ന്

അദ്ധ്യാപകനെ ഇടിച്ചിട്ട കാര്‍

2011-10-12T19:34:00.001+04:00

വളരെ രഹസ്യമായി പോലീസ് തയാറാക്കിയ കാറിന്‍റെ ചിത്രം ഇപ്പോള്‍ ഒരു ചാനലില്‍ കാണിച്ചു കൊണ്ടിരിക്കുകയാണ്. ദേ താഴെ നോക്കിക്കേ

എല്ലാ അഴിമതിക്കാരും രാഷ്ട്രീയക്കാരല്ല എന്നാല്‍ അഴിമതിക്കാരെല്ലാം രാഷ്ട്രീയക്കാരാണ്.

2011-08-31T21:56:00.000+04:00

എല്ലാ അഴിമതിക്കാരും രാഷ്ട്രീയക്കാരല്ല എന്നാല്‍ അഴിമതിക്കാരെല്ലാം രാഷ്ട്രീയക്കാരാണ്.

64 വര്‍ഷത്തെ അഴിമതിപ്പണം

2011-08-20T22:46:00.000+04:00

ആയിരം അനന്തപദ്മനാഭഭണ്ഡാരങ്ങളിലെ സ്വത്ത്, 64വര്‍ഷത്തെ ഭാരതത്തിന്‍റെ അഴിമതിപ്പണത്തിനോളം വരുമോ?

മെയിലില്‍ കിട്ടിയത്

ഇന്ത്യന്‍ അത്ബുദം

2011-08-18T20:06:00.000+04:00

രാഷ്ട്രപതിയും പ്രധാനമന്ത്രിയുമൊക്കെ പറയുന്നു അഴിമതി ഇന്ത്യയെ ബാധിച്ചിരിക്കുന്ന 'അത്ബുതമാണ്'.അത് നിര്‍മ്മാര്‍ജ്ജനം ചെയ്യാന്‍ മാന്ത്രികവടിയൊന്നുമില്ല.അതിന്‍റെ നിര്‍മ്മാര്‍ജ്ജനത്തിന് നിരാഹാരസമരമോ അല്ലെങ്കില്‍സമരംതന്നെയോഒരു വഴിയല്ല. അതൊക്കെതീരുമാനിക്കേണ്ടത് പാര്‍ലമെന്‍റാണ്.

പരാതിയുള്ളവര്‍ പാര്‍ട്ടിയുണ്ടാക്കി പാര്‍ലമെന്‍റില്‍ ഭൂരിപക്ഷം നേടി ശരിയായ മാര്‍ഗ്ഗത്തില്‍ നിയമനിര്‍മ്മാണം നടത്തുകയാണ് വേണ്ടത് അല്ലാതെയുള്ള സമരരീതികളൊക്കെ ജനാധിപത്യത്തേയും പാര്‍ലമെന്‍ററി സിസ്റ്റത്തേയും അട്ടിമറിക്കുന്നതാണ് അത് അനുവദനീയമല്ല.അഴിമതിനിര്‍മ്മാര്‍ജ്ജനം ലക്ഷ്യമിട്ട് ഒരു കരട് പാര്‍ലമെന്‍റിന്‍റെ പരിഗണനയിലുണ്ട്.ജനങ്ങള്‍ക്കുവേണ്ടി ജനങ്ങള്‍ തെരഞ്ഞെടുക്കുന്ന ഭരണം പോലെ രാഷ്ട്രീയക്കാരനു വേണ്ടി രാഷ്ട്രീയക്കാരന്‍ തയാറാക്കുന്ന ലോകപാലന ബില്‍ എന്നവീക്ഷണമാണ് ശരി എന്നും നമ്മുടെ പ്രധാനമന്ത്രി കരുതുന്നു.അദ്ധേഹത്തിന്‍റെത് ശരിയായ വീക്ഷണമാണ് ബുദ്ധിജീവികളും രഷ്ട്രീയവാദികളും അത് ശരിവയ്ക്കുന്നുമുണ്ട്.എന്നാല്‍ സാദാരണക്കാരന്‍റെ ശരി എന്താണ്? അവന്‍റെ ശരിക്ക് ജനാധിപത്യ സമൂഹത്തില്‍ വല്ല മൂല്യവുമുണ്ടോ?അവന്‍റെ ശരിക്കുവേണ്ടി നിലകൊള്ളേണ്ട ബാധ്യത രാഷ്ട്രീയക്കാരനുണ്ടോ? രാഷ്ട്രീയക്കാരന്‍ ചെയ്യുന്ന ഓരോ സേവനത്തിനും ചെലവഴിക്കാന്‍ ഉപ്പിനും കര്‍പ്പൂരത്തിനും വരെ നികുതികൊടുക്കുന്ന സാദാരണക്കാരന്, അവന്‍റെ അവകാശങ്ങള്‍ക്കു വേണ്ടി സമാധാനപരമായി സമരം ചെയ്യാന്‍ ഒരവകാശവുമില്ലേ? ഇല്ല എന്നാണ് രാഷ്ട്രീയ വിചക്ഷണരും ബുദ്ധിജീവികളും പറയുന്നത്,പ്രത്യേകിച്ച് സൈബര്‍ ബുദ്ധിജീവികള്‍.

സമൂഹത്തിന്‍റെ എല്ലാതുറകളിലും ഇത്രയും ആഴത്തില്‍ സ്വാധീനിക്കത്തക്കം ഇത് വളര്‍ത്തിയെടുക്കുന്നതില്‍ ഓരോ ഭാരതീയനും നല്‍കിയിട്ടുള്ള നിസ്തുലമായ സംഭാവന മറ്റു രാജ്യങ്ങളിലെ ജനങ്ങള്‍ക്ക് ഒരു മാതൃകയാണ്.സത്യം പറയാമല്ലോ ഞാനും ഇക്കാര്യത്തില്‍ ഒരു തികഞ്ഞഭാരതീയനാണ്.നല്ലനടപ്പുകാലത്ത് ബന്ധുജനങ്ങളുടേയും പീടികക്കാരണവന്മാരുടേയും ഉപദേശശരശയ്യയില്‍ വിശ്രമിക്കുമ്പോഴാണ് വീട്ടില്‍ ആരെങ്കിലും പറയുക

"അല്ല, നിനക്കെന്താ ഒരു പാസ്പ്പോര്‍ട്ടിന് അപേക്ഷിച്ചാല്? ഹെയ് , വേണ്ടെങ്കി പോവണ്ടാ, ഒരു പാസ് പോര്‍ട്ടെടുത്ത് വച്ചാല്‍ വേറേം ഉപകാരങ്ങള് കാണ്വല്ലൊ."

പിന്നെ പാസ്പോര്‍ട്ടെടുത്തതു കൊണ്ടു മാത്രം ജീവിതം പച്ച തൊട്ടവരുടെ ധീര ചരിത്രങ്ങള്‍ മടക്കിക്കുത്തി എഴുന്നേല്‍ക്കും.അതില്‍ റബറുവെട്ടി നടന്ന ബക്കറിന്‍റെമുതല്‍ മീന്‍ വിറ്റ് ഉന്നതപഠനം നടത്തി ഗള്‍ഫില്‍ പോയ പീറ്ററിന്‍റെവരെ കഥകള്‍ ഉണ്ടായിരിക്കും.

അങ്ങനെ കാലുവെന്ത നായുടെ കാതില്‍ കടുകുവീണ അവസ്ഥയായപ്പോള്‍ സംഗതിയൊക്കെ ഒപ്പിച്ചെടുത്ത് ഒരു ട്രാവല്‍ ഏജന്‍സിയില്‍ ചെന്നു അപേക്ഷ പൂരിപ്പിച്ചു കൊടുത്തു. 'സംഗതി' അങ്ങനെയൊന്നും വരാത്ത കാലമായിരുന്നു അത്.പല്ലവിയും അനുപല്ലവിയും ചുറ്റിപ്പിണഞ്ഞ് ചരണത്തില്‍മുങ്ങി ചാവാന്‍ നടക്കുന്ന കാലം.സാധകം എത്രചെയ്താലും സംഗതി മാത്രം വരാത്ത ഒരുകാലം കടന്നുപോരാത്ത ആരെങ്കിലും ഉണ്ടായിരിക്കുമോ? സംശയമാണ്.കുറേ ദിവസം കഴിഞ്ഞ് ട്രാവല്‍ ഏജന്‍സിക്കാരന്‍ വിളിച്ചു പറഞ്ഞു.

"ദേ അടുത്തുതന്നെ പൊലീസ് വെരിഫിക്കേഷന്‍ ഉണ്ടാവും,അയല്‍ വീട്ടുകാരൊക്കെ എങ്ങനെ?"

"അവരൊക്കെ വളരെ നല്ലവരാ, അല്ല അയല്‍ക്കാരന്‍ മോശമായാല്‍ എനിക്ക് പാസ് പോര്‍ട്ട് കിട്ടില്ലേ?"

"അയല്‍ക്കാരന്‍ വല്ലതും പണിതാല്‍ പണി പാളും അതാ പറഞ്ഞത്, എന്തായാലും എല്ലാവരേം കണ്ട് ഒന്ന് പതപ്പിക്കുന്നത് നല്ലതാ."

അങ്ങനെ അയല്‍ വീട്ടിലൊക്കെ സംഗതി പറഞ്ഞു എല്ലാവരും കട്ടന്‍ ചായയും മിച്ചറും ഉപദേശവും വേണ്ടുവോളം തന്നു.ചിലരൊക്കെ ഗള്‍ഫു നാടുകളിലെ ക്യാമ്പുകളെക്കുറിച്ചും അറബികളുടെ ഒടുക്കത്തെ പീഢനത്തെപ്പറ്റിയുമൊക്കെ മുന്നറിയിപ്പു തന്നു.കമ്പനി വിസയാണെന്നു പറഞ്ഞ് കൊണ്ടുപോയി ആടിനേം ഒട്ടകത്തിനേയും മേക്കാന്‍ വിടുമത്രെ! സൂക്ഷിക്കണം പിന്നെ ഇവിടത്തെപ്പോലെ എടുത്തുചാട്ടമൊന്നും നടപ്പില്ല അവര്‍ എപ്പോഴും തലയില്‍ കെട്ടിനടക്കുന്നത് എന്താണെന്നറിയുമോ? ചാട്ടയാണ് ചാട്ട!!!

"ഓ അതൊക്കെ പിന്നെയല്ലേ ഇതിപ്പോ പാസ്പോര്‍ട്ടിന് അപേക്ഷിക്കുന്നു അത്ര്യെ ഉള്ളൂട്ടോ."

"ഹും ഇപ്ലത്തെ പിള്ളാര്ക്കൊന്നും ഒരു വീണ്ടുവിചാരോമില്ല വരാനുള്ളത് വഴീല്‍ തങ്ങില്ലല്ലോ ഒക്കെ ശ്രദ്ധിക്കുന്നതു നല്ലതാന്നാ പറഞ്ഞത് കുട്ട്യേ."

അങ്ങനെ ഉപദേശങ്ങളും നിര്‍ദ്ദേശങ്ങളുമൊക്കെ നീണ്ടു,ഒടുവില്‍ പോലീസ് വെരിഫിക്കേഷനു വന്നു പോയി എന്ന് ഒരു ദിവസം വൈകുന്നേരത്തു വീട്ടിലെത്തിയപ്പോള്‍ അറിഞ്ഞു.പിറ്റേന്ന് സ്റ്റേഷനിലേക്ക് ചെല്ലാന്‍ പറഞ്ഞിട്ടുണ്ടെന്ന് ട്രാവല്‍ ഏജന്‍സിക്കാരന്‍പറഞ്ഞു.ആദ്യമായിട്ടാണ് പോലീസ് സ്റ്റേഷനില്‍ പോവുന്നത്. അവിടെ കണ്ട ഒരു പോലീസുകാരനോടു ചോദിച്ചപ്പോള്‍ ഉള്ളില്‍ ചെന്ന് ഒരു ഓഫീസറെ കാണാന്‍ പറഞ്ഞു. ട്രാവല്‍ ഏജന്‍സിക്കാരന്‍ അയാള്‍ക്ക് മുന്നൂറു രൂപ കൊടുക്കാന്‍ പറഞ്ഞിട്ടുണ്ട് കാര്യങ്ങള്‍ സ്മൂത്തായിനടക്കാനാണത്രെ.പണ്ട് ഒരു കല്യാണത്തിനു പോയി ഊണുകഴിഞ്ഞ് കാശുവക്കാതെ ഊരിയ വൈഭവം ഓര്‍ത്തപ്പോള്‍ മുന്നൂറുരൂപയെക്കുറിച്ച് ഒരത്യാഗ്രഹം തോന്നി, എന്നാലും ഏതു നിമിഷവും എടുത്തുകൊടുക്കാന്‍ പാകത്തില്‍ ഒരു മജീഷ്യനെപ്പോലെ ഉള്ളംകയ്യില്‍ രൂപയുമായി ഞാന്‍ ചെന്നു.

"സര്‍,.....

"ഉം.... എന്താ?"

"പാസ്പോര്‍ട്ട് പോലീസ് വെരിഫിക്കേഷന് സാര്‍ ഇന്നലെ വീട്ടില്‍ വന്നപ്പോള്‍, ഇവിടെ വരാന്‍ പറഞ്ഞു എന്നു പറഞ്ഞു"

"ഓ... ഓ ....ശരി മനസിലായി എന്താ ഇപ്പോ ഏര്‍പ്പാട്?"

"പണിക്കു പോണു അവിടെ അടുത്തുതന്നെ ഒരു വര്‍ഷോപ്പില്‍"

"അലമ്പ് ഏടപാടുകള്‍ വല്ലതുമൊക്കെയുണ്ടോടെയ്?"

"ഹേയ് ഇല്ല സര്‍"

"ഉം ശരി അപ്പോ കാര്യങ്ങള് നടക്കട്ടെ അല്ലേ"

"അതെ സര്‍."

കൊള്ളാം നല്ല സാറാ ഈ തങ്കപ്പെട്ട മനുഷ്യനെയാണ്,... വെറുതെ തെറ്റിദ്ധരിച്ചു.നില്‍ക്കണോ അതോ പോണോ എന്ന് ഒരു സന്ദേഹത്തില്‍ വെള്ളംചവിട്ടുപോസില്‍ കുറച്ചുനേരം നിന്നു.ആ മുന്നൂറു രൂപയാണ് ഈ ആശയക്കുഴപ്പത്തിനു കാരണം, അതു കൊടുത്ത് അഭിമാനപൂര്‍വ്വം പോകാം.അല്ലെങ്കില്‍ ഒരു ശ്രമം നടത്താം കിട്ടിയാല്‍ ഒരു മുന്നൂറ്! ഒരാഴ്ചത്തെ ശമ്പളമാണ് ഒരു ഷര്‍ട്ടും പാന്‍റുമെടുക്കാനുള്ളകാശുണ്ട്.എന്നാല്‍ വെള്ളം ചവിട്ടിനും ഒരു പരിധിയൊക്കെയില്ലേ അവരെന്തു കരുത്തും? ഒടുവില്‍ രണ്ടും കല്പിച്ച് ചോദിച്ചു.

"അപ്പോ ന്നാ ...... ഞാന്‍ വരട്ടെ സര്‍"

"ഓ അപ്പൊ എന്നത്തേയ്ക്കാ യാത്രയൊക്കെ?"

തൊട്ടപ്പുറത്തിരിക്കുന്ന സാറാണ്, ഇവരൊക്കെ എന്തുമര്യാദക്കാരാണ് ഈ ട്രാവലേജന്‍സിക്കാരാണ് ഇവരെയൊക്കെ നശിപ്പിക്കുന്നത് എന്ന് ഞാന്‍ മനസ്സില്‍ കരുതി.

"അത് അതിപ്പോ പെട്ടന്നൊന്നുമില്ല സാര്‍ കുറച്ചു കഴിഞ്ഞിട്ട്...."

"അപ്പോ അതിന്‍റൊരു ചടങ്ങും ചെലവുമൊക്കെയില്ലേടോ?

ഇപ്പോള്‍ എനിക്കെന്തോ കാര്യമായി ഒരു കുളിര് ഓടി അങ്ങ് നെറുകവരെ,പെട്ടന്ന് വെള്ളം ശിരസ്സില്‍കയറിയതുപോലെ ഞാന്‍ ഒന്നു ചുമച്ചു,അവരുടെ മേശപ്പുറത്തുനിന്ന് അടിച്ചെടുത്ത എന്തോ എന്‍റെ കയ്യിലുള്ളതു പോലെ ഞാന്‍ ചൂളി എന്നാല്‍ അതു ഭംഗിയായി മറച്ച് ഞാന്‍ ചാടിവീണു പറഞ്ഞു

"ഓ പിന്നില്ലാതെ അതൊക്കെയുണ്ട് സര്‍ ദാ"

എന്നു പറഞ്ഞ് ഞാന്‍ ചുരുട്ടി വച്ചിരുന്ന മൂന്ന് നൂറിന്‍റെ നോട്ട് ആദ്യത്തെ പോലീസുകാരന് കൊടുത്തു.പെട്ടന്നു തന്നെ തടിയൂരി അവരുടെ ഉറക്കെയുള്ള കമന്‍റും ചിരിയും പിറകില്‍ കേള്‍ക്കാമായിരുന്നു അങ്ങനെ ഇക്കാര്യത്തിലെങ്കിലും ഒരു തികഞ്ഞ ഭാരതീയനാവാന്‍ എനിക്കു കഴിഞ്ഞു.

എന്നെപ്പോലെ അനേകം പേര്‍ ഇങ്ങനെയല്ലെങ്കില്‍ മറ്റൊരുവിധത്തില്‍ നല്‍കിയ പണം ലോകത്തെവിടെയൊക്കെയോ പോയിക്കിടക്കുന്നു.പോരാത്തതിന് ഇതിലേക്ക് കൂടുതല്‍ കനത്ത സംഭാവനകള്‍ നല്‍കിക്കൊണ്ട് 2G സ്പെക്ട്രം, കോമണ്‍ വെല്‍ത്ത്,ആദര്‍ശ് തുടങ്ങി സഹസ്രകോടികളുടെ പുതിയ 'അത്ബുധങ്ങള്‍' ഇന്ത്യയെ പുതിയൊരു ലോകാത്ബുധമാക്കിത്തീര്‍ക്കുകയാണ്.

ലോകരാഷ്ട്രങ്ങള്‍ ക്രൈസിസില്‍ മുങ്ങിച്ചാവാന്‍ പോകുന്നു ഇന്ത്യ അഴിമതിയുടെ 'അത്ബുധ' തടാകത്തില്‍ ഒരു ലക്ഷ്വറി ക്രൂയിസ് പോലെ പൊന്തിക്കിടക്കുന്നു.കരയില്‍ നിന്ന് അതിലെ സൗകര്യങ്ങളെയും സമൃദ്ധിയെയും പറ്റി വീമ്പടിച്ച് ഓരോ ഇന്ത്യക്കാരനും അഭിമാനിക്കുന്നു.ലോകം രണ്ടാം മാന്ദ്യത്തിലേക്കു പോയാലും നമ്മുടെ അടിത്തറ ഭദ്രമാണെന്ന് രാഷ്ട്രീയക്കാരന്‍ പറയുന്നു നാം അത് തലകുലുക്കി സമ്മതിക്കുന്നു.ഈ അടിത്തറ എവിടെകിടക്കുന്നു എന്ന് നാം ചോദിച്ചാല്‍ അതും ജനാധിപത്യവിരുദ്ധമാമുകുമോ?

'തൃപ്പടിദാന'വും 'പൊന്നുതമ്പുരാ'നും

2011-07-08T11:56:00.000+04:00

മലയിന്‍കീഴ് ഗോപാലകൃഷ്ണന്‍

മാതൃഭൂമി ഓണ്‍ലൈന്‍ എഡിഷന്‍

Posted on: 05 Jul

1750 (ചില രേഖകളില്‍1749) ജനവരിയിലാണ് മാര്‍ത്താണ്ഡവര്‍മ രാജ്യം ശ്രീപദ്മനാഭസ്വാമിക്ക് സമര്‍പ്പിക്കുന്ന 'തൃപ്പടിദാനം' എന്ന ചടങ്ങ് നടത്തിയത്. രാജാവ് ശ്രീപദ്മനാഭ സ്വാമി ക്ഷേത്രത്തില്‍ ഉടവാള്‍ സമര്‍പ്പിച്ചശേഷം തിരുവിതാംകൂര്‍ രാജ്യം ശ്രീപദ്മനാഭന് സമര്‍പ്പിക്കുന്നതായും അദ്ദേഹത്തിന്റെ ട്രസ്റ്റി അല്ലെങ്കില്‍ പ്രതിനിധി എന്ന നിലയില്‍ താനും തന്റെ അനന്തര രാജാക്കന്മാരും'ശ്രീപദ്മനാഭ ദാസന്‍'മാരായിരിക്കുമെന്നും പ്രഖ്യാപിച്ചു. ഇതോടെ തിരുവിതാംകൂര്‍ ശ്രീപദ്മനാഭന്‍ വകയും രാജാവ് അദ്ദേഹത്തിന്റെ പ്രതിനിധിയുമായി

തിരുവിതാംകൂര്‍ രാജ്യത്തെ തന്റെ കുലദൈവമായ ശ്രീപദ്മനാഭന് സമര്‍പ്പിക്കുകയും രാജാവ് അദ്ദേഹത്തിന്റെ ദാസനായി മാറുകയും ചെയ്ത നടപടി മാര്‍ത്താണ്ഡവര്‍മയുടെ തന്ത്രശാലിത്വത്തിന് നിദര്‍ശനമാണ്. ശ്രീപദ്മനാഭ സ്വാമി ക്ഷേത്രത്തെപ്പോലെ പ്രസിദ്ധമായിരുന്ന തിരുവട്ടാര്‍ ആദികേശക്ഷേത്രത്തില്‍വെച്ച് (ഇപ്പോള്‍ കന്യാകുമാരി ജില്ലയില്‍) തന്റെ വാള്‍ പൂജിച്ച് വാങ്ങിയശേഷമാണ് മാര്‍ത്താണ്ഡവര്‍മ ഡച്ചുകാരുമായിട്ടുള്ള യുദ്ധത്തിന് കുളച്ചലിലേക്ക് പുറപ്പെട്ടത്. അതിന് എത്രയോ മുമ്പ് തിരുവനന്തപുരത്തെ ശ്രീപദ്മനാഭസ്വാമിക്ഷേത്രം പുതുക്കിപ്പണിയണമെന്നും അവിടം തന്റെ പ്രധാന ആരാധനാലയമാക്കണമെന്നും മാര്‍ത്താണ്ഡവര്‍മ ഉറച്ചിരുന്നതായി രേഖകള്‍ വ്യക്തമാക്കുന്നു. അതിന് ഉദാഹരണമാണ് 1739 ല്‍ (കുളച്ചല്‍ യുദ്ധം നടക്കുന്നതിന് രണ്ടുവര്‍ഷംമുമ്പ്) അദ്ദേഹം കുരുമുളക് നല്കുന്നതിന് വിലയായി ഡച്ച് ഈസ്റ്റ് ഇന്ത്യാകമ്പനിയോട് 10,000 കഴഞ്ച് സ്വര്‍ണം ആവശ്യപ്പെട്ടത്. ഇത് ശ്രീപദ്മനാഭസ്വാമിക്ഷേത്രത്തില്‍ 'ഹിരണ്യഗര്‍ഭം' എന്ന ചടങ്ങ് നടത്താനായിരുന്നുവെന്ന് ഡച്ച് രേഖകള്‍ എഡിറ്റ്‌ചെയ്ത ഗാലറ്റി രേഖപ്പെടുത്തിയിട്ടുണ്ട്. വടക്കോട്ടുള്ള രാജ്യങ്ങള്‍ ഓരോന്നായി പിടിച്ചെടുത്ത് മാര്‍ത്താണ്ഡവര്‍മ പടയോട്ടം തുടരുന്നതിനിടയിലും ശ്രീപദ്മനാഭസ്വാമി ക്ഷേത്രം പുതുക്കിപ്പണിയാനും വിഗ്രഹം പുനര്‍നിര്‍മിക്കാനും നടപടി തുടര്‍ന്നുകൊണ്ടിരുന്നു. നേപ്പാളിലെ ഗണ്ഡകീനദിയില്‍ നിന്നും കൊണ്ടുവന്ന സാളഗ്രാമങ്ങള്‍ ഉപയോഗിച്ച് കടുശര്‍ക്കരയോഗം പ്രകാരം, ശില്പി ബാലാരണ്യകൊണിദേവനെക്കൊണ്ട് ശ്രീപദ്മനാഭന്റെ പതിനെട്ട് അടിനീളമുള്ള വിഗ്രഹം നിര്‍മിച്ചു. ഈ വിഗ്രഹം ഇന്നും ഭക്തജനങ്ങള്‍ക്ക് അദ്ഭുതമാണ്. മൂന്ന് വാതിലുകളിലൂടെ മാത്രമേ ഈ വിഗ്രഹം ദര്‍ശിക്കാനാവൂ. തിരുവനന്തപുരത്തെ തിരുമലയില്‍ നിന്നു കൂറ്റന്‍ പാറ വെട്ടിക്കൊണ്ടുവന്ന് ഒറ്റക്കല്‍ മണ്ഡപം പണിതു.

കൊടിമരത്തിനുള്ള തേക്കുമരം കൊണ്ടുവന്നത് കാക്കച്ചല്‍മലയില്‍ (ഇപ്പോള്‍ തമിഴ്‌നാട്ടില്‍) നിന്നാണ്. കരിങ്കല്ലുകൊണ്ട് ക്ഷേത്രത്തിലെ ശീവേലിപ്പുര നിര്‍മിക്കാന്‍ 4000 കല്‍പ്പണിക്കാരും 6,000 കൂലിക്കാരും നൂറ് ആനകളും ഉണ്ടായിരുന്നതായി രേഖകളില്‍ നിന്ന് തെളിയുന്നു.
ക്ഷേത്രത്തിന് ചുറ്റും കോട്ടകെട്ടാനും ഗോപുര നിര്‍മാണത്തിനും നടപടി സ്വീകരിച്ചു. 1750 (ചില രേഖകളില്‍1749) ജനവരിയിലാണ് മാര്‍ത്താണ്ഡവര്‍മ രാജ്യം ശ്രീപദ്മനാഭസ്വാമിക്ക് സമര്‍പ്പിക്കുന്ന 'തൃപ്പടിദാനം' എന്ന ചടങ്ങ് നടത്തിയത്. രാജാവ് ശ്രീപദ്മനാഭ സ്വാമി ക്ഷേത്രത്തില്‍ ഉടവാള്‍ സമര്‍പ്പിച്ചശേഷം തിരുവിതാംകൂര്‍ രാജ്യം ശ്രീപദ്മനാഭന് സമര്‍പ്പിക്കുന്നതായും അദ്ദേഹത്തിന്റെ ട്രസ്റ്റി അല്ലെങ്കില്‍ പ്രതിനിധി എന്ന നിലയില്‍ താനും തന്റെ അനന്തര രാജാക്കന്മാരും 'ശ്രീപദ്മനാഭ ദാസന്‍'മാരായിരിക്കുമെന്നും പ്രഖ്യാപിച്ചു. ഇതോടെ തിരുവിതാംകൂര്‍ ശ്രീപദ്മനാഭന്‍ വകയും രാജാവ് അദ്ദേഹത്തിന്റെ പ്രതിനിധിയുമായി. പിന്നീട് മാര്‍ത്താ ണ്ഡ വര്‍മമാരില്‍ അവസാനത്തെ ഭരണാധികാരി ശ്രീ ചിത്തിരതിരുനാള്‍ ബാലരാമവര്‍മ മഹാരാജാവ് വരെ ഭരണം നടത്തിയത് ശ്രീപദ്മനാഭനെ മുന്‍നിര്‍ത്തിയാണ്. സ്വാതന്ത്ര്യത്തിനുശേഷം തിരുവിതാംകൂറും കൊച്ചിയും ലയിപ്പിക്കാന്‍ തീരുമാനിച്ചപ്പോള്‍ ശ്രീ ചിത്തിരതിരുനാള്‍ ബാലരാമവര്‍മ മഹാരാജാവ് ആകെ നിസ്സഹായനായി. തന്റെ പൂര്‍വികനായ മാര്‍ത്താണ്ഡവര്‍മ, ശ്രീപദ്മനാഭന് സമര്‍പ്പിച്ച രാജ്യം താന്‍ എങ്ങനെയാണ് കൊച്ചിയുമായി ലയിപ്പിക്കുന്നതെന്നായിരുന്നു അദ്ദേഹത്തിന്റെ സന്ദേഹം. മഹാരാജാവിന് ശ്രീപദ്മനാഭനോടുള്ള ഭക്തിയും പൂര്‍വിക രാജാക്കന്മാരോടുള്ള പ്രതിപത്തിയും മനസ്സിലാക്കിയ ഇന്ത്യാസര്‍ക്കാര്‍ ഒരു നിര്‍ദേശം മുന്നോട്ടുവെച്ചു. ലയനത്തിനു വിളംബരം തയ്യാറാക്കാനും ചടങ്ങുകള്‍ നടക്കുന്നസമയത്ത് തിരുവിതാംകൂര്‍ ചീഫ് ജസ്റ്റിസിനെക്കൊണ്ട് വായിപ്പിക്കാനുമായിരുന്നു നിര്‍ദേശം. അത് മഹാരാജാവ് സ്വീകരിച്ചു.

ഹിരണ്യഗര്‍ഭവും കിരീടധാരണവും

ശ്രീപദ്മനാഭസ്വാമിക്ഷേത്രത്തില്‍ ഹിരണ്യഗര്‍ഭം തുലാപുരുഷദാനം, മുറജപം, ലക്ഷദീപം തുടങ്ങിയ നിരവധി ചടങ്ങുകള്‍ ഏര്‍പ്പെടുത്തി ഇന്ത്യ ഒട്ടാകെയുള്ള വിഷ്ണുഭക്തരെ ഇവിടേക്ക് വന്‍തോതില്‍ ആകര്‍ഷിച്ചതും മാര്‍ത്താണ്ഡവര്‍മയാണ് . ഇതില്‍ 'ഹിരണ്യ ഗര്‍ഭം' എന്ന ചടങ്ങ് കിരീടധാരണത്തോടനുബന്ധിച്ചാണ് നടത്തിയിരുന്നത്. തുലപുരുഷദാനം എന്നത് ഒരു ത്രാസിന്റെ ഒരറ്റം രാജാവും മറുഭാഗത്ത് അത്രയും തൂക്കം സ്വര്‍ണവും തൂക്കി അതു നാണയങ്ങളാക്കി ബ്രാഹ്മണര്‍ക്കും മറ്റു പുരോഹിതര്‍ക്കും സംഭാവന ചെയ്യുന്ന ചടങ്ങായിരുന്നു. ഈ നാണയങ്ങളുടെ ഒരു ഭാഗത്ത് 'ശ്രീപദ്മനാഭ' എന്ന് ആലേഖനം ചെയ്തിരുന്നു. 'ഹിരണ്യഗര്‍ഭം' എന്ന വാക്കിന് 'സ്വര്‍ണഗര്‍ഭം' എന്നാണര്‍ഥം. താമരയുടെ ആകൃതിയില്‍ പത്തടി ഉയരവും എട്ടടി ചുറ്റളവുമുള്ള അടപ്പുള്ള ഒരു സ്വര്‍ണപ്പാത്രം നിര്‍മിക്കുന്നു. ഇതില്‍ പാല്, വെള്ളം കലര്‍ത്തിയ നെയ്യ് തുടങ്ങിയ പഞ്ചഗവ്യങ്ങള്‍ പകുതി ഭാഗത്ത് നിറയ്ക്കും. ഇതിനുമുമ്പ് പുരോഹിതന്മാര്‍ വേദ വിധിപ്രകാരമുള്ള സ്‌തോത്രപാരായണം നടത്തും. പൂജാകര്‍മങ്ങള്‍ക്കുശേഷം രാജാവ് ഏണിയിലൂടെ പാത്രത്തിലിറങ്ങുന്നു. അപ്പോള്‍ പുരോഹിതന്മാര്‍ അതിന്റെ മുകള്‍ഭാഗം അടയ്ക്കുന്നു. പത്ത് മിനിറ്റിനുശേഷം മഹാരാജാവ് പാത്രത്തില്‍നിന്നു പുറത്തുവരും. അദ്ദേഹം നേരേ പുരോഹിതന്മാരുടെ അകമ്പടിയോടെ ശ്രീപദ്മനാഭന്റെ മുമ്പിലെത്തി സാഷ്ടാംഗപ്രണാമം നടത്തും. അപ്പോള്‍ പുരോഹിതന്മാര്‍ കുലശേഖരപെരുമാള്‍ കിരീടം മഹാരാജാവിന്റെ തലയില്‍ ചാര്‍ത്തുന്നു. ഇതോടെയാണ് മഹാരാജാവ് 'പൊന്നുതമ്പുരാന്‍' ആകുന്നത്. കിരീടധാരണദിവസം മാത്രമേ രാജാവ് കിരീടം വെക്കൂ. കാരണം രാജ്യം ശ്രീപദ്മനാഭനായതിനാല്‍ രാജാവ് കിരീടം വെക്കാറില്ല. ചടങ്ങുകള്‍ക്കുശേഷം സ്വര്‍ണപ്പാത്രം നാണയങ്ങളാക്കി പുരോഹിതന്മാര്‍ക്ക് നല്‍കുകയായിരുന്നു പതിവ്. വളരെയധികം പണച്ചെലവുള്ള ഹിരണ്യഗര്‍ഭം മാര്‍ത്താണ്ഡവര്‍മ മുതല്‍ ശ്രീമൂലം തിരുനാള്‍ വരെയുള്ള മഹാരാജാക്കന്മാര്‍ നിര്‍വഹിച്ചിട്ടുണ്ട്. എന്നാല്‍ പണച്ചെലവ് കണക്കിലെടുത്ത് ശ്രീചിത്തിര തിരുനാള്‍ ബാലരാമവര്‍മ ഈ ചടങ്ങ് ഉപേക്ഷിച്ചു.

ശ്രീ പദ്മനാഭസ്വാമി ക്ഷേത്രത്തില്‍ ഇപ്പോഴും തുടരുന്ന ചടങ്ങാണ് മുറജപവും ലക്ഷദീപവും. മുറജപത്തിന് മുറയ്ക്കുള്ള ജപം എന്നാണ് അര്‍ഥം. ആറ് വര്‍ഷത്തിലൊരിക്കലാണ് മുറജപം നടത്താറുള്ളത്. രാജഭരണകാലത്ത് ഇത് തിരുവിതാംകൂറിന്റെ സംസ്ഥാന ചടങ്ങായിരുന്നു. ഇന്ത്യയുടെ വിവിധ ഭാഗങ്ങളില്‍ നിന്നും ആയിരക്കണക്കിന് വൈദികര്‍ ഇതില്‍ പങ്കെടുക്കാന്‍ എത്തുമായിരുന്നു. മാര്‍ത്താണ്ഡവര്‍മയുടെ കാലത്ത് തുടങ്ങിയ ഈ ചടങ്ങിന് ലക്ഷക്കണക്കിന് തുക ചെലവാക്കുന്നത് പില്‍ക്കാലത്ത് ബ്രിട്ടീഷ് സര്‍ക്കാറിന് അലോസരം സൃഷ്ടിച്ചിട്ടുണ്ട്. കപ്പം നല്‍കാതെ, ലക്ഷങ്ങള്‍ ധൂര്‍ത്തടിക്കുന്നതായി അവര്‍ ഈ ചടങ്ങിനെ കണ്ടു. എന്നാല്‍ ഇതുസംബന്ധിച്ച് ഗവര്‍ണര്‍ ജനറല്‍ ഉള്‍പ്പെടെയുള്ളവര്‍ക്ക് നിവേദനം നല്‍കി പരമാവധി ചടങ്ങുകള്‍ വിജയിപ്പിക്കാന്‍ മഹാരാജാക്കന്മാര്‍ ശ്രമിച്ചിട്ടുണ്ട്. 56 ദിവസമാണ് മുറജപം നടക്കുന്നത്. എട്ട് ദിവസം കൊണ്ട് ഒരു മുറ എന്ന കണക്കിന് 56 ദിവസത്തില്‍ വേദം ഏഴു മുറജപിക്കും. വൈദികര്‍ മാത്രമല്ല, അന്യദേശങ്ങളിലെ രാജാക്കന്മാരും ചടങ്ങില്‍ പങ്കെടുക്കാന്‍ എത്തുമായിരുന്നു. മുറജപം സമാപിക്കുന്നത് ലക്ഷം വിളക്കുകള്‍ കത്തിച്ചായിരുന്നു.

ചടങ്ങുകള്‍

മാര്‍ത്താണ്ഡവര്‍മയുടെ കാലത്തുള്ള പല ചടങ്ങുകളും ഇന്നും ശ്രീപദ്മനാഭസ്വാമി ക്ഷേത്രത്തില്‍ തുടരുന്നു. അല്പശ്ശി, പൈങ്കുനി എന്നീ ഉത്സവങ്ങള്‍ അന്നും ഇന്നും പ്രധാനമാണ്. ഈ ഉത്സവത്തോടനുബന്ധിച്ച് ആറാട്ടുദിവസം ഉടവാള്‍ ഏന്തി നഗ്‌നപാദനായി മഹാരാജാവ് കടപ്പുറത്തേക്ക് എഴുന്നള്ളുന്ന ചടങ്ങ് ശ്രീ ചിത്തിരതിരുനാള്‍ മഹാരാജാവ് മരണം വരെ തുടര്‍ന്നു. ഇപ്പോള്‍ അദ്ദേഹത്തിന്റെ അനുജന്‍, ബ്രിട്ടീഷ് ഭരണകാലത്ത് ഇളയരാജാവ് ആയി അംഗീകരിച്ചിരുന്ന ഉത്രാടം തിരുനാള്‍ മാര്‍ത്താണ്ഡവര്‍മയാണ് ചടങ്ങുകള്‍ നടത്തുന്നത്. മഹാരാജാവ് പങ്കെടുക്കാറുണ്ടായിരുന്ന ശാസ്തമംഗലം എഴുന്നള്ളത്ത് ഇപ്പോള്‍ നിന്നുപോയി. എന്നാല്‍ തമിഴ്‌നാട്ടില്‍ നിന്നും നവരാത്രി വിഗ്രഹഘോഷയാത്രയും ശ്രീപദ്മനാഭ സ്വാമി ക്ഷേത്രത്തിനു മുമ്പില്‍ രാജാവ് അവയെ സ്വീകരിക്കുന്നതും പുതുവായ്പ് ചടങ്ങുമെല്ലാം ഇന്നും തുടരുന്നു. രാജകുടുംബത്തിലെ കാരണവരും ഇപ്പോഴത്തെ ശ്രീപദ്മനാഭ ദാസനുമായ ഉത്രാടം തിരുനാളും രാജകുടുംബാംഗങ്ങളും നിത്യവും ക്ഷേത്രത്തിലെത്തി ചടങ്ങുകളില്‍ പങ്കെടുക്കാറുണ്ട്.

നിധിശേഖരത്തിന്റെ വഴികള്‍

ക്ഷേത്രത്തില്‍ പതിന്നാലാം നൂറ്റാണ്ടുമുതല്‍ വന്‍ സ്വര്‍ണാഭരണങ്ങള്‍ ഉണ്ടായിരുന്നതായി രേഖകളില്‍ നിന്നു വ്യക്തമാണ്. കാലാകാലങ്ങളില്‍ പിഴയായും സംഭാവനയായും ധാരാളം ആഭരണങ്ങളും ആനകളും വസ്തുവകകളും ക്ഷേത്രത്തിന് കിട്ടിയിട്ടുണ്ട്. ഇതുകൂടാതെ മാര്‍ത്താണ്ഡവര്‍മ കൊച്ചിയുടെ അതിര്‍ത്തിവരെയുള്ള രാജ്യങ്ങള്‍ കീഴടക്കിയപ്പോള്‍ അവിടത്തെ സ്വത്തുക്കള്‍ അദ്ദേഹം ശ്രീപദ്മനാഭസ്വാമിക്കാണ് സമര്‍പ്പിച്ചത്. അന്ന് ഡച്ചുകാരും മറ്റ് യൂറോപ്യന്‍ രാജ്യങ്ങളുമായി കച്ചവടത്തിലേര്‍പ്പെട്ടിരുന്ന ചെമ്പകശ്ശേരി തുടങ്ങിയ രാജ്യങ്ങളില്‍ വന്‍ സമ്പത്ത് ഉണ്ടായിരുന്നു. കച്ചവടത്തിനുള്ള കരാര്‍ ഉണ്ടാക്കാനും മറ്റും വിദേശികള്‍ സ്വര്‍ണാഭരണങ്ങളും മറ്റും സംഭാവന ചെയ്തിട്ടുള്ളതും മാര്‍ത്താണ്ഡവര്‍മ ശ്രീപദ്മനാഭന് സമര്‍പ്പിച്ചിരിക്കാം.

മാര്‍ത്താണ്ഡവര്‍മയ്ക്കുശേഷം കാര്‍ത്തികതിരുനാള്‍ (ധര്‍മരാജാവ്) ഭരിക്കുന്ന സമയത്താണ് ടിപ്പുസുല്‍ത്താന്റെ ആക്രമണം മലബാറിലുണ്ടായത്. ടിപ്പു തിരുവിതാംകൂര്‍ ആക്രമണത്തിന് പുറപ്പെട്ടപ്പോള്‍, ധര്‍മരാജ മുന്‍കരുതല്‍ എന്ന നിലയില്‍ ട്രഷറിയില്‍ ഉണ്ടായിരുന്നവ ഉള്‍പ്പെടെയുള്ള വിലപിടിച്ച ആഭരണങ്ങളും മറ്റ് വസ്തുക്കളും ശ്രീപദ്മനാഭസ്വാമിക്ക് സമര്‍പ്പിച്ചിരിക്കാനും സാധ്യത ഉണ്ട്.

മറ്റൊരു അഭിപ്രായവും ഉയര്‍ന്നുവന്നിട്ടുണ്ട്. വേലുത്തമ്പിയുടെ കലാപത്തിനുശേഷം അധികാരത്തില്‍ വന്നത് ഗൗരീലക്ഷ്മീബായിയാണ്. കേണല്‍ മണ്‍റോ ആയിരുന്നു അന്നത്തെ റസിഡന്റ്. മണ്‍റോയ്ക്ക് ദിവാന്റെ അധികാരം കൂടി റാണി ഗൗരീലക്ഷ്മീബായ് നല്കി. അഴിമതിയും അരാജകത്വവും നിറഞ്ഞ ഭരണസംവിധാനം നേരെ ആക്കാന്‍ തന്ത്രശാലിയായ മണ്‍റോ പല നടപടികളും സ്വീകരിച്ചു. അതിലൊന്ന് ക്ഷേത്രപരിഷ്‌കരണമായിരുന്നു. ക്ഷേത്രങ്ങള്‍ക്ക് വന്‍ സ്വര്‍ണശേഖരവും സ്വത്തും ഉണ്ടെങ്കിലും പൂജാദികര്‍മങ്ങള്‍ നടക്കുന്നില്ലെന്ന് പരാതികിട്ടിക്കൊണ്ടിരുന്നു. ഇതിനുവേണ്ടി ആലോചിക്കാന്‍ ഒരു കമ്മിറ്റി രൂപവത്കരിച്ച് അവരുടെ അഭിപ്രായപ്രകാരം ക്ഷേത്രങ്ങള്‍ക്ക് ആവശ്യമായ തുക സര്‍ക്കാര്‍ നേരിട്ടു നല്‍കാന്‍ മണ്‍റോ തീരുമാനിച്ചു. പകരം അവിടത്തെ സ്വത്തുക്കളും മിച്ചംവരുന്ന സ്വര്‍ണാഭരണങ്ങളും സര്‍ക്കാര്‍ ഏറ്റെടുത്തു. ഈ ആഭരണങ്ങള്‍ വിറ്റ് ഇംഗ്ലീഷ് സര്‍ക്കാറിന് തിരുവിതാംകൂര്‍ നല്കാനുള്ള കപ്പത്തുക അടയ്ക്കുകയായിരുന്നു മണ്‍റോയുടെ ഉദ്ദേശ്യം. എന്നാല്‍ ഗൗരീലക്ഷ്മീബായി ഈ ആഭരണങ്ങള്‍ ശ്രീപദ്മനാഭന്റെ ഫണ്ടില്‍ നിന്നും വിലയ്ക്കുവാങ്ങി അവിടെ സമര്‍പ്പിച്ചുവെന്ന് പറയുന്നു. ഇതും ചരിത്രകാരന്മാര്‍ പരിശോധിച്ച് തീര്‍ച്ചപ്പെടുത്തേണ്ടകാര്യമാണ്. സംഗതി എന്തായാലും വലിയ പ്രതിസന്ധികള്‍ ഉണ്ടായിട്ടുപോലും ശ്രീപദ്മനാഭന്റെ നിധിശേഖരം തൊടാന്‍ ഒരു രാജാവും തയ്യാറായില്ലെന്നത് അവരുടെ ഭക്തിയുടെ മഹത്ത്വമാണെന്ന കാര്യത്തില്‍ സംശയം ഇല്ല.
___________________________________________________________________________________

Note: മാതൃഭൂമി ഓണ്‍ ലൈന്‍ എഡിഷനില്‍ നിന്നും പകര്‍ത്തിയത്.

അഴിമതിയെ വെറുക്കുന്നവര്‍ക്ക് മാത്രം

2011-06-09T23:40:00.000+04:00

വിദേശികള്‍ നൂറ്റാണ്ടുകളെടുത്ത് കടത്തിക്കൊണ്ടുപോയ സ്വത്തുക്കളെ കവച്ചുവയ്ക്കുന്ന വിധത്തില്‍ ഇന്ത്യയിലെ അഴിമതിക്കാരന്‍റെ കള്ളപ്പണം വിദേശബാങ്കുകളില്‍ വളരുന്നു.നമ്മുടെ വിയര്‍പ്പിന്‍റെ,ചോരയുടെ പങ്കുപറ്റി ജീവിക്കുന്ന രാഷ്ട്രീയത്തിലെ പരാദജീവികളെ പൊതുസമൂഹത്തില്‍ നിന്ന് നിര്‍മ്മാര്‍ജ്ജനം ചെയ്യേണ്ട സമയമാണ് സമാഗതമായിരിക്കുന്നു. അഴിമതിക്കെതിരെ അണിചേരാന്‍ ഉദ്ധേശിക്കുന്നവര്‍ അന്നാ ഹസാരെയോടൊപ്പം അണിചേരുക.

കാക്ക കരഞ്ഞാലും പോരെ നേരം വെളുക്കാന്‍?

2011-06-02T19:36:00.000+04:00

ബാബാ രാം ദേവ്, ഇന്ത്യക്കുപുറത്ത് അനധികൃതമായി സൂക്ഷിച്ചിരിക്കുന്ന കള്ളപ്പണം തിരികെ കൊണ്ടുവരാന്‍ കേന്ദ്ര സര്‍ക്കാറില്‍ സമ്മര്‍ദ്ധം ചെലുത്തിക്കൊണ്ട് ഇദ്ധേഹം ഒരു നിരാഹാര സത്യഗ്രഹ പരിപാടി ആസൂത്രണം ചെയ്തിരിക്കുന്നു.അഴിമതി നിര്‍മ്മാര്‍ജ്ജനത്തിനായി അന്നാഹസാരെയുടെ സമരം, ദരിദ്രജനവിഭാഗത്തിന്‍റെ നികുതിപ്പണം മോഷ്ടിച്ചു വിദേശബാങ്കുകളില്‍ പൂഴ്ത്തിവയ്ക്കുന്നതിനെതിരെ ബാബാ രാംദേവിന്‍റെ സമരം,ഒരു പക്ഷേ ഭാരതാംബയുടെ മക്കള്‍ ഉണരുകയായിരിക്കാം.സഹസ്രകോടികളുടെ അഴിമതിക്കഥകള്‍ വെറും വാര്‍ത്തകള്‍ മാത്രമായി കാണേണ്ടിവരുന്ന സാദാരണക്കാരന് അല്പമെങ്കിലും ആശ്വസിക്കാം.പാവപ്പെട്ടവന്‍റേയും പട്ടിണിക്കാരന്‍റേയും പാര്‍ട്ടിക്കും, ജാതിപ്പാര്‍ട്ടികള്‍ക്കും ഇപ്പോള്‍ സമരങ്ങള്‍ക്കോ സത്യഗ്രഹങ്ങള്‍ക്കോ കാരണമില്ലാതിരിക്കുകയാണ്.പണ്ടെങ്ങാണ്ട് നടന്നസമരങ്ങളുടെ അടുത്തൂണ്‍പറ്റിക്കഴിയുന്ന അവര്‍ക്ക് ഇപ്പോള്‍ നേതാക്കന്മാരുടെ അസാന്മാര്‍ഗ്ഗികതകളെക്കുറിച്ച് ചര്‍ച്ച ചെയ്യാനും അവര്‍ക്കുവേണ്ടി ജയ് വിളിക്കാനും മാത്രമേ സമയമുള്ളൂ. കാലിന്‍റെ ചോട്ടില്‍ നിന്ന് മണ്ണ് തുരന്നെടുത്ത് പോകുമ്പോഴും നേതാവിനും പാര്‍ട്ടിക്കും വേണ്ടി മുദ്രാവാക്യം മുഴക്കുന്ന ആരും അത് തുരന്നെടുക്കുന്ന തൊരപ്പന്മാരുടെ വര്‍ഗ്ഗത്തിനു വേണ്ടിയാണ് തങ്ങള്‍ തൊണ്ടപൊട്ടിക്കുന്നതെന്ന് മനസ്സിലാക്കാറില്ല.പൊതുപ്രവര്‍ത്തകരംഗത്തു നിന്നും ആത്മീയരംഗത്തുനിന്നും അഴിമതിരാഷ്ട്രീയത്തിനെതിരെ ശബ്ദമുയരുന്നത് അരാഷ്ട്രീയമാണെന്ന് വാദിക്കുന്നത് കാണുന്നുണ്ട്.അഴിമതിരാഷ്ട്രീയത്തിനെതിരെ സജീവരാഷ്ട്രീയത നിശബ്ദത പാലിക്കുമ്പോള്‍ മറ്റുമേഖലകളില്‍ നിന്ന് അതിനെതിരെ
പ്രതികരണമുയരുന്നത് സ്വാഭാവികമാണെന്ന് എനിക്കു തോന്നുന്നു.കോഴികള്‍ കൂവാനില്ലാത്ത കാലത്ത് കാക്കകരഞ്ഞാലും പോരെ നേരം വെളുക്കാന്‍? :) രാഷ്ട്രീയക്കാരുടെ പ്രതികരണം മാത്രം പ്രതികരണവും മറ്റെല്ലാം അരാഷ്ട്രീയതയുമാണെന്നും എനിക്ക് അഭിപ്രായമില്ല,മറിച്ച് എല്ലാമേഖലയില്‍ നിന്നും അഴിമതിരാഷ്ട്രീയത്തിനെതിരെ ശക്തമായ മുന്നേറ്റങ്ങള്‍ വരട്ടെ.രാഷ്ട്രീയത്തില്‍ ഒരു കാടുതെളിക്കലിന്‍റെ കാലം അതിക്രമിച്ചിരിക്കുന്നു.എന്നിട്ട് ബാക്കിയുള്ള രാഷ്ട്രീയവും രാഷ്ട്രീയക്കാരനും മതി ഇന്ത്യക്കാരന്.

സത്യസായി ബാബ- ദൈവികമായ ഒരു അത്ഭുത കഥ

2011-04-25T21:27:00.004+04:00

എ.പി.ജെ.അബ്ദുള്‍കലാം

നിസ്വാര്‍ത്ഥമായി പ്രവര്‍ത്തിക്കുകയും ഗ്രാമീണ ജനതയ്ക്ക് കുടിവെള്ളം, ദരിദ്രരായ ഗ്രാമീണര്‍ക്ക് സൗജന്യ ആരോഗ്യ പരിരക്ഷ, ഉന്നത വിദ്യാഭ്യാസം എന്നിവയൊക്കെ ലഭ്യമാക്കുകയും ചെയ്ത ഭഗവാന്‍ സത്യ സായി ബാബയെ ഞാന്‍ ബഹുമാനിക്കുന്നു.മനുഷ്യ വിഭവ വികാസത്തിന്‍റെ പ്രധാന ഘടകങ്ങള്‍ മല്യാധിഷ്ടിതമായ വിദ്യാഭ്യാസവും ഗുണ മേന്മയുള്ള ആരോഗ്യ രക്ഷയുമാണ്. അതിനു പുറമെ കുടിവെള്ളലഭ്യത പോലുള്ള അടിസ്ഥാന സൗകര്യങ്ങളും മനുഷ്യശേഷിയുടെ വികാസത്തിന് ഒഴിച്ചുകൂടാന്‍ പറ്റാത്തതാണ്.ഇക്കാര്യങ്ങള്‍ ലഭ്യമാക്കുവാന്‍ സര്‍ക്കാരുകള്‍ സജീവമായി പ്രവര്‍ത്തിച്ചു വരുന്നുണ്ട് എന്നത് ശരിയാണ്.ഇന്ത്യന്‍ ജനതയുടെ വിശേഷിച്ചും ആന്ധ്ര കര്‍ണാടക സംസ്ഥാനങ്ങളിലെ ജനങ്ങളുടെ ഈ ആവശ്യങ്ങളെക്കുറിച്ച് എന്നും ബോധവാനായിരുന്നു ഭഗവാന്‍ സ്വാമി സത്യസായിബാബ.ഈ ലക് ഷ്യത്തോടെ പ്രൈമറിതലം തൊട്ട് യൂണിവേഴ്സിറ്റി തലം വരെ കുട്ടികള്‍ക്ക് മൂല്യാധിഷ്ടിതമായ വിദ്യാഭ്യാസം ലഭ്യമാക്കുന്നതിന് അദ്ധേഹം സൗകര്യമൊരുക്കി.ഉള്‍നാടുകളില്‍ കോര്‍പ്പറേറ്റ് ആസ്പത്രികള്‍ ഇല്ലാതിരുന്ന ഒരുകാലത്ത് അദ്ധേഹം ഗ്രാമീണ മേഖലയില്‍ 1991 ല്‍ തന്നെ സൂപ്പര്‍ സ്പെഷ്യാലിറ്റി ആസ്പത്രി സ്ഥാപിച്ചു.ആന്ധ്രയിലെ അനന്ദപുര്‍ ജില്ലയിലെ ജനങ്ങള്‍ക്ക് ശുചിയുള്ള കുടിവെള്ളം ലഭ്യമാക്കുന്നതിന് പദ്ധതി തയാറാക്കുകയും ചെയ്തു.ഈ സ്ഥാപനങ്ങളുടെ തനതായ ഗുണ വിശേഷങ്ങള്‍ ചര്‍ച്ചചെയ്യപ്പെടേണ്ടതുണ്ട്.

ഒരു കുട്ടിയുടെ ബാല്യത്തിലെ ഏറ്റവും നല്ല കാലമെന്നു പറയുന്നത് അവന്‍/അവള്‍ സ്കൂളില്‍ ചെലവഴിക്കുന്ന കാലമാണ്.രാവിലെ എട്ടുമുതല്‍ വൈകീട്ട് നാലുവരെ സ്കൂളില്‍ ചെലവഴിക്കുന്ന സമയമാണ്ഏറ്റവും നല്ല സമയം.ഗ്രാമീണ ദരിദ്രരുടെ പ്രശ്നങ്ങള്‍ ബാബ മനസ്സിലാക്കിയിരുന്നു. സത്യസായി ട്രസ്റ്റ് സ്ഥാപിച്ച എല്ലാ സ്കൂളുകളിലേയും കോളേജുകളിലേയും വിദ്യാഭ്യാസം സൗജന്യമായിരിക്കണമെന്ന് അദ്ധേഹം നിശ്ചയിച്ചിരുന്നു. ഹൃദയം, മനസ്സ്, ശരീരം എന്നിങ്ങനെ എല്ലാറ്റിന്‍റെയും വികാസത്തില്‍ ഒരുപോലെ ശ്രദ്ധിച്ചിരുന്നു ഈ വിദ്യാഭ്യാസ സ്ഥാപനങ്ങള്‍.ശരീരം ആരോഗ്യ പൂര്‍ണ്ണമാക്കുന്നതിലും മനസ്സിനെ സൂക്ഷ്മമാക്കുന്നതിലും ഹൃദയത്തെ ശുദ്ധമാക്കി സൂക്ഷിക്കുന്നതിലും ഒരുപോലെ ഊന്നല്‍ നല്‍കുന്ന സംയോജിത വിദ്യാഭ്യാസ സമ്പ്രദായത്തിലൂടെയാണ് ഇത് സാധിച്ചത്.സ്ഥാപനത്തിന്‍റെ ചാന്‍സലര്‍ എന്ന നിലയില്‍ കുട്ടികളെ മാതൃകാ പൗരന്മാരായി വളര്‍ത്തിക്കൊണ്ടു വരുന്നതില്‍ അദ്ധേഹം ധാരാളം സമയം ചെലവിട്ട് ശ്രദ്ധ വച്ചിരുന്നു.
" വിദ്യാര്‍ത്ഥികള്‍ രാഷ്ട്രത്തിന്‍റെ അടിത്തറയാണ്. ഞാന്‍ വിലകല്പ്പിക്കുന്ന ഒരേയൊരു ധനവും അതുതന്നെ.വിദ്യാര്‍ത്ഥികളാണ് എന്‍റെ എല്ലാം. എന്‍റെ എല്ലാസ്വത്തുക്കളും അവരാണ്. ഞാന്‍ അവര്‍ക്കായി സ്വയം സമര്‍പ്പിച്ചിരിക്കുന്നു." എന്നാണ് ബാബ പറയുന്നത്. "വിദ്യാഭ്യാസത്തിന്‍റെ ലക്ഷ്യം സത് സ്വഭാവമാണ് അറിവിന്‍റെ ലക്ഷ്യം സ്നേഹവും" എന്നും അദ്ധേഹം പറഞ്ഞു. അക്കാദമിക് മികവിനോടൊപ്പം തന്നെ വിദ്യഭ്യാസത്തിന്‍റെ സുപ്രധാന ഘടകമായ സ്വഭാവരൂപവത്കരണത്തിന് സത്യ സായി ഇന്‍സ്റ്റിറ്റ്യൂട്ട് ഒഫ് ഹയര്‍ ലേണിംഗ് ഊന്നല്‍ നല്‍കുന്നതും അതുകൊണ്ടാണ്.സ്വഭാവത്തിലെ കുലീനത ഉടലെടുക്കുന്നത് എളിമ, ഹൃദയ വിശാലത, കാരുണ്യം, സഹായമനഃസ്ഥിതി, ധാര്‍മ്മീകമൂല്യങ്ങളോടുള്ള പ്രതിപത്തി എന്നിവയില്‍ നിന്നാണ്.വിദ്യാഭ്യാസം ജീവിതത്തിനു വേണ്ടിയാണ്, വെറുതെ ജീവിക്കുന്നതിനു വേണ്ടിയുള്ളതല്ല എന്ന തത്വമാണ് ഇന്‍സ്റ്റിറ്റ്യൂട്ടിന്‍റെ പാഠ്യപ്രവര്‍ത്തനങ്ങളേയും അനുബന്ധ പ്രവര്‍ത്തനങ്ങളേയും കോര്‍ത്തിണക്കുന്ന ഒരേയൊരു ചരട്.രാജ്യത്തെ പ്രധാന സ്ഥാപനങ്ങളും കമ്പനികളും സായി വിദ്യാര്‍ത്ഥികളെ സ്വീകരിക്കുന്നതില്‍ ഉത്സുകരാണെന്നതാണ് അനുഭവം.അങ്ങനെ സ്വീകരിക്കപ്പെടുന്ന വിദ്യാര്‍ത്ഥികള്‍ സ്ഥാപനത്തിന്‍റെ എല്ലാതരത്തിലുള്ള പ്രവര്‍ത്തനങ്ങളിലും തൊഴില്‍ മനോഭാവത്തില്‍ മാറ്റം കൊണ്ടു വരുന്നു എന്നും സംഘബോധം സംഭാവന ചെയ്യുന്നു എന്നും മൂല്യാധിഷ്ടിതമായ സമീപനം കൊണ്ടുവരുന്നു എന്നും വിലയിരുത്തപ്പെട്ടിട്ടുണ്ട്.
രായസലീമ പ്രദേശത്തെ ജനങ്ങള്‍ കുടിവെള്ളത്തിനായി കഷ്ടപ്പെടുന്നതിനെക്കുറിച്ച് ഉള്ളില്‍ തട്ടുന്ന ഒരു പരാമര്‍ശം 1994ല്‍ ബാബ നടത്തുകയുണ്ടായി. ഒരു നൂറ്റാണ്ടായി തുടരുന്ന ഈ പ്രശ്നം അടിയന്തര ശ്രദ്ധ അര്‍ഹിക്കുന്നു എന്ന് അദ്ധേഹം പറഞ്ഞു.1995ല്‍ അനന്തപുര്‍ ജില്ലയില്‍ കഴിയുന്നിടത്തോളം പേര്‍ക്ക് ഏറ്റവും ചുരുങ്ങിയ സമയത്തിനുള്ളില്‍ ബുദ്ധിമുട്ടോ ചെലവോ പരിഗണിക്കാതെ ശുദ്ധമായ കുടിവെള്ളം എത്തിക്കുന്നതിനുള്ള നടപടി സായിബാബ ട്രസ്റ്റ് ഏറ്റെടുത്തതോടെ അദ്ധേഹത്തിന്‍റെ സമുദായ സേവനം പുതിയ മാനം കൈവരിച്ചു.ഭൂഗര്‍ഭജലം ഇതിനുപയോഗപ്പെടുത്താന്‍ തീരുമാനിച്ചുവെങ്കിലും ഫ്ലൂറൈഡ് പ്രശ്നത്തെതുടര്‍ന്ന് ഇത് വേണ്ടെന്നു വച്ചു.മഴക്കാലത്ത് പ്രത്യേക സംഭരണികളില്‍ മഴവെള്ളം സൂക്ഷിച്ചു വയ്ക്കാനും നദിയിലെ വെള്ളം ഉപയോഗപ്പെടുത്താനും അങ്ങനെയാണ് തീരുമാനിച്ചത്.അനന്തപുര്‍ ജില്ലയിലെ വടക്കന്‍ പ്രദേശത്തായിരുന്നു മിക്ക ജല സ്രോതസ്സുകളും.തെക്കന്‍ ഭാഗം ഉയര്‍ന്ന് ചെരിവായിക്കിടക്കുന്നതാണ് ഭൂപ്രകൃതി.അതുകാരണം തെക്കന്‍ ഭാഗത്ത് വെള്ളമെത്തിക്കുന്നതിന് ധാരാളം പമ്പിംഗ് സ്റ്റേഷനുകള്‍ സ്ഥാപിക്കേണ്ടിവന്നു.ധാരാളം നിര്‍മ്മാണപ്രവൃത്തികള്‍ ഇതിനായി വേണ്ടി വരികയും ചെയ്തു.ഈ ബുദ്ധിമുട്ടുകളൊക്കെയുണ്ടായിട്ടും 18 മാസം കൊണ്ട് അനന്തപുര്‍ ജില്ലയില്‍ വെള്ളമെത്തിക്കാന്‍ കഴിഞ്ഞു.
ഒരു കൊല്ലം ഇത് പ്രവര്‍ത്തിപ്പിച്ച ശേഷം ആന്ധ്രയിലെ ജനങ്ങള്‍ക്കുള്ള സമ്മാനമായി ഈ ജലവിതരണ ശൃംഖല മുഴുവന്‍ ഗവണ്മെന്‍റിന് കൈമാറുകയും ചെയ്തു.750 ഗ്രാമങ്ങളിലെ 10 ലക്ഷത്തിലധികം വരുന്ന ജനങ്ങള്‍ക്ക് ഇതില്‍ നിന്ന് ഇപ്പോള്‍ വെള്ളം ലഭിക്കുന്നു.
എണ്‍പതുകളില്‍ നമ്മുടെ നഗരപ്രദേശങ്ങളില്‍ ധാരാളം കമ്പനികളുടെ സൂപ്പര്‍ സ്പെഷ്യാലിറ്റി ആസ്പത്രികള്‍ നിലവില്‍ വന്നു. എന്നാല്‍ വാണിജ്യ ലക്ഷ്യങ്ങള്‍കാരണം നഗര പ്രദേശങ്ങളിലെ ധനികര്‍ക്കു മാത്രമേ അതിന്‍റെ പ്രയോജനം ലഭിച്ചുള്ളൂ. ആരോഗ്യ സേവനത്തിന്‍റെ ലഭ്യതയുടെ കാര്യത്തില്‍ ധനികരും ദരിദ്രരും തമ്മിലും നഗരവാസികളും ഗ്രാമ വാസികളും തമ്മിലും വലിയ വിടവ് നിലവില്‍ വന്നിട്ടുണ്ടായിരുന്നു. ഇത് മനസ്സില്‍ കണ്ടുകൊണ്ട് പുട്ടപര്‍ത്തിയില്‍ ലോക നിലവാരത്തിലുള്ള ഒരാസ്പത്രി ഒരു വര്‍ഷത്തിനുള്ളില്‍ സ്ഥാപിക്കുമെന്നും അവിടെ വരുന്ന എല്ലാവര്‍ക്കും വിശേഷിച്ചും പാവപ്പെട്ടവര്‍ക്ക്, അവിടെ സൗജന്യ ചികിത്സ ലഭിക്കുമെന്നും 1991 നവംബര്‍ 23 ന് സ്വാമിജി പ്രഖ്യാപിച്ചു. ഈ ആസ്പത്രിയില്‍ ഇപ്പോള്‍ എത്രയോ മേജര്‍ ശസ്ത്രക്രിയകള്‍ നടത്തിക്കഴിഞ്ഞിരിക്കുന്നു. ആസ്പത്രിയുടെ നടത്തിപ്പിന് ജനറല്‍ ഡോക്ടര്‍മാരെ നിയോഗിക്കുമ്പോള്‍ ഇന്ത്യയിലും വിദേശത്തുമുള്ള പ്രശസ്തരായ ശസ്ത്രക്രിയാ വിദഗ്ധര്‍ ഇവിടെ ലീവെടുത്തു വന്ന് പ്രതിഫലമൊന്നും കൂടാതെ സേവനം നടത്തുന്നു. നഴ്സിംഗ് സേവനവും ഇതുപോലെത്തന്നെ. സുഖം പ്രാപിച്ചു വരുന്ന രോഗികള്‍ തന്നെ ശസ്ത്രക്രിയക്കെത്തുന്ന പുതിയ രോഗികള്‍ക്ക് സഹായം നല്‍കുന്നുണ്ടെന്നാണ് ഞാന്‍ മനസ്സിലാക്കുന്നത്.ആസ്പത്രി പരിസരം ശുചിയാണെന്നു മാത്രമല്ല , അവിടെ ശാന്തിയുടേയും സമാധാനത്തിന്‍റേയും ദൈവീകമായ അന്തരീക്ഷം നിലനില്‍ക്കുന്നതായും അനുഭവപ്പെടും.സേവന ബോധം ആസ്പത്രി പരിസരമാകെ പ്രസരിക്കുന്നതായി തോന്നും.
പുട്ടപര്‍ത്തിയിലെ സൂപ്പര്‍ സ്പെഷ്യാലിറ്റി ആസ്പത്രിയാകട്ടെ, അനന്തപുരില്‍ കുടിവെള്ളം കൊടുക്കുന്നതാകട്ടെ,കണ്ടലേരുവിലെ പ്രശ്നങ്ങള്‍ തീര്‍ത്ത് ചെന്നെയില്‍ കുടിവെള്ളമെത്തിക്കുന്നതാകട്ടെ എല്ലാ പദ്ധതികളും കൃത്യ സമയത്തിനുള്ളില്‍ നിശ്ചയിച്ച ലക്ഷ്യങ്ങള്‍ കൈവരിച്ചുകൊണ്ട് നിശ്ചയിച്ച കാലയളവിനുള്ളില്‍ നിന്നുകൊണ്ടു തന്നെയാണ് പൂര്‍ത്തിയാക്കപ്പെട്ടിട്ടുള്ളത്. ഇതെങ്ങനെ സാധിച്ചു? ഞാന്‍ അതേക്കുറിച്ച് ആലോചിക്കുകയായിരുന്നു. ഈ പദ്ധതികള്‍ സാമൂഹിക പ്രതിബദ്ധതയുള്ള മാനേജര്‍മാരേയും,കോണ്ട്രാക്ടര്‍മാരേയും ഉപ കോണ്ട്രാക്ടര്‍മാരേയും ഏല്പ്പിച്ചതാണ് ഇതിന്‍റെ പ്രധാന കാരണമെന്ന് മനസ്സിലാക്കാം. അവര്‍ സഹകരണത്തിന്‍റേയും സമര്‍പ്പണത്തിന്‍റേയും ത്യാഗത്തിന്‍റേയും ഭാവത്തോടെ ഈ പദ്ധതികള്‍ നടപ്പാക്കുകയാണുണ്ടായത്.സത്യം, ശരിയായ പ്രവര്‍ത്തി അക്രമരാഹിത്യം, സ്നേഹം, സമാധാനം എന്നീ അടിസ്ഥാന മാനുഷീക മൂല്യങ്ങള്‍, ചുമതല ഏല്പ്പിക്കപ്പെട്ട മുഖ്യന്‍മാര്‍ പിന്തുടര്‍ന്നു. അതുകൊണ്ടാണ് ഇവ സാധിച്ചത്.സാമൂഹിക പരിവര്‍ത്തനത്തിനുള്ള ദേശവ്യാപകമായ, നിസ്വാര്‍ത്ഥമായ ഒരു ദൗത്യത്തിന് ഇതിനേക്കാള്‍ മഹനീയമായ മാതൃക ചൂണ്ടിക്കാട്ടാനാവുമോ?

ഇന്നത്തെ മാതൃഭൂമിയില്‍ മുന്‍ രാഷ്ട്രപതി എ.പി.ജെ അബ്ദുല്‍ കലാമിന്‍റേതായി കൊടുത്തിരിക്കുന്ന ലേഖനം.

വി എസ്

2011-03-17T15:35:00.001+04:00

അച്യുതാനന്ദനില്ലാതെ കേരളത്തില്‍ നിന്ന് വിജയം കൊയ്യാനിറങ്ങുന്നവര്‍ക്ക് അതിനു കാച്ചിയ അരിവാള്‍ വല്ല കാടും പടലും വീശാന്‍ ഉപയോഗിക്കേണ്ടിവരും.വിജയന്‍റേം, ബാലകൃഷ്ണന്‍റേം വിഡ്ഢിത്തത്തിന്‍റെ തലമണ്ടയ്ക്ക് അടിക്കാനുള്ള ചുറ്റികയിരിക്കുന്നത് ഇടതനും വലതനുമല്ലാത്ത പൊതു ജനങ്ങളുടെ കയ്യിലാണ്.വി എസ് എന്ന വൈദ്യുതവേലിയെ മറികടക്കാന്‍ സാധ്യമല്ലാത്തതിനാലാണ് തെരഞ്ഞെടുപ്പില്‍ താന്‍ മത്സരിക്കുന്നില്ലെന്ന് വിജയന്‍ മുന്‍കൂര്‍ ജാമ്യമെടുത്തത് ഭീരു.

മഴുവാളികള്‍

2011-01-15T18:04:00.007+04:00

ഒരിടത്തൊരിടത്ത് ദൈവത്തിനൊരു സ്വന്തം നാടുണ്ട്,അവിടെ പച്ചയില്‍ വെള്ളിയതിരിട്ടപുടവചുറ്റി,പുലരികൊണ്ടുപൊട്ടുതൊട്ട് ദൈവമിരിപ്പുണ്ട്.
ഭൗതീകവും ആത്മീയവുമായ തിരകളടങ്ങാത്തൊരു സാഗരം ഉള്ളിലിരമ്പുന്നുണ്ടെങ്കില്‍ അവിടെ പോകാം.സമത്വ സുന്ദരമായ,സമ്പൂര്‍ണ്ണ
സാക്ഷരരായ ദൈവത്തിന്‍റെ സ്വന്തം മക്കള്‍ പൊന്നുപോലെ സൂക്ഷിക്കുന്ന നാട്. അവിടെയൊതുങ്ങാത്ത ലൗകീകതയില്ല,അലൗകീകതയില്ല.എല്ലാമടങ്ങി ഒരു സമ്പൂര്‍ണ്ണ കായകല്പം കഴിഞ്ഞ് പുതിയ മനുഷ്യനായി പുതിയൊരു ജന്മമെടുത്ത് തിരിച്ചു പോകാം.ചിത്രാംഗിതമായ ഈ വിളംബരം നമ്മുടെ നാടിനെക്കുറിച്ചു തന്നെയല്ലേ!? അതെ മനുഷ്യരെ കെണിവച്ച് കൊല്ലുന്ന മഴുവാളിയൊരുക്കുന്ന മരണക്കെണിയുടെ പുറമേ പൊതിഞ്ഞിട്ടുള്ള ആലങ്കാരികതകളാണ്ഇത്.

ടൂറിസമെന്നും,മദ്യമെന്നും, വിശ്വാസമെന്നും ഇരവച്ച് മഴുവാളികള്‍ കൊന്നൊടുക്കിയ നൂറുകണക്കിനാളുകളുടെ കബദ്ധങ്ങള്‍ നാടിനു ചുറ്റും നിന്ന് വേതാളനൃത്തംചെയ്യുന്നു.വിനോദിപ്പിക്കാനും,മദ്യപിപ്പിക്കാനുംവിശ്വാസത്തിനും
കേരളത്തിന് ഓരോ വകുപ്പും മന്ത്രിയും ഉത്തരവാദിത്തപ്പെട്ട ഉദ്യോഗസ്ഥരുമുണ്ട്. നിര്‍മ്മാണത്തില്‍ പിഴവുള്ള ഒരു യാത്രാവാഹനം ഉപയോഗ്യമാണെന്ന് സാക്ഷ്യപ്പെടുത്തിയതുകൊണ്ടാണ് ടൂറിസ്റ്റുകളായ അനവധി പേര്‍ തേക്കടിയില്‍ മുങ്ങിമരിച്ചത്.എക്സൈസ് വകുപ്പ് ഓഫീസിന്‍റെ സമീപ പ്രദേശത്താണ് വിഷക്കള്ള്കുടിച്ച് മനുഷ്യര്‍ പുഴുക്കളെപ്പോലെ വഴിയോരത്ത് വീണുമരിച്ചത്,മൂന്നുമാസംകൊണ്ട്ശതകോടികള്‍ വരുമാനമുള്ള ശബരിമല ക്ഷേത്രപരിസരത്താണ് മനുഷ്യര്‍ മൃഗീയമായി ചതഞ്ഞരഞ്ഞ് മരിച്ചത്.വ്യാഖ്യാനങ്ങളൊരുപാടുവരും പോകാന്‍ പാടില്ലാത്തിടത്ത് ജനം പോയി,ഓടാന്‍ പാടില്ലാത്തിടത്ത് ജനം ഓടി തുടങ്ങി അനവധി, എന്നാല്‍ ലക്ഷക്കണക്കിനാളുകള്‍തിങ്ങിനിറയുന്ന ഒരിടത്ത് എന്തുതരം അപകടത്തെ മുന്നില്‍ കണ്ടായിരുന്നു സര്‍ക്കാര്‍ സുരക്ഷാസംവിധാനംഒരുക്കിയിരുന്നത്? ചെയ്യുന്ന കൂലിക്ക് മാന്യമായ വേതനത്തിന് സമരം ചെയ്തിരുന്ന സഖാക്കന്മാര്‍ക്ക് സ്വന്തമായി പണിയെടുക്കാനോ പണിയെടുപ്പിക്കാനോ അറിയില്ല എന്നാണ് കഴിഞ്ഞ രണ്ടുവര്‍ഷക്കാലയളവിലെ നൂറുകണക്കിനു മൃതദേഹങ്ങള്‍ മലയാളിയോട് പറയുന്നത്.മഴുവാളിക്ക് മഴുവിന്റെ മനസും തൂമ്പയുടെ ബുദ്ധിയുമാണ്,ഒന്ന് മുറിക്കാനും മറ്റൊന്ന് കോരിക്കൂട്ടിയിടാനും മാത്രം.താഴെ കുറച്ച് പത്രക്കുറിപ്പുകള്‍ കൊടുക്കുന്നു

ശബരിമല ദുരന്തം: 104 മരണം 14-01-2011

വണ്ടിപ്പെരിയാര്‍ (ഇടുക്കി): ശബരിമലയില്‍ മകരജ്യോതിദര്ശദനംകഴിഞ്ഞ് പുല്ലുമേട്-വള്ളക്കടവ് കാനനപാതയിലൂടെ തീര്ഥാിടകര്‍ മടങ്ങുന്നതിനിടെ ഉണ്ടായ തിക്കിലും തിരക്കിലും പെട്ട് 102 പേര്‍ മരിച്ചു. ഇതില്‍ 40 പേരുടെ മൃതദേഹം തിരിച്ചറിഞ്ഞിട്ടുണ്ട്. 62 പേരുടെ മൃതദേഹം ഇനിയും തിരിച്ചറിയാനുണ്ട്.

വിഷക്കള്ള്: മരണം 24 Posted on: 08 സെപ് 2010

മൂന്ന് ഉദ്യോഗസ്ഥര്‍ക്കെതിരെ നടപടി

കോട്ടയ്ക്കല്‍: മലപ്പുറം ജില്ലയില്‍ വിഷക്കള്ള് കുടിച്ച് മരിച്ചവരുടെ എണ്ണം 24 ആയി ഉയര്‍ന്നു. മദ്യദുരന്തത്തെത്തുടര്‍ന്ന് ജില്ലയിലെ ഉയര്‍ന്ന രണ്ട് എകൈ്സസ് ഉദ്യോഗസ്ഥരെ സര്‍ക്കാര്‍ സസ്പെന്‍ഡ് ചെയ്തു. ഒരാളെ സ്ഥലംമാറ്റി. മലപ്പുറം എകൈ്സസ് ഡെപ്യൂട്ടി കമ്മീഷണര്‍ കെ.ആര്‍. ജയന്‍, കുറ്റിപ്പുറം അസിസ്റ്റന്‍റ് എക്സൈസ് കമ്മീഷണര്‍ മുഹമ്മദ് റഷീദ് എന്നിവരെയാണ് സസ്പെന്‍റ് ചെയ്തത്.

തേക്കടി ബോട്ടപകടം: മരണം 40 കവിഞ്ഞു 30th September 2009

തേക്കടി/തൊടുപുഴ: തേക്കടി ബോട്ടപകടത്തില്‍ മരിച്ചവരുടെ സംഖ്യ 40 ആയി. ഇന്ന് രാവിലെ എട്ട് മൃതദേഹങ്ങള്‍ കൂടി കണ്ടെത്തിയതോടെയാണിത്. മരിച്ചവരില്‍ മൂന്ന് മലയാളികളും ഉള്‍പ്പെടുന്നു. ഔദ്യോഗികമായി 38 മരണമാണ് സ്ഥിരീകരിക്കുന്നത്.

മഴുവാളികളുടെ മരണക്കെണികള്‍ ഇനിയുമുണ്ട് ദൈവത്തിന്‍റെ നാട്ടിലേക്ക് വണ്ടികാത്തു നില്‍ക്കുന്നവര്‍ സൂക്ഷിക്കുക.

ഇന്ത്യയുടെ മുഖത്ത് മുറിവേറ്റിട്ടുണ്ട്

2011-01-14T10:43:00.006+04:00

നമ്മുടെഭരണകര്‍ത്താക്കളും,ന്യായാധിപരും,ഉദ്യോഗസ്ഥരുംഎന്തുചെയ്യുന്നുവെന്ന്‍ ചിലരെങ്കിലും കാണുന്നുണ്ടെന്നത് ആശ്വാസം നല്‍കുന്നു.ഉന്നതനീതിപീഢങ്ങളിലെ ന്യായവിധികളില്‍ വിശ്വാസമര്‍പ്പിക്കുന്നവരെ അവര്‍ പൊതുജനമാണെന്ന കാരണത്താല്‍ എല്ലാക്കാലവും തെറ്റിദ്ധരിപ്പിക്കാം എന്ന ഉന്നതരുടെ ധാരണയ്ക്ക് പിഴവുപറ്റുന്നു എന്നാണ് പുതിയ വാര്‍ത്തകള്‍ നമ്മെ ബോധ്യപ്പെടുത്തുന്നത്.

കോമണ്‍ വെല്‍ത്ത് ഗയിംസ്,ആകാശ് ഫ്ലാറ്റ്, ടു.ജി സ്പെക്ട്രം !!!. നമുക്കൊരു ധാരണയുമില്ല നാം നികുതിയായികൊടുക്കുന്ന പണം പോകുന്ന വഴികളെക്കുറിച്ച്.വിലക്കയറ്റമെന്നുപറയുമ്പോള്‍ മുണ്ടുമുറുക്കിയുടുത്തും,
വികസനമെന്നു പറയുമ്പോള്‍ കിടപ്പാടം പോലുമൊഴിഞ്ഞു കൊടുത്തും നാം ഇന്ത്യക്കാരന്‍ എന്ന് അഭിമാനത്തോടെ പറയുന്നു.തിളങ്ങുന്ന മുഖം കണ്ട് ഇന്ത്യയെത്തേടി വരുന്നവരില്‍ നിന്ന് മുഷിഞ്ഞ ഉടല്‍ മറയ്ക്കേണ്ടി വരുമ്പോള്‍ വികസനത്തിന്‍റെ മതിലുകള്‍ക്കിപ്പുറത്തെ ഇരുണ്ട നിഴലിലേക്ക് അപകര്‍ഷതയോടെ പിന്‍വലിയുന്നു,ഇന്ത്യയെക്കുറിച്ചുള്ള ആയിരം വര്‍ണ്ണനകള്‍ കേട്ട് നിര്‍വൃതിയടയുന്നു.എന്നാല്‍ വര്‍ണ്ണിക്കുന്നത്ര വര്‍ണ്ണാഭമല്ല ഇന്ത്യ എന്ന് പറയുന്നത് ഇന്ത്യയുടെ ബ്യൂട്ടീഷന്‍മാരാവുമ്പോള്‍ നമുക്കത് ചെവിക്കൊള്ളാതിരിക്കാനാവില്ല.സൗന്ദര്യവര്‍ദ്ധകങ്ങള്‍കൊണ്ട് മറയ്ക്കാവുന്നതിലധികം ഇന്ത്യയുടെ മുഖത്ത് മുറിവേറ്റിട്ടുണ്ട് എന്നാണ് പുതിയ വാര്‍ത്തകള്‍ സൂചിപ്പിക്കുന്നത്.ഡോക്ടര്‍.ബിനായക് സെന്നിനെ പ്പോലുള്ള മനുഷ്യാവകാശപ്രവര്‍ത്തകര്‍ക്ക് രാജ്യദ്രോഹക്കുറ്റം വിധിച്ച് ജീവപര്യന്തം തടവും,കൊലപാതകക്കുറ്റത്തിന് വധശിക്ഷ വിധിക്കപ്പെട്ട ഷാജിയെപ്പോലുള്ള
ക്രിമിനലിന് ജാമ്യവും ലഭിക്കുമ്പോള്‍ അത്ഭുതം തോന്നുന്നില്ലെങ്കില്‍ നമ്മുടെ പ്രജ്ഞയ്ക്ക്എന്തോസംഭവിച്ചിട്ടുണ്ടെന്ന്കണക്കാക്കണം.അഴിമതിവേതാളങ്ങള്‍ക്ക് തൂങ്ങിക്കിടക്കാനുള്ള മുരിക്കുമരങ്ങളാവരുത് ഭരണസിംഹാസനങ്ങളും,ഉന്നത നീതിപീഢവും.

മാതൃഭൂമി പത്രത്തില്‍ വന്ന രണ്ട് വാര്‍ത്തകള്‍ ചുവടെ കൊടുക്കുന്നു.

പ്രശാന്ത് ഭൂഷണെതിരെ കോടതിയലക്ഷ്യ നടപടി (മാതൃഭൂമി വാര്‍ത്ത 13-01-2011)

Posted on: 14 Jan 2011

ഷാജിയുടെ ജാമ്യം റദ്ദാക്കാന്‍ അപേക്ഷ; അറിയിപ്പ് ലഭിച്ചില്ലെന്ന് സര്‍ക്കാര്‍

Posted on: 14 Jan 2011

ന്യൂഡല്‍ഹി: പ്രവീണ്‍ വധക്കേസിലെ ഒന്നാം പ്രതി മുന്‍ ഡിവൈ.എസ്.പി. ഷാജിക്ക് ജാമ്യം അനുവദിച്ച ഉത്തരവ് പിന്‍വലിക്കണമെന്നാവശ്യപ്പെട്ട് സംസ്ഥാന സര്‍ക്കാര്‍ സുപ്രീം കോടതിയില്‍ അപേക്ഷ നല്‍കി. ഇത് തിങ്കളാഴ്ച പരിഗണിക്കും. ജസ്റ്റിസുമാരായ പി. സദാശിവം, ബി.എസ്. ചൗഹാന്‍ എന്നിവരുടെ ബെഞ്ച് കഴിഞ്ഞ തിങ്കളാഴ്ച ചേംബറിലാണ് ഷാജിക്ക് ജാമ്യം നല്‍കിയത്.

ഹിന്ദു!?

2010-12-28T19:23:00.002+04:00

ഹിന്ദു ! ?.....

ഏ...... ഉം.

മുഖം ചുളിയുന്നു, അറിയാത്തഭാഷയിലെന്തോ പിറുപിറുക്കുന്നു, ധൃതിയില്‍ മുഖം മറയ്ക്കുന്നു, സ്വന്തം ഇരിപ്പിടത്തില്‍ ഇനി കസേരയുടെ കയ്യാണെന്ന് അറിഞ്ഞിട്ടും അറപ്പോടെ നിങ്ങിയിരിക്കാന്‍ ശ്രമിക്കുന്നു.എന്റെ ഇരിപ്പിടത്തില്‍ നിന്ന് ഞാനറിയാതെതന്നെ പോലീസ് സ്റ്റേഷനിലെ ഇരിപ്പു പൊസിഷനോളം എഴുന്നേറ്റു,അറിയാത്തമട്ടില്‍ സ്വയം പിറകിലൊന്നു തടവിനോക്കി വാലെങ്ങാനും! തലയിലും ഒന്നു തടവി നോക്കി കൊമ്പെങ്ങാനും! നാലഞ്ചു മണിക്കൂര്‍ വെയിലത്തു ക്യൂ നിന്നതല്ലേ മനുഷ്യന് പരിണമിക്കാനുള്ള ചരിത്രമുഹൂര്‍ത്തം എപ്പോഴാണെന്ന് ആരുകണ്ടു.പ്രപഞ്ചം എന്നത് ഒരു സ്പന്ദനമാണെന്നും വികാസാനന്തരം അത് ചുരുങ്ങും എന്നൊക്കെയും കേട്ടുകേള്‍വിയുണ്ട് പരിണാമാനന്തരം ജീവന്‍ അതിന്റെ ആദിമ നിലയിലേക്ക് മടങ്ങിപ്പോവുമെങ്കിലോ? പ്രപഞ്ചത്തിന് ഒരു ബിന്ദുവിലേക്കു ചുരുങ്ങാമെങ്കില്‍ ജീവനും അതേ ബിന്ദുവിലേക്കു ചുരുങ്ങാതെ വയ്യല്ലോ നെറ്റിയില്‍ കുറിയുള്ളവരും,കുരിശുള്ളവരും,തഴമ്പുള്ളവരും,ഒന്നുമില്ലാത്തവരും പലതരം ദൈവങ്ങളും അവരുടെ സ്വര്‍ഗ്ഗങ്ങളും നരകങ്ങളുമൊക്കെച്ചേര്‍ന്ന് ഒരൊറ്റ ബിന്ദു!. മുകളിലേക്ക് എറിഞ്ഞൊരു കല്ല് താഴേക്കു യാത്രതുടങ്ങുന്ന പോയിന്റിലെന്ന പോലെ പുരോഗമിച്ചുപോകുന്ന പരിണാമത്തിന്റെ പശ്ചാത്ഗമനത്തിന്റെ ആദ്യകണ്ണിയെങ്ങാനുമാവാന്‍ യോഗമുണ്ടെങ്കില്‍ വാലോ കൊമ്പോ കുളമ്പോ എന്താവും ആദ്യം രൂപ്പെടുക? ഏയ് സംശയാസ്പദമായി ഒന്നുമില്ല.അഥവാ എന്തെങ്കിലും രൂപപ്പെടുമെങ്കില്‍ ഒരു പ്രവാസി എന്നനിലയ്ക്ക് അത് ത്വക്കായിരിക്കുമെന്ന് എനിക്കുറപ്പുണ്ട് കണ്ടാമൃഗത്തിന്റെ തൊലി പോലെ കട്ടിയുള്ളത് പിന്നെന്തിന് തലയിലും മൂട്ടിലും തപ്പണം?

സിത് ദവുണ്‍...

ഉം.... (യെന്റമ്മേ...) ഒരു വിക്കല്‍ വന്ന് തൊണ്ടക്കുഴി ഞെക്കിപ്പിടിച്ചു.

സൈന്‍.....യെഹ്ര് ള്ള..... പിറുപിറുപ്പ്....

ഒപ്പിടുമ്പോള്‍ കൈ വിറയ്ക്കുന്നില്ലെന്നുറപ്പു വരുത്തി,ജനാധിപത്യത്തിന്റെ ആപ്പീസുകളിലും അവമതിക്കപ്പെടുന്നവരുടെ കൂട്ടത്തിലൊരുവനല്ലേ നീയും? നേതാവും, ന്യായാധിപനും,പുരോഹിതനും,മുതലാളിയും പിടിച്ചിരിക്കുന്ന അഴിമതിത്തുടലിന്റെ കൊളുത്തിലെ സാദാ ഇന്ത്യന്‍ നായ!.അഭിമാനം എന്ന് നീകരുതുന്നതുപോലെ മൊത്തം നിന്‍റെ കുത്തകയല്ല അതിനാല്‍ അടങ്ങ്, സ്വയം ആശ്വസിച്ചു. പകരം മറ്റൊരു പരിപാടിയുണ്ടെന്ന് ഒരു പാട്ടു കേള്‍ക്കാനുണ്ട് മതാധിഷ്ടിത ജനാധിപത്യമാണത്രെ അത്.അതായത് ദൈവീക നിര്‍ദ്ദേശപ്രകാരമുള്ള ജനാധിപത്യം."ജനാധിപത്യം എന്ന അയഞ്ഞ വസ്ത്രം എന്തായാലും നിങ്ങള്‍ ധരിച്ചിട്ടുണ്ട് എങ്കില്‍ പിന്നെ ഞങ്ങളുടെ ഈ പാമ്പിനെ അരയില്‍ ചുറ്റിക്കൊള്ളൂ,അവനവന്‍റെ വണ്ണത്തിനനുസരിച്ച് സ്വയം മുറുകുന്നതിനാല്‍ ഇത് വളരെ സൗകര്യപ്രദമാണ്". എന്നാണ് വളരെ സൗമ്യമായി ഇക്കൂട്ടര്‍ വാദിക്കുന്നത്.

ശൂ.....?

ഉ....ഉം...

ഖ്ഹലാശ്........ യെഹ്ര് ള്ള..........ഘോ.....

ഓ,..... താങ്ക്സ്.

ബാറിലെമെന്റല്‍ സംവിധാനത്തില്‍ ആശങ്ക

2010-12-13T18:14:00.007+04:00

ഹെഡിംഗുകണ്ട് തെറ്റിദ്ധരിച്ചു എന്നു പരാതിപ്പെടാന്‍ തുടങ്ങുന്നവര്‍ ഇന്ത്യന്‍ പാര്‍ലമെന്റ് സംവിധാനത്തിന്റെ സമീപകാല ദൃശ്യങ്ങള്‍ ഒരാവര്‍ത്തി കാണാന്‍ അപേക്ഷ.

ശങ്കയും,ആശങ്കയും,ആപത്ശങ്കയുമൊക്കെ ഒരു പരിധി വരെ നല്ലതു തന്നെ എന്നാല്‍ അങ്ങനെ ശങ്കാപങ്കിലമായ അവസ്ഥ തരണംചെയ്യാന്‍ ഒരു വിനോദയാത്രകൊണ്ട് കഴിയുമോ?പ്രത്യേകിച്ച് പുരയ്ക്കു തീപിടിക്കുന്നു എന്ന ഒരവസ്ഥയിലെങ്കിലും? ഇല്ലെങ്കിലും വേണ്ടില്ല യാത്ര ഒഴിവാക്കാനാവില്ല എന്നാണ് 'പ്രധാനപാര്‍ലമെന്‍റേറി'യന്‍ പറയുന്നത്. നാറി,പരനാറി,കഴുവേറി എന്നിങ്ങനെ 'റ' കാരാന്തമായ മലയാളിയുടെ പദസമ്പത്തുകളിലൊന്നും സ്ഥാനം കിട്ടാത്ത ഒരു പഥമാണ് 'പാര്‍ലമെന്‍റേറി'.കൂട്ടിക്കിഴിച്ചു നോക്കിയാല്‍ എല്ലാറ്റിന്റേയും അര്‍ത്ഥമൊക്കെ ഒന്നു തന്നെ.പ്രധാനപാര്‍ലമെന്‍റേറി ഉല്ലാസയാത്രയ്ക്കിട യിലായാലും പുരയ്ക്കു തീപിടിക്കുമ്പോള്‍ വായിക്കുന്ന രാഗം മേഘമല്‍ഹാരമായാല്‍ നല്ലത്,അല്ലെങ്കില്‍ വീണവായന കഴിഞ്ഞ് വരുമ്പോള്‍ പുര നിന്നിടത്തുണ്ടായേക്കാവുന്ന വെണ്ണീറു കുഴിയില്‍ പൂച്ചക്കാഷ്ടം കിടക്കുന്നതു കണ്ട് കഷ്ടം വ്യ്ക്കേണ്ടിവരും.വീണവായനക്കിടക്ക് പ്രധാനപാര്‍ലമെന്‍റേറിക്ക് ഒരുശങ്ക തോന്നുകയും അതിങ്ങനെ പത്രങ്ങള്‍ രേഖപ്പെടുത്തുകയും ചെയ്തിരിക്കുന്നു "പാര്‍ലമെന്‍ററി സംവിധാനത്തിന്റെ ഭാവിയില്‍ ആശങ്കയുണ്ടെന്ന് പ്രധാനമന്ത്രി" അടിയന്തിരാവസ്ഥയായിരിക്കും മെച്ചം.എന്തുകൊണ്ടാണ് ആശങ്ക എന്നതിരിക്കട്ടെ എന്താണ് ഈ പാര്‍ലമെന്‍ററി സംവിധാനം എന്നറിഞ്ഞാലല്ലേ അങ്ങെനെയൊരു സംവിധാനം വേണ്ടതാണോ വേണ്ടാത്തതാണോ എന്നറിയുകയുള്ളൂ.

പാര്‍ലമെന്‍ററി സംവിധാനം എന്നാല്‍ എന്ത്? ഒന്നരപ്പുറത്തില്‍ കവിയാതെ ഉപന്യസിക്കുക.

പാര്‍ലമെന്‍റേറിയന്മാരാല്‍ പാര്‍ലമെന്‍റേറിയന്മാര്‍ക്കുവേണ്ടി നിലകൊള്ളുന്ന നിലവിലുള്ള വ്യവസ്ഥിതിയെ പാര്‍ലമെന്‍ററി സംവിധാനം എന്നു പറയപ്പെടുന്നു.ഇതെങ്ങനെ വലിച്ചുനീട്ടി ഒന്നരപ്പുറം തികയ്ക്കും? ഏറിയാല്‍ ഇത്രകൂടി പറയാം. ഈ സംവിധാനം ഉരുത്തിരിയുന്നത് എങ്ങനെയാണെന്നുവച്ചാല്‍ പണക്കാരന്റെ പണമുപയോഗിച്ച് സാദാരണക്കാരന്റെ ഉന്നമനത്തിനെന്ന് പരസ്യം ചെയ്ത് അവരുടെ വോട്ടുവാങ്ങി പാര്‍ലമെന്‍റിലെത്തുന്നവരുടെ കൂട്ടായ്മയിലൂടെയാണ്.ധനികന്റെ ആശ്രിതനാവാനുള്ള അവകാശവും,സാദാരണക്കാരനെ ഭരിക്കാനുമുള്ള അധികാരവും അയ്യഞ്ചു വര്‍ഷത്തേക്ക് തീറുവാങ്ങി,അവരുടെ നികുതിപ്പണത്തില്‍ നിന്ന് ശമ്പളവും സര്‍വ്വാനുകൂല്യങ്ങളും പറ്റുകയും തോന്നിയ ശതമാനം വര്‍ദ്ധനവ് കാലാകാലങ്ങളില്‍ ഏകകണ്ഠമായി പാസ്സാക്കുകയും,പിന്നെയും പോരാതെ അതേ പണം മോഷ്ടിച്ച് പങ്കിട്ടെടുക്കുകയും അവരുടെ മടിശീലകളില്‍ കയ്യിടാന്‍ ധനികര്‍ക്ക് അധികാരം നല്‍കുന്നതില്‍ ഒരുമിച്ചു നില്‍ക്കുകയും കുറവു പങ്കുകിട്ടിയവന്‍ കെറുവിക്കുമ്പോള്‍ അവനെ പറഞ്ഞൊതുക്കി കൂടെ നിര്‍ത്തുന്നതില്‍ വിജയിക്കുകയും ചെയ്യുന്നതിലുമാണ് ഈ സംവിധാനത്തിന്‍റെ നിലനില്പ്പ്.ഇങ്ങനെ ഒരു പാര്‍ലമെന്‍റ് നിലനിന്നില്ലെങ്കില്‍ പ്രധാനന്‍ തലേക്കെട്ടും കെട്ടി വല്ല കടുകുപാടത്തിനും കണ്ണുപറ്റാതിരിക്കാന്‍ കയ്യും വിടര്‍ത്തി നില്‍ക്കേണ്ടിവരില്ലേ.

ഈയിടെയായി ചില അസ്വാരസ്യങ്ങള്‍ പാര്‍ലമെന്റില്‍ നിന്നും പുറത്തേക്കു കേട്ടു തുടങ്ങിയിട്ടുണ്ട്.അതുകൊണ്ടാവാം സാദാരണക്കാരന്‍ റിയാലിറ്റിഷോകള്‍ നിര്‍ത്തിവച്ച് പാര്‍ലമെന്റ് സമ്മേളനം കാണാനും തുടങ്ങി,ഐഡിയ സ്റ്റാര്‍ സിംഗര്‍ ഈ സീസണോടു കൂടി നിര്‍ത്തിയേക്കും എന്നൊക്കെയാണ് ശ്രുതി. അപ്പോഴും കാണിക്ക് ഒരു വിഷമം മാത്രം അവസാനം ആര്‍ക്ക് എസ് എം എസ് അയക്കണം!? ആര്‍ക്കെങ്കിലുംഒരെസ്സെമ്മെസ്സയക്കാതെഒരു ദിവസം പൂര്‍ത്തിയാക്കുന്നതെങ്ങനെ? കോമണ്‍വെല്‍ത്ത്കുംഭകോണം,സ്പെക്ട്രംകുംഭകോണം, ഫ്ലാറ്റ്കുംഭകോണം, ഭക്ഷ്യധാന്യക്കുംഭകോണം എന്നിങ്ങനെ കേള്‍ക്കുമ്പോള്‍ അവര്‍ ഏറ്റവും വലിയ കുംഭകോണക്കാരന് എസ് എം എസ് അയക്കാമെന്നു കരുതും അപ്പോഴേക്കും കുളിച്ചില്ലെങ്കിലും കോണം പുരപ്പൊറത്തുണ്ട് എന്ന ചൊല്ലിനെ അനുസ്മരിപ്പിച്ച് പത്താള്‍ക്കുടുക്കാനുള്ള കോണവും തലേക്കെട്ടി ഇപ്പൊക്കരയും എന്നഭാവത്തില്‍ പ്ര.പാര്‍ലമെന്‍റേറി സ്ക്രീനിലെത്തും,പാവം പ്രേക്ഷകന്റെ വിഷമം ആരു കാണാന്‍!.പോകെപ്പോകെ ജഡ്ജസ് പോലും പാര്‍ലമെന്‍റേറിയന്‍ ആശയത്തിന് എതിരാണോ എന്ന് ഒരു പാര്‍ലമെന്‍റേറിയന്‍ സംശയിക്കാനിടയുണ്ട്,കാരണം പാമോയില്‍ കേസിലൂടെപാര്‍ലമെന്റേറിയന്‍മാര്‍ക്കും പൊതു ജനത്തിനും വേണ്ടത്ര സംതൃപ്തി നല്‍കുന്ന പ്രകടനം കാഴ്ച്ച വച്ച മഹാനെ സ്പെക്രം കേസുകൂടി ഒന്നന്വേഷിച്ച് ഒരരുക്കാക്കിത്തരാന്‍ നിയോഗിച്ചതായിരുന്നു,എന്നിട്ടോ? കേറി എടപെട്ടളഞ്ഞില്ലേ കോടതി!

പണ്ട് ലാലു ഭയ്യാമാരോട് ചോദിച്ചത്രേ അരേ ഭയ്യാ......ബെന്‍സും,ബി എം ഡബ്ല്യുവും എന്തിന് ഒരമ്പാസിഡറ് കാറു പോലുമില്ലാത്ത നിങ്ങള്‍ക്കെന്തിനാ ടാര്‍ ചെയ്ത റോഡ്? കളവണ്ടികള്‍ക്കു പോകാന്‍ കല്ലുവഴി തന്നെ ധാരാളമല്ലേ? എല്ലാവരും ഒരുമിച്ച് അതേ എന്ന അര്‍ത്ഥത്തില്‍ തലകുലുക്കിയെന്ന്,ആ കുലുക്കല്‍ തന്നെ കുലുക്കിത്താഴെയിടാനായിരുന്നു എന്ന് ലാലുവിന് ഈയിടെ മനസിലായിട്ടേയുള്ളൂ എന്നാണ് കേട്ടു കേള്‍വി.അല്ലെങ്കിലിപ്പൊ ഈ സ്പെക്ട്രം കൊണ്ട് ഇന്ത്യക്കാരന്‍ എന്തോകാട്ടാനാ പുഴുങ്ങിത്തിന്നാനൊക്കുമോ? ആര്‍ക്കും വേണ്ടാതെ കിടക്കുന്ന ലേശം സ്പെക്ട്രമെടുത്ത് നുമ്മടെ മുണ്ടന്‍രാജ അത്യാവശ്യക്കാരന് കൊടുത്തു,കാരണവര്‍ അതിന്റെ കണക്കു ചോദിച്ചപ്പോള്‍ കണക്കു പുസ്തകത്തില്‍ അരിച്ചും ഗുണിച്ചും ഒരിത്തിരി നേരം വൈകിയതിന് സിംഗെന്തു പിഴച്ചു? ഒരു തലേക്കെട്ടു കെട്ടാന്‍ തന്നെ ദിവസം നേരമെത്രവേണമെന്ന് ഇവര്‍ക്കൊക്കെ വല്ല വിചാരവുമുണ്ടോ? പ്രധാനപാര്‍ലമെന്‍റേറിയനായിപ്പോയി എന്ന ഒറ്റ കാരണം കൊണ്ട് ഇങ്ങനെ ക്രൂശിക്കരുത്.പ്രതിപക്ഷത്തിന്റെ ഇല്ലം ചുടലിനിടയ്ക്കാണ് കോടതി മണ്ണെണ്ണ തെളിക്കുന്നതെന്നോര്‍ക്കണം,അല്ലെങ്കില്‍ തന്നെ പ്രതിപക്ഷത്തിനിതിലെന്തു കാര്യം എന്നു മനസിലാകുന്നില്ല രാമനോ,കൃഷ്ണനോ,ശിവനോ,എന്തിന് ഒരു ജഡായു പോലും പോക്കുവരവുള്ള വഴിയൊന്നുമല്ലല്ലോ മുണ്ടന്‍രാജ പതിച്ച് നല്‍കിയത് ഇത്ര കഠോരമായി പ്രതിഷേധിക്കാന്‍ ? ഇതിങ്ങനെ പോയാല്‍ ഒരു പാര്‍ലമെന്‍റേറിയന് ഇന്ത്യയില്‍ എന്തു വില? സംഗതി ഇങ്ങനെയൊക്കെ ആയസ്ഥിതിക്ക് മനസുമടുത്ത് കിട്ടിയ വണ്ടിക്ക് നമ്മുടെ പ്രധാനപാര്‍ലമെന്റേറി തലേക്കെട്ടും തലവിധിയും താങ്ങി ജര്‍മ്മനിയിലേക്ക് തീര്‍ത്ഥയാത്ര പോയിരിക്കുകയാണ്.

അവിടത്തെ ഏതോ പബ്ലിക് ടോയ്ലറ്റില്‍ കക്ഷി സ്വന്തം പാര്‍ലമെന്ററി സംവിധാനാശങ്ക തീര്‍ത്തുവത്രേ.കാര്യം സാധിച്ചാല്‍ പിന്നെ മിണ്ടാതെ എഴുന്നേറ്റുപോയാപ്പോരെ അവിടെയിരുന്ന് കഴുതരാഗം പാടി ആളുകളെ അറിയിക്കണോ എന്ന അര്‍ത്ഥത്തില്‍ അവരു ചോദിച്ചു അല്ലണ്ണാ ,അവിടെയൊക്കെ ധാരാളം വെളിമ്പറമ്പുകളുള്ളപ്പോള്‍ ഇവിടെത്തന്നെ വന്ന് കാര്യം സാധിക്കണോ അതും ഈ കോളറാകാലത്ത്? ചോദ്യത്തിന്റെ സാരം മനസിലാവാതെയാവണം പഞ്ചപാവം പച്ചവെള്ളം പോലും ചവച്ചരച്ച് കുടിക്കുന്ന പ്ര.പാര്‍ലമെന്‍റേറി പറഞ്ഞു.
ഓ... ഇതൊക്കെ നേരത്തേകൂട്ടി പ്ലാന്‍ ചെയ്തതല്ലേ അല്ലെങ്കില്‍ തന്നെ പ്ലാനിംഗിന്റെ കാര്യത്തില്‍ ഞാനാരാമോന്‍! വെറുതെയാണോ കോണം തലേക്കെട്ടിയിരിക്കുന്നത് തല കാറ്റുകൊള്ളാതിരിക്കാനല്ലേ.

സംഗതികളുടെ കിടപ്പുവശത്തില്‍ പാര്‍ലമെന്ററി മക്കള്‍ അല്പം അങ്കലാപ്പിലാണെന്നു തോന്നുന്നു പെട്രോള്‍ പമ്പിനു തീപിടിച്ചാല്‍ സ്മോക് ബോംബ് (ഓ യെന്തരോ പൊകയുണ്ടാക്കുകയും ഓക്സിജന്‍ കുറയ്ക്കുകയും ചെയ്യുന്ന ലതുതന്നെ) പൊട്ടിക്കുന്നതു പോലെ ഇടയ്ക്ക് മുംബൈ ബോംബെടുത്ത് പൊട്ടിച്ചു നോക്കുന്നുണ്ട്.കാര്‍ക്കരെയ്ക്ക് വധഭീഷണിയുണ്ടായിരുന്നെന്നും കാര്‍ക്കരയെ കൊല്ലാന്‍വേണ്ടിമാത്രം മറ്റേപാര്‍ട്ടിക്കാര്‍ 'ലൗഷ്കര്‍ തോയിബ'ക്ക് കൊട്ടേഷന്‍ കൊടുത്ത് ഒപ്പിച്ചതായിരുന്നു മുംബൈ ആക്രമണം എന്നും ദേ ഇപ്പോ തോന്നിയതാണത്രേ ഉച്ചയ്ക്ക് പ്രസ്സില്‍ ഇരിക്കുമ്പോള്‍.സത്യത്തില്‍ പാക്കിസ്താന്‍ കാര്‍ അങ്ങനെ തലങ്ങും വിലങ്ങും വെടിവയ്ക്കുകകൂടിയില്ലായിരുന്നു അവര്‍ക്ക് സ്നേഹിക്കാനേ അറിയൂ അല്ലെങ്കില്‍ നോക്കൂ നമ്മുടെ ഇന്ത്യയിലെ ഏതെങ്കിലും സംഘടനയ്ക്ക് 'ലൗ' വില്‍ തുടങ്ങുന്ന പേരുണ്ടോ?

ദേ... ഇന്ന് അമ്മച്ചിയുടെ വെളിപാടുണ്ട് കേട്ടോ,സംഗതി അപ്പച്ചന്‍ അറിയാന്‍ മാത്രം ഗൗരവമില്ല അമ്മാവന്മാര്‍ക്ക് കൈകാര്യം ചെയ്യാവുന്നതേയുള്ളൂ. മക്കളില്‍ ഒരു മുണ്ടന്‍ തന്തപ്പിടിയറിയാതെ കുടുംബത്തിന്റെ അടിയാധാരം കീറി കപ്പലണ്ടി പൊതിയാന്‍ കൊടുത്തു എന്നുള്ളതൊക്കെ നേര് എന്നു വച്ച് നമ്മളു കൊറിച്ച മണിയുടെ കൂറ് നമ്മള്‍ കാണിക്കേണ്ടെ എന്നാണ് അമ്മച്ചി പറഞ്ഞതത്രെ.

തള്ളമയില് ഒന്നാടുമ്പോ പിള്ളമയില് രണ്ടാടും എന്നാണല്ലോ മണിക്കവി പാടിയിരിക്കുന്നത്,പാട്ടൊന്നിനും ഇപ്പോള്‍ പണ്ടത്തെപോലെ പകിട്ടില്ലെന്ന് അമേരിക്കയില്‍ നിന്നാണ് മണിക്കവിയെക്കുറിച്ച് പരാതി! മഹാകവിയൊ ന്നുമല്ലല്ലോ വെറും മണിക്കവിയല്ലേ എന്ന് ആശ്വസിക്കാവുന്നതിനേക്കാള്‍ ഗുരുതരമാണ് കാര്യം. അമേരിക്കന്‍ നൊസ്റ്റാള്‍ജിയയുടെ എന്തോ ഒന്ന് മാറി പ്പോയി എന്നാണ് കവി പറയുന്നത് അതുകൊണ്ടാണത്രേ പരിപാടിക്കിടയില്‍ ഇടവേളയെടുത്തതിനും മറ്റും പരാതി വന്നിരിക്കുന്നത്.അല്ലെങ്കിലും 'പണിയന് വരമ്പത്താണ് വിശ്രമം' എന്ന് മണി മറന്നിരിക്കും .അതവിടെ നില്‍ക്കട്ടെ കവിവാക്യത്തിലെ മയിലുകളെ പ്രതി പറയുകയാണെങ്കില്‍ നമ്മളും ഒട്ടും മോശമാക്കില്ല എന്ന് കേരളത്തിലെ 'ദളിത സഖാക്കള്‍' ഉറപ്പിച്ചിരിക്കുക യാണ്,എന്നു വച്ച് മുതലാളിത്തത്തിന്റെ പിമ്പു പണിക്ക് നമ്മളെ കിട്ടില്ല കേട്ടോ നമ്മള്‍ സമത്വ സുന്നരമായ കേര കേദാര ഭൂമി സ്വപ്നം കാണുന്ന കേരളാവാല! കുറച്ചു പേര്‍ക്ക്,വളരെക്കുറച്ച് ദരിദ്രര്‍ക്ക് ഒരൊന്നൊന്നര ലക്ഷം വാങ്ങി നിയമനം കൊടുത്തു അതൊരു തെറ്റാണോ? കാശുകൊടുത്ത് അധ്വാനിക്കാന്‍ മുന്നോട്ടു വരുന്നവരെ പ്രോത്സാഹിപ്പിക്കുകയല്ലേ വേണ്ടത്?എന്നാലും തമ്പ്രാന്‍ സഖാക്കളെപോലെ പറവച്ച് അളന്നൊന്നുമല്ല വെറും നാഴിക്കളന്നല്ലേ വാങ്ങിയുള്ളൂ,സമാധാനം.

ആളോഹരി രണ്ടുപവന്‍ സ്വര്‍ണ്ണമുള്ള ഇന്ത്യയില്‍ ആളോഹരി അഴിമതിപ്പണം (വെറും നാലചുകൊല്ലത്തെ എടുത്താലും മതി) എത്രയുണ്ടാവും? ആ ആര്‍ക്കറിയാം നമ്മളൊക്കെ ചിലപ്പോള്‍ സുഷുപ്ത കോടീശ്വരന്മാരായിരിക്കാം.

അനുകരണങ്ങളില്‍ വഞ്ചിതരാകാതിരിക്കൂ.

2010-12-02T18:14:00.003+04:00

മഡ്ഗേറ്റ്
********
നിങ്ങളുടെ തലയില്‍ കളിമണ്ണുണ്ടോ?

എന്ത്!????

നിങ്ങളുടെ തലയില്‍ കളിമണ്ണുണ്ടോ എന്ന്?

കളിമണ്ണോ? അതെന്തിന്?

ഇല്ലെങ്കില്‍ ആ പഴയ തല തല്ലിപ്പൊളിച്ചു കളയാന്‍ സമയമായി. ഇതാ അവതരിപ്പിക്കുന്നു മഡ്ഗേറ്റിന്റെ ഏറ്റവും പുതിയ കളിമണ്ണ്
അടങ്ങിയ തല,അതിലുണ്ട് ക.ളി.മ.ണ്ണ്. തുടങ്ങി ഇരുപതിലധികം വിറ്റാമിനുകള്‍!!!.അത് ഇരുപത്തിനാലു മണിക്കൂറും നിങ്ങളുടെക
ഴുത്തിന്റെ വേരുകളില്‍ ഇറങ്ങിച്ചെന്ന് തലയെ സ്ഥിരമാക്കി നിര്‍ത്തുന്നു.കൂടാതെ ഇത് നല്‍കുന്നു ബുദ്ധിയില്‍ നിന്നും ഫലപ്രദമായ സംരക്ഷണം.
ഡോക്ട്ടര്‍മാര്‍ ശിപാര്‍ശ ചയ്യുന്ന നമ്പര്‍ വണ്‍ ബ്രാന്റ്.
ഇന്ത്യന്‍ തെണ്ടല്‍ അസോസിയേഷന്‍ അംഗീകരിച്ചത്.
_________________________________________________________________

കോമ്പ്ലിക്കേഷന്‍
*************************

നീയെന്തിനാ തൂങ്ങിക്കിടക്കുന്നേ...?

അപ്പുറത്തെ വീട് കാണാന്‍.......

അപ്പുറത്തെ വീട് കണ്ടിട്ടെന്തിനാ......?

അവിടത്തെ പെണ്ണുങ്ങള്‍ കുളിക്കുന്നതു കാണാന്‍.....

ഓ നീ ഭയങ്കര ബുദ്ധിമാന്‍തന്നെ....

എല്ലാം എന്റെ മമ്മിയുടെ ബുദ്ധിയാ.

ഏ... മമ്മിയുടെ ബുദ്ധിയോ.....??

അതെ, വളരുന്ന പ്രായത്തില്‍ നിങ്ങളുടെ കുട്ടികള്‍ക്കു കൊടുക്കണം കോമ്പ്ലിക്കേഷന്‍!!!! അതില്‍ കാല്‍സ്യം അടങ്ങിയിട്ടുണ്ട്,അതവരുടെ എല്ലുകളെയും പല്ലുകളെയും ബലപ്പെടുത്തുന്നു ഉരുക്കു പോലെ.നോക്കൂ എന്റെ മോനെ കഴിഞ്ഞകൊല്ലം അടുത്ത വീട്ടിലെ ആണ്‍ കുട്ടികള്‍ അറഞ്ഞ് നടുവൊടിച്ചിട്ടു, വെറും ആറുമാസത്തെ ചവിട്ടി പിഴിച്ചിലും ധാരയും കൊണ്ട് അവന്‍ പൂര്‍വ്വാധികം ശേഷിയോടെ മതിലു ചാടാന്‍ തുടങ്ങി.മാത്രമല്ല അവന്റെ പ്രായത്തിലുള്ളവരേക്കാള്‍ അവന്‍ മൂന്നിഞ്ച് കൂടുതല്‍ വളഞ്ഞു.

കോമ്പ്ലിക്കേഷന്‍ ആക്കുന്നു നിങ്ങളുടെ കുട്ടിയെ

മോങ്ങന്‍
പോഴന്‍
പിന്നെയോ??? ..... മൂന്നിഞ്ച് കൂടുതല്‍ വളച്ചില്‍.
ഇപ്പോള്‍ പറയൂ,..

വീ.....ആര്‍.........കോമ്പ്ലിക്കേഷന്‍ ബോയ്സ്..

ഇന്ത്യന്‍ മെന്റല്‍ അസോസിയേഷന്‍ അംഗീകരിച്ചത്.
_____________________________________________________________

ദിവ്യമാന്ത്രീക ഏലസുകള്‍
****************************************

നമസ്തേ... :)

ചൊറി,ചിരങ്ങ്,കൈകാലുകളില്‍ തരിപ്പ്,ദീര്‍ഘനേരം നിന്നാല്‍ സന്ധികളില്‍ വേദന,അതീവ ഗുരുതരമായ ജലദോഷം മുതലായ മാനസീക പ്രശ്നങ്ങള്‍ക്കും,മാരണം ഒടിവയ്ക്കല്‍ കൂടോത്രം ശകുനദോഷം ചൊവ്വാദോഷം മുതലായ ശാരീരിക പ്രശ്നങ്ങള്‍ക്കും ശാസ്ത്രീയ വിധിപ്രകാരം തയാറാക്കുന്ന വിശിഷ്ട ഏലസ്സ്.(അരയില്‍ കെട്ടുകയോ,കഴുത്തിലണിയുകയോ ചെയ്യാം,അയയില്‍ ഇടരുത് കാക്ക കൊണ്ടുപോകും).നാലാണ്ടത്തെ പ്രൗഢപുരാതന പാരമ്പര്യമുള്ള,തട്ടിപ്പാങ്കുഴി തറവാട്ടുകാരണവര്‍ ശ്രീ ദുഷ്ടാഷ്ടമന്‍ തിരുവടികളുടെ പ്രപൗത്രന്‍ പീഢനാസനന്‍ അടികള്‍ ലോകസൗഖ്യാര്ത്ഥം തയാര്‍ ചെയ്യുന്നത്.അമാവാസിയുടെ മൂര്‍ദ്ധാവിലെ മുടി മൂന്നാക്കിയതില്‍ മുരിക്കുമുള്ളുകൊണ്ട് കാപട്യസൂത്രം ആയിരത്തൊന്നാവര്‍ത്തിച്ചെഴുതിയത് അടക്കം ചെയ്ത ലോകത്തിലെ ആദ്യത്തെ ദിവ്യ ഏലസ്സ്.ഇത് ധരിക്കുന്നവര്‍ക്കുമുന്നില്‍ മദയാന പോലും മയങ്ങി നില്‍ക്കും.കരിം ചേര കടിച്ചാല്‍ പോലും മരണം ക്ഷിപ്രസാധ്യം! .

ഐ യെ മ്മേ' യുടെ (ഇന്ത്യന്‍ മന്ത്രവാദീസ് അസോസിയേഷന്‍) അംഗീകാരത്തോടുകൂടിയത്.

ഇപ്പോള്‍ വിദേശത്തും ലഭിക്കുന്നു.

കൂടുതല്‍ വിവരങ്ങള്‍ക്ക് നേരില്‍ വരികയോ തപാലില്‍ ബന്ധപ്പെടുകയോ ചെയ്യുക.

വിലാസം

പീഡനാസനന്‍ അടികള്‍ (റിട്ടയേട് ചീഫ് ഐ യെ മ്മെ)
തട്ടിപ്പാങ്കുഴി മഠം
തല്ലുകൊള്ളിമുക്ക്
(ബസ്റ്റാന്റിനു പിറകുവശത്തെ തട്ടുകടയില്‍ ചോദിച്ചാല്‍ വഴി പറഞ്ഞു തരും)

ഞാന്‍

2010-11-26T12:31:00.001+04:00

നിന്നില്‍നിന്നെന്നെ,
നീയറിയാതെയടര്‍ത്തി
നിനക്കു വേണ്ടി കരഞ്ഞവന്‍.

സംഭാഷണത്തിന്റെ/സല്ലാപത്തിന്റെ
നാല്‍ക്കവലയില്‍ നിന്നെ തനിച്ചാക്കി
തിരിയെ നടന്നു പോയവന്‍.

എന്റെ നരകത്തിന്റെ വാതില്‍
നിനക്കുമുന്നില്‍ കൊട്ടിയടച്ച്
ഉള്ളിലിരുന്ന് വെന്തുപോയവന്‍.

നിന്റ പ്രണയം
എന്റെ നരകത്തിന്റെ തീയണച്ചാല്‍
വെന്ത നഗരം പോലെന്റെ നരകം
ശൂന്യമാവുമെന്ന് വ്യഥകൊണ്ടവന്‍.

നിനക്കെന്നോട് പൊറുക്കാമൊ?
പിശാചായിപ്പിറന്നു പോയതിനാല്‍
പിഴച്ചു പോയതിന്
നിനക്കെന്നോടു പൊറുക്കാമോ?

ഒബാമ മാനഹാനിക്ക് കേസു കൊടുത്തേയ്ക്കും

2010-11-23T07:06:00.004+04:00

ഒബാമയുടെ 'നടരാജ'ഭാവം; അമേരിക്കയില്‍ പ്രതിഷേധം

Posted on: 23 Nov 2010

വാഷിങ്ടണ്‍: അമേരിക്കന്‍ മാസികയായ 'ന്യൂസ്‌വീക്കി'ന്റെ പുറംചട്ടയില്‍ പ്രസിഡന്‍റ് ബരാക് ഒബാമയെ 'നടരാജ'ഭാവത്തില്‍ ചിത്രീകരിച്ചതിനെതിരെ അമേരിക്കയിലെ ഇന്ത്യക്കാര്‍ക്കിടയില്‍ വ്യാപക പ്രതിഷേധം. മാസികയുടെ നവംബര്‍ 22-ലെ ലക്കത്തിലാണ് പ്രശ്‌നങ്ങളും പ്രതിസന്ധികളും കൈകളിലേന്തി ഒബാമ ഒറ്റക്കാലില്‍ നൃത്തം ചവിട്ടുന്ന രീതിയില്‍ പ്രത്യക്ഷപ്പെട്ടത്. 'എല്ലാത്തിന്റെയും ദൈവം' എന്ന മാസികയുടെ പ്രധാന വാര്‍ത്തയ്ക്ക് അനുബന്ധമായാണ് ചിത്രം ഉപയോഗിച്ചത്.

ഹിന്ദുദൈവമായ നടരാജമൂര്‍ത്തിയുടെ മാതൃകയില്‍ ഒബാമയെ ചിത്രീകരിച്ചതിനെതിരെ അമേരിക്കയിലെ ഹിന്ദുനേതാക്കളാണ് രംഗത്തെത്തിയത്. ന്യൂസ്‌വീക്ക് അധികൃതര്‍ ഹൈന്ദവരെ വ്രണപ്പെടുത്തുമെന്നു കരുതുന്നില്ലെന്നും എന്നാല്‍ ഹിന്ദുബിംബങ്ങളെയും ആരാധനാമൂര്‍ത്തികളെയും ഹാസ്യാത്മകമായി ചിത്രീകരിക്കുന്നതിനെ അധികൃതര്‍ അപലപിക്കേണ്ടതാണെന്നും മതനേതാക്കള്‍ പറഞ്ഞു.
ഹിന്ദു ആശയങ്ങളെയും ബിംബങ്ങളെയും സ്വന്തം നേട്ടത്തിനായോ കാര്യലാഭത്തിനായോ ഉപയോഗിക്കുന്നതു ശരിയല്ലെന്ന് നെവാഡയിലെ യൂണിവേഴ്‌സല്‍ സൊസൈറ്റി ഓഫ് ഹിന്ദൂയിസം പ്രസിഡന്‍റ് രാജന്‍ സെദ് പറഞ്ഞു.

*ഇന്നത്തെ മാതൃഭൂമി വാര്‍ത്ത

______________________________________________________________
ഒബാമ ഇന്നലെ വയ്കീട്ട് പാര്‍ട്ടി സിക്രട്ടറിക്ക് രഹസ്യ കമ്പിയടിച്ചിട്ടുണ്ടെന്ന്!, കേസുകൊടുക്കേണ്ടതിന്റെ സാങ്കേതിക വശങ്ങളെക്കുറിച്ച് പുള്ളിക്കു വല്യ പിടിയില്ലത്രേ !

ഐ.എ.എസ്. മോഹം വിട്ടു; ശിഹാബ് യു.എന്നിലേക്ക്

2010-11-20T07:31:00.002+04:00

ഐ.എ.എസ്. മോഹം വിട്ടു; ശിഹാബ് യു.എന്നിലേക്ക്

ശിഹാബിനെ മറന്നിട്ടില്ലാത്തവരേ ഒന്നു വായിക്കുക

രോഗി

2010-10-28T20:59:00.003+04:00

വസന്തങ്ങളുടെ
അസ്ഥിമാടത്തിലെ പൂക്കളെന്ന്
ചുറ്റും ചോപ്പു തുപ്പിയിട്ടിരിക്കുന്നു.

വര്‍ത്തമാനത്തിലേക്കിഴഞ്ഞുപോരവേ
ഊരിയിട്ട ഉറയെവിടെയെന്ന്,
തിരിച്ചുകയറാന്‍
മാളങ്ങള്‍ മണ്ണെടുത്തുപോയ
ഒരു പാമ്പ് പരതിക്കൊണ്ടേയിരിക്കുകയാണ്.

ഇല്ലിയിട്ടു വലിച്ച്നീറിയിട്ടും
ശ് ശ് ശ് പതിയെ! എന്ന് കാറ്റ്.
മുളങ്കൂടിനുള്ളില്‍
ഉറക്കച്ചടവുള്ളൊരു നത്തുണ്ടെന്ന്!

നെറുന്തലയില്‍ ഉത്തരമമരുമ്പോള്‍
കാടേ......
എന്റെ കനവിന്റെ നാടേയെന്ന്
കടഞ്ഞുവച്ച നെടുന്തൂണ്
ചിരിച്ചു കേഴുന്നുണ്ട്.

ഒറ്റ വെളിച്ചത്തില്‍
ചുവന്ന തിരശീല,ഉള്ളില്‍
വേഷങ്ങളഴിച്ചൊരുങ്ങുന്ന
വിധികര്‍ത്താക്കള്‍

ഇടനാഴിയില്‍നിന്ന്
താക്കോല്‍കൂട്ടം
തല്ലിയറഞ്ഞു ചിരിക്കുന്നത്
കേള്‍ക്കുന്നില്ലേ?

ണ്ടയും,മണ്ടയും,പിന്നൊരു ചെണ്ടയും.

2010-10-18T23:02:00.002+04:00

ചെണ്ടക്കാരന്‍ ചെണ്ടയില്‍
ണ്ട ട,........ണ്ട ട
ശിക്ഷ്യഗണങ്ങള്‍ പുളിമുട്ടിയില്‍
ട്ട ട,.....ട്ട ട

കണ്ടോരൊക്കെ കയ്യോണ്ടൊരു ണ്ട ട
കേട്ടോരൊക്കെ തലകൊണ്ടൊരു ണ്ട ട
വഴി പോക്കനൊരുത്തന്‍ ഞെട്ടിക്കൊണ്ടുടനടി,

ണ്ട യില്‍ കൊട്ടിയേ.....ണ്ടയില്‍ കൊട്ടിയേ

കേട്ടു കേള്‍വിക്കാരന്‍ ചൂണ്ടുവിരല്‍
കടിച്ച്,തലചരിച്ച്, ഇടങ്കണ്ണിട്ട്,
അല്പം ആലോചിച്ച്

കൂ...കൂ......
മണ്ടയില്‍ കൊട്ടിയേ,മണ്ടയില്‍ കൊട്ടിയേ
മ്മടെ ചെക്കന്റെ മണ്ടയില്‍ കൊട്ടിയേ
കൂ....കൂ..

കൂട്ടരും,കൂട്ടരും,കൂട്ടരുടെ കൂട്ടരും-
കൂട്ടത്തിലൊട്ടുപേര്‍

ആരെയാ കൊട്ടിയേ?
കൊട്ടല്ല കൊത്ത്! മണ്ടയ്ക്കുകൊത്ത്!!
ആരടെ!
ചെക്ക്ന്റെ,
മ്മടെ ചെക്കന്റെ മണ്ടയ്ക്ക് കൊത്തി.
ച്ചാല്‍ മ്മടെ മണ്ടയ്ക്ക്!
ചോയ്ക്കണം.

കൂട്ടം വഴിപോക്കനോട്
ആരെടാ കൊത്തിയേ?
കൊത്തല്ല കൊട്ട്
ആരെന്ന്!
മണ്ടക്കു കൈവച്ച് മറുകയ്യു നീട്ടി.....ദേ!

കൂട്ടം
കൂനിക്കൂടിയിരികുന്ന ചെണ്ടക്കാരനോട്
മണ്ടയ്ക്കു കൊത്തിയോ?
കൊത്തല്ല കൊട്ടെന്ന് വഴി...

ഹും.
ണ്ടയ്ക്കു കൊട്ടിയോ?

ഹില്ല.

കൊട്ടിയോ?

കൊട്ടി,ചെണ്‍....

വെട്ടെടാ.....

തലവെട്ടിച്ചുടുചോര പ്പന്തിയില്‍
താളംചവിട്ടിത്തിമൃതിത്തൈ തിത്തൈ.
മാനം നാം കാത്തൂ......
മ്മടെ ചെക്കന്റെ മാനം നാം കാത്തൂ.
ഹാവൂ!

ചാരത്ത്,
ചെമ്പട കൊരലില്‍ തെളയ്ക്കുന്ന
ചെണ്ട മൗനം.

വെറുതെ

2010-10-07T23:46:00.001+04:00

നടന്നു നടന്നു തേയുന്ന നാട്

ഇരുന്നിടത്തിരുന്നു മുഷിയുന്ന വീട്.

തേഞ്ഞു മയം വന്ന നാട്ടുവഴിയില്‍

ചിതറിക്കിടക്കുന്നുണ്ട്

ഒരു കുന്നിന്റെ കുന്നോളം സങ്കടം.

എന്നിട്ടും,

ഞാറ്റുവേലക്കിളി പാടുമ്പോള്‍

മണ്ണിന്റെയീറ്റുനോവിന്‍ ചൂടില്‍

ജീവന്‍ മിടിക്കുമ്പോള്‍

അറിയാതെയൊരു തളിലിരിലനീട്ടി,

ഒരു ചെറുപൂവിട്ട്

വെറുതെ അരഞ്ഞു പോകുന്ന വസന്തം.

"മതം മനുഷ്യനെ മൃഗമാക്കുന്ന പേവിഷം"

2010-01-22T22:51:00.002+04:00

മതം മനുഷ്യനെ മയക്കുന്ന കറുപ്പ് എന്നത് മാനവികതയോട് കടപ്പാടുള്ളവരാല്‍ തിരുത്തപ്പെടേണ്ട കാലം അതിക്രമിച്ചിരിക്കുന്നു.

"മതം മനുഷ്യനെ മൃഗമാക്കുന്ന പേവി ഷം"എന്ന് അതിനെ പുനരാഖ്യാനം ചെയ്യുക തന്നെ വേണം. കറുപ്പടിച്ചവന് കൊടുക്കുന്ന ചികിത്സ കൊണ്ട് പേ പിടിച്ചവയ്ക്കെന്താകാന്‍.'മതേതരാന്ധത'യാല്‍ തപ്പിത്തടയുന്ന രാഷ്ടീയം ഒരു ജനതയുടെ തീരാശാപമാവുകയാണ്.സമൂഹമധ്യത്തില്‍ ഫലപ്രദമായ ഇടപെടലുകള്‍ നടത്താന്‍ മനുഷ്യത്വമേറെയുള്ള യുവജനത മുന്നിട്ടിറങ്ങേണ്ടിയിരിക്കുന്നു.

ഇല്ലൊരു വാക്കും പറയാനവിടെ

2009-10-27T14:19:00.000+04:00

ജലദോഷപ്പരിഷകള്‍
വനജ്യോത്സ്നയുടെ വാസനയെക്കുറിച്ച്
മാത്രം പറയരുത്,കഴിവില്ലാതല്ല-
നിങ്ങള്‍ക്ക് കാറ്റു കേറാത്തമൂക്കൊന്ന്
തിരുമ്മിത്തുറന്നിട്ട് പോരെ?

അല്ലെങ്കില്‍
അതിന്റെ വള്ളിപുള്ളികളെക്കുറിച്ചും
വര്‍ണ്ണ വ്യതിയാനങ്ങളെക്കുറിച്ചും
അകാലത്തില്‍ അതിനെയലങ്കരിച്ച
വസന്തത്തെയും കുറിച്ച് ഘോര ഘോരം
അമറിക്കൊള്ളുക!

അഞ്ചാം പനിപിടിച്ചവര്‍
ജിലേബിയുടെ മധുരത്തെക്കുറിച്ചു
മാത്രം പറയരുത്,കഴിവില്ലാതല്ല നിങ്ങള്‍ക്ക്
നാവിലെപ്പുറ്റൊന്നു പോയിട്ടു പോരെ?

അല്ലെങ്കില്‍
ചുറ്റിച്ചുറ്റിയിരിക്കുന്ന അതിന്റെ
ആകൃതിയെക്കുറിച്ചും
കയ്യിലൊട്ടുന്ന എണ്ണയെക്കുറിച്ചും
പല്ലിറുമ്മിക്കൊള്ളുക.

കാഴ്ച പകര്‍ത്തിയ ക്യാന്‍വാസ്
കാഴ്ച്ചക്കാരാല്‍ കീറുമ്പോള്‍
അലയും കന്നുകളമറിക്കൊണ്ടതില്‍
പള്ളനിറയ്ക്കാന്‍ തിരയുമ്പോള്‍
ഇല്ലൊരു വാക്കും പറയാനവിടെ
ചിത്രം ചാര്‍ത്തിയ കലയോട്.

മനുഷ്യത്വത്തിലേക്ക്!!

2009-08-21T19:55:00.004+04:00

മനുഷ്യന്‍
എന്ന കൂട്ടായ്മയില്‍
മതം എന്ന്
കൂട്ടായ്മകളുണ്ടായപ്പോള്‍
നല്ല മതം ചീത്ത മതം എന്നിങ്ങനെ
അന്ധകാരം നിറഞ്ഞ കിടങ്ങുകളുണ്ടായി.

അന്യോന്യം
നന്നാക്കാനിറങ്ങിയവരുടേയും,
നന്നെന്ന് തെളിയിക്കാന്‍
യത്നിക്കുന്നവരുടേയും
ചീത്തയായത് ചെത്തിമാറ്റണമെന്ന്
ഗര്‍ജ്ജിക്കുന്നവരുടേയും
തലമുറകളുണ്ടായി.

രക്തവും മാംസവും കണ്ണീരും
ഇരുട്ടിലൂടൊഴുകിപ്പോയി.
കണ്ടില്ലെന്നാശ്വസിച്ചാലും
ചോരനാറുന്ന കാറ്റിന്
കണ്ണീരുപ്പു ചുവ!

ഇനി തിരിച്ചു പോക്ക്!
മനുഷ്യത്വത്തിലേക്ക്!!

ഹഹഹ

ഉപേക്ഷിക്കപ്പെട്ട
കുട്ടിക്കുപ്പായത്തില്‍
വീണ്ടും തിരുകിക്കയറ്റാന്‍
അത്ര ചെറുതാവുന്നില്ലല്ലോ എന്റെ
മദം!

അകന്നു പോകുന്നവരോട്

2009-08-13T21:53:00.003+04:00

ജീവിച്ചതെന്തിന് എന്നൊരു ചോദ്യം
വഴിമുടക്കുമ്പോള്‍ മാത്രം
ഒരുപക്ഷേ,
ആത്മഹത്യയിലെ ധീരതയെക്കുറിച്ച്
നിങ്ങള്‍ വാചാലനായേക്കാം.

രണ്ടിടങ്ങള്‍ തമ്മിലുള്ള അകലം
ഒഴിഞ്ഞില്ലാതാവാന്‍ മാത്രം
തുഴഞ്ഞു തീര്‍ത്ത പുഴ ചെന്ന്
കടലിനോടു പറയുമായിരിക്കും
തകര്‍ന്ന തോണിയില്‍ സ്പന്ദിക്കുന്ന
ഒരു ഹൃദയമുണ്ടായിരുന്നെന്ന്.

സ്വത്വം തകര്‍ന്ന ശില്പങ്ങള്‍
അസ്വസ്ഥതയുടെ ചീളുകളായി
കണ്ടെടുക്കപ്പെടുമ്പോള്‍
അനുഗ്രഹങ്ങളെക്കുറിച്ച് വിസ്മൃതി.
അതു മാത്രം!

ഏകാന്തതയിലേക്കുള്ള വിള്ളലിലൂടെ
ഒരു വാചാലത ഇനി
പെട്ടന്നു കടന്നുവരാന്‍ മടിക്കും
എങ്കിലും അപ്പുറത്ത്
നിശബ്ദമായ ഇരുട്ടില്‍
ഇട്യ്ക്കു കേള്‍ക്കുന്ന ഇലയനക്കത്തില്‍
നിന്നെ ഞാന്‍ തൊട്ടറിയും.

വിവരല്യാത്തോരടെ കോലാഹലം

2009-04-12T17:47:00.002+04:00

വിവരല്യാത്തോരടെ ഓട്ട് വേണം
വിവരല്യാത്തോരടെ പിരിവ് വേണം
വിവരല്യാത്തോരടെ കൈക്കൂലിവേണം,
വിവരല്യാത്തോരെ
വിവരല്യാത്തോരെക്കൊണ്ട്
വെട്ടികൊല്ലിക്കണം.

നേതാവിനിപ്പൊ പണ്ടത്തെ തമ്പ്രാന്റെ ഛായ
അതേ കൊടവയറ്,അതേ കസവുമുണ്ട്
മോത്ത് അതേ പര്യാസം,വായില്‍ അതേ അട്ടാസം

കൊട്ടാരത്തൂണിന് ഇല്ലത്തെ ഛായ
പിന്നാലെ കാര്യാക്കാര്! കയ്യാങ്കളിക്കാര്!!
പെണ്ണിനും പണ്ടത്തെ തമ്പ്രാട്ടിത്തണ്ട്
പിള്ളാരും കുട്ടിത്തമ്പ്രാക്കള് തന്നെ!

നേതാവ് പറേണതാ വിവരംന്ന് വച്ചാല്
തമ്പ്രാനും പറഞ്ഞേര്‍ന്നതങ്ങന്യനല്ലെ?
കാഞ്ഞ വെയിലത്തിട്ടിഞ്ചി ഒണക്കണോര്ക്ക്
ചുക്കിനെപ്പറ്റിയൊരു ചുക്ക്വറീല്യാത്രേ!

വിവരല്യാത്തോണ്ടൊന്നും ചോയ്ക്കാനും വയ്യ,
എകരല്യാത്തോണ്‍ടൊന്ന് കൊട്ക്കാനും വയ്യ.

തമ്പ്രാമ്പറഞ്ഞാ അതങ്ങനെത്തന്നെ,
പണ്ടൊക്കീം അഞ്ഞനം
മഞ്ഞളുപോല്യാര്‍ന്നൂലൊ

പൂര്‍ണ്ണവിരാമം

2009-03-28T15:02:00.002+04:00

എഴുതപ്പെട്ട ഒരു കഥയിലെ
പൂര്‍ണ്ണവിരാമം നിലനിര്‍ത്തുന്ന
നീലമഷിയിലെ ഒരോ കണികയും
അതിനെക്കുറിച്ചു വിവരിക്കുകയാണ്

പൂര്‍ണ്ണവിരാമത്തിന്റെ അളവുകള്‍,അതിരുകളെന്നിവയെക്കുറിച്ച്
അതിന്റെ നിറങ്ങള്‍,ഗന്ധങ്ങള്‍,രുചിഭേദങ്ങളെക്കുറിച്ച്

അതിരിനുമപ്പുറം
ഇതൊരു വരിയുടെ,ഒരു ഖണ്ടികയുടെ,കഥയുടെ
പൂര്‍ണ്ണ വിരാമമാണെന്നും
ഇതിനുമപ്പുറം കഥ വിവരിക്കപ്പെടുന്നില്ലെന്നും!
ഇതിനുമപ്പുറം മറ്റൊരു വരി മുതല്‍
കഥയങ്ങനെ നീണ്ടു കിടക്കുന്നുവെന്നും!

ഇതൊരു കഥയേ അല്ല ഇതിലൊരു കഥയുമില്ല
വീണുടഞ്ഞൊരു മഷിക്കുപ്പയില്‍ നിന്നു
തെറിച്ചു വീണൊരു തുള്ളിമാത്രമെന്നും!

മഷിയേയും തൂലികയേയും കുറിച്ച്
കഥയേയും കഥാകാരനേയും കുറിച്ച്
അനന്തമായ വാഗ്വാദങ്ങള്‍ക്കിടെ
ചട്ട തുളച്ചു കയറിയ
ഇരട്ടവാലന്‍ പുഴുവിന്റെ അടുത്തകടിയില്‍
പൂര്‍ണ്ണവിരാമത്തിലെ വിവാദങ്ങള്‍ക്ക് വിരാമമായി.

ബോംബിങ്ങ് ഗോമ്പറ്റീഷന്‍.

2009-03-04T13:41:00.003+04:00

പ്രിയ ബൂലോകവാസികളേ, അയ്യഞ്ചു കൊല്ലത്തില്‍ നടത്തി വരുന്ന രാജ്യസ്വയംവരം കേരളത്തിലും പ്രഖ്യാപിച്ച വെവരം എല്ലാവരും അറിഞ്ഞിരിക്കുമെന്നു വിചാരിക്കുണു.ഇക്കുറി പൊന്നാനീന്ന്
ഒരു ഇടതു പൊതു സ്വതന്ത്രനെ എയുന്നള്ളിക്കാന്‍ തീരുമാനിച്ചിരിക്കുന്നതും നിങ്ങളെല്ലാം അറിഞ്ഞിരിക്കുമെന്നു വിചാരിക്കുന്നു,
ഈ വേളയില്‍ കാടടച്ചു വെടി എന്നു പറയുന്നതുപോലെ ഒരു ബോംബിങ്ങ് ഗോമ്പറ്റീഷന്‍ നടത്തി നോക്കിയാലെന്തെന്ന് ഒരാശ!

എന്തായാലും വോട്ടുചെയ്യാന്‍ നമ്മളെ സമ്മതിക്കത്തില്ല,പൊരി വെയിലത്തുവരിനിന്ന് പണ്ടെടുത്ത പടം പതിച്ച കാര്‍ഡ്, റേഷന്‍കാര്‍ഡും നീതി അടച്ച കടലാസുമൊക്കെ വയ്ക്കുന്ന കറുത്ത ഭാഗില്‍ ഭദ്രമായി ഇരിക്കുന്നുണ്ടാവും അച്ഛന്റെ കയ്യില്‍.പറഞ്ഞിട്ടെന്താ വോട്ടു ചെയ്യാന്‍ നമ്മള് ചെന്നാല് വരന്മാരുടെ ടീംസ് ചെലപ്പോ നമ്മടെ മരണ സര്‍ട്ടീഫിക്കറ്റെടുത്തു
കാണിച്ചു തരും.അതിനു നില്‍ക്കണൊ? അതുകൊണ്ട്,നമ്മള്‍ പ്രവാസികള് ഒഴുകുന്നിടമൊക്കെ സമ്പന്നമാക്കുന്ന ഒഴുകുന്നിടമൊന്നും സ്വന്തമല്ലാത്ത,കൊടുക്കുന്ന നന്മയ്ക്ക് പകരം ചവറുകളേറ്റുവാങ്ങി നിശബ്ദമൊഴുകുന്ന നീര്‍ച്ചാലുകള്‍.

ഇതൊക്കെ കണ്ടും കേട്ടും ചുമ്മാ കുറേ ഒച്ച വച്ചും അങ്ങു കടന്നു പോകാം. ജനാധിപത്യത്തില്‍ പ്രവാസിക്ക് അവകാശമൊന്നുമില്ലെങ്കിലും കുറേ കടമകളുണ്ടല്ലോ.പിരിവിനെത്തുന്ന പാട്ട/ബക്കറ്റ്/റസീറ്റ് ബുക്കുകളില്‍ അതു വേണ്ടവിധം നിര്‍വഹിക്കുകയും ചെയ്യണമല്ലോ അതിനാലൊക്കെ വരനെ ഒരുക്കുന്നിടത്തും ഇറക്കുന്നിടത്തും പന്തലിലും പന്തിയിലും സ്ഥാന
മില്ലാത്ത നിലയ്ക്ക് പുറമെ ഒരാരവമൊരുക്കാം.

ചോദ്യം ഇതാണ് പൊന്നാനിയില്‍ നിന്നുള്ള ആ ഇടതുപക്ഷപൊതു സ്വതന്ത്രന്‍ ആരായിരിക്കും?

അതൊരു പുതുമുഖ ബ്ലോഗറായിരിക്കുമോ?

കുളു
1,മണ്ണാങ്കട്ടയിലുണ്ട് കരിയിലയിലുമുണ്ടെന്നു തോന്നുന്നു.

ഒരു മഴ

2008-12-31T13:11:00.002+04:00

ഒരു മഴ
വിധിയില്‍ പിഴച്ചും പഴിച്ചും
മനസില്‍ മടുപ്പിന്റെ പൊടിവീണു -
മൂടി മുഷിഞ്ഞിരിക്കുമ്പോള്‍.
പെയ്യാതിരിക്കുന്ന മഴ നിരാശയാണ്

ഉതിരുന്ന കനലുകള്‍ കരിയിച്ച
സ്വപ്നത്തിന്‍ ചുടുചാമ്പല്‍
കാറ്റില്‍ ഉയര്‍ന്നു പാറുമ്പൊള്‍
പെയ്യാനിരിക്കുന്ന മഴ
ഒരു പ്രതീക്ഷയാണ്

കനവിന്റെ പുതുമണ്ണില്‍
ഒരു നൂറു തളിര്‍നാമ്പുയര്‍ന്നതില്‍
മോഹത്തിന്‍ വാടാത്ത മുകുളങ്ങളണിയിച്ച്
പെയ്തു തുടങ്ങുമ്പോള്‍ അഹ്ലാദമാണ്.

ഉയിരാകെ നനയിച്ച്
ഉടലില്‍ തണുപ്പിന്റെ നാരായവേരുകള്‍
ചൂഴ്ന്നിറങ്ങി,ഒരു വെയില്‍ ചിരികാണാന്‍
ഉള്ളു തുടിക്കുമ്പൊള്‍
പെയ്തൊഴിയാതിരിക്കുന്ന മഴ മടുപ്പാണ്

ഒരു കുന്നു മോഹങ്ങള്‍ പെയ്തമര്‍ന്ന്
ഇത്തിരി സ്വപ്നത്തിന്‍ നാമ്പുയര്‍ന്ന്
ചിലതൊക്കെ പൂക്കളും കനികളുമാകുമ്പോള്‍
പെയ്തൊഴിഞ്ഞ മഴ ഒരാശ്വാസമാണ്.

എങ്കിലും...
ജീവിത വേനലിന്‍
തീക്കാറ്റിലുടയാട ചീന്തിയും
ഉടലാകെ പൊള്ളിയും
ഉള്ളിലെ ത്തെളിനീരിനുറവയില്‍
കാളകൂടത്തിന്‍ കരുക്കള്‍ കലര്‍ന്നും
കാലം അതില്‍നിന്നു കഥകള്‍
കടഞ്ഞെടുക്കുമ്പോള്‍

ഒരു മഴ,.......
ഓര്‍‍മ്മകളതിരിട്ട മറവികളുടെ
മതിലും ഇറയവും കടന്നുവന്നുമ്മറപ്പടിയില്‍
സ്മരണകളുടെ കൊത്തങ്കല്ലാടി
കളികളും കവിതയും കഥകളും ചൊല്ലി
ത്സടുതിയില്‍ പിരിഞ്ഞു പോകുന്ന
കളിക്കൂട്ടുകാരിയാണ്

ജന്തുക്കളെ കൊന്നുതള്ളുന്നവര്‍ക്കെതിരെ.

2008-11-28T16:17:00.002+04:00

വേട്ടപ്പട്ടികള്‍ കൊല്ലുന്നത് എന്തിനു വേണ്ടിയാണെന്ന്
ഇടയ്ക്കൊക്കെ ചിന്തിക്കാന്‍ തോന്നുന്നു.
അവയ്ക്കു പിന്നാലെ ശവം മണത്തെത്തുന്ന
ചാവാലിപ്പട്ടികളുടെ പ്രോത്സാഹനം കൊണ്ടാവുമോ?

കൊല്ലപ്പെടാന്‍ വിധിക്കപെട്ടവയെന്നു വച്ച്
ഓരോ തവണയും ഓട്ടം തുടങ്ങുമ്പോള്‍
ഒടുവിലാവരുതേ എന്നു മാത്രമല്ലേയുള്ളൂ.

പിറകില് നിന്നു പ്രാണന്‍ പിടഞ്ഞു പോകുന്ന
ഒരു നിലവിളി കേട്ടാല്‍ തിരിഞ്ഞു നില്‍ക്കാം
ഇന്നത്തേയ്ക്കു രക്ഷപ്പെട്ടതിന്റെ ആശ്വസത്തില്
ദീര്ഘ നിശ്വാസം ചെയ്യാം,
വീഴ്ത്തപ്പെട്ടവയെ ഭീതിയോടെ നോക്കിനില്‍ക്കാം

ചോരയിറ്റുന്ന ദംഷ്ട്രയുമായി നായ്ക്കള്
പറന്നമരുന്ന കഴുക്കള്,കഴുതപ്പുലികള്,കുറുനരികള്

ഓടിക്കൊണ്ട് എത്ര തവണ രക്ഷപ്പെടാനായേക്കും?

തലയിലുള്ളത് കിരീടമല്ല കൊമ്പുകളാണെന്നും,
കുളമ്പുകള്‍ക്ക് കല്ലുളിയുടെ മൂര്‍ച്ചയുണ്ടെന്നും
തേറ്റകളില്‍ നിന്ന് ഇടിമിന്നല്‍ പാളുമെന്നും
ഒരു നാള്‍ തെളിയിക്കേണ്ടി വരില്ലേ?
ഇരയാകാന് തിരഞ്ഞെടുക്കപ്പെടുന്ന അന്നെങ്കിലും.

മുറിവേല്‍ക്കുന്ന പട്ടികളെക്കുറിച്ച്
ആവലതിപ്പെടാന്‍,പരാക്രമങ്ങളോര്‍ത്തു വിലപിക്കാന്‍
ഔഷധ ലേപനം ചെയ്തു തലോടാന്‍
പട്ടികളേക്കാള്‍ യജമാനസ്നേഹം കാണിക്കുന്ന സേവകരുണ്ട്.

നായ്ക്കളുടെ തത്വ ശാസ്ത്രം
യുഗങ്ങളെത്ര കഴിഞ്ഞാലും മാറില്ലല്ലോ
കഴുത്തിലൊരു ചങ്ങലപ്പാട്,
എറിഞ്ഞുകിട്ടുന്ന എച്ചിലില് മൃഷ്ടാന്നം
വായ്ത്താരിയില്‍ വരിയുടയ്ക്കപ്പെട്ട ധീരത.

വേട്ടയില്ലെങ്കില് കെട്ടിയ കുറ്റിയില് കിടന്നു
യജമാനസ്നേഹം മോങ്ങിത്തീര്‍ക്കാന്
വിധിക്കപ്പെട്ട വ്യര്‍ത്ഥ ജന്മങ്ങള്‍.

കരുതേണ്ടത്

2008-10-30T11:30:00.002+04:00

വിധിയുടെ ക്രൂരനായാട്ടിന്നു
ഇരയാകാന്‍ വിധിക്കപ്പെട്ടവരേ
ഒരായുധം കരുതുക
ഒരു കല്ലെങ്കിലും,കയ്യിലെപ്പൊഴും

കയ്യിലൊരു കല്ലുണ്ടെങ്കില്‍
ഒരു നായയും എളുപ്പം നിങ്ങളെതൊടില്ല.

കുത്തിനിറച്ച ചാക്കില്‍ നിന്നും
പൊട്ടിയൊലിക്കുന്നു സംസ്കാരം
മൂക്കുപൊത്തിയും മുഖം തിരിച്ചും
മരവിച്ച മനവുമായ്
കടന്നു പോകുന്നു കാലം

വരുന്നുണ്ട് വളരുന്ന തലമുറ
കാമത്തിന്‍ വ്യാളികള്‍
മൃത്യുവിന്നാഴത്തില്‍ തള്ളിയ
ബാല്യത്തിന്‍ തേങ്ങലും കേട്ടൊട്ടു
പതറിയ മനവുമായ്.

ഇരയെയും കാത്ത്
വഴികളില്‍,കൂട്ടത്തില്‍,
ഇരുളിന്നിടുക്കുകളില്‍
പതിയിരിക്കുന്നുണ്ട്
മൂര്‍ത്ത സംസ്കാരത്തിന്‍
കരിനിഴല്‍‍ പിറവിയാം
തെരുവു നായ്ക്കള്‍.

ഒരു ഉരുളന്‍ കല്ലെപ്പൊഴും കരുതുക
ഒരു നായയും തൊടില്ല നിങ്ങളെ.

ഒരു പൂളമരം ചിലതു പറഞ്ഞോട്ടെ

2008-09-29T18:21:00.001+04:00

ഒരു പൂളമരത്തിനും കഥയോ എന്നായിരിക്കും,അത് എനിക്കു മാത്രമല്ലെ പറയാന്‍ കഴിയൂ കേള്‍ക്കാന്‍ ആര്‍ക്കും നേരമില്ലെന്നറിയാം.കേള്‍ക്കാനാര്‍ക്കും സമയമില്ലെങ്കിലും എല്ലാവര്‍ക്കും പറയാന്‍ കാണും അതെനിക്കുറപ്പാണ്.അല്ലെങ്കില്‍ വഴിവക്കിലേക്കു ചാഞ്ഞ കൊമ്പുകളുമായി വര്‍ഗ്ഗീസ് കഞ്ഞികുടിച്ചു വരുന്നതും കാത്തു നില്‍ക്കുന്ന ഞാനിതുപറഞ്ഞു തുടങ്ങില്ലല്ലോ.

കഴിഞ്ഞ ഞായറാഴ്ച കുര്‍ബാന കഴിഞ്ഞു പോകുന്ന വഴിയാണ് വര്‍ഗ്ഗീസ് എന്റടുത്തു വന്നത്. മുമ്പൊക്കെ അവന്‍ വഴിയിലൂടെ പോവുന്നതു കാണുമ്പോഴേ ഒരു പേടിയാണ്.എന്നെ കാണരുതേ എന്നു പ്രാര്‍ത്ഥിച്ച് ഒന്നു നിശ്വസിക്കുക പോലും ചെയ്യാതെ നില്‍ക്കുമ്പോഴാകും കാറ്റുവന്ന് ഇക്കിളിയിട്ടു കടന്നു പോവുന്നത്,ഒതുക്കിയ ചിരിയോടെ കണ്ണു തുറക്കുമ്പോഴേയ്ക്കും വര്‍ഗ്ഗീസ് എന്നെ കടന്നു പോയിരിക്കും. തുരുമ്പിച്ചസൈക്കിളിനു പിറകില്‍ ചുരുട്ടി വച്ച കമ്പയ്ക്കു മേലെ കെട്ടിവച്ച ഈര്‍ച്ചവാളിന്റെ വെളുത്തു മിന്നുന്ന പല്ലുകള്‍ എന്നെ ഇളിച്ചു കാട്ടും,കയറിന്റെ കെട്ടിനിടയിലൂടെ ഒരു വാക്കത്തിവായ്ത്തല അട്ടഹസിക്കും,ഇതൊന്നും കൂടാതെ വര്‍ഗ്ഗീസിന്റെ ചുമലില്‍ സദാ മുന്നോട്ടു നോക്കിയിരിക്കുന്ന ഒരു മഴുവുണ്ട്.ഭാരിച്ച അതിന്റെ ഉരുക്കുവായ്ത്തല വര്‍ഗ്ഗീസിന്റെ തോളില്‍ വിശ്രമിയ്ക്കും,നീണ്ടുകിടക്കുന്ന കൈപ്പിടി വിയര്‍പ്പു മിന്നുന്ന അവന്റെ മുതുകിലും. കഴിഞ്ഞ എടവത്തില്‍ എന്റെ ഇടതു തോളിലൂടെ ആര്‍ത്തലച്ചു വീണുപോയ തേക്കിന്‍ തൈ പറഞ്ഞു അതിന്റെ വായ്ത്തലപ്പിന്റെ മൂര്‍ച്ചയെപ്പറ്റി.രണ്ടാമത്തെ ചുംബനത്തിനു ശേഷം കഷ്ണങ്ങളായി അറിയാതെ നുറുങ്ങിപ്പോകുന്ന ഉടലിനെപ്പറ്റി.അപ്പോഴേയ്ക്കും പ്രജ്ഞ നശിച്ച് അവള്‍ വീണുപോയി എന്റെ മുള്ളുകള്‍ എന്തിനോ തരിക്കുന്നതു ഞാനറിഞ്ഞു എന്നിട്ടും മൗനമായി നില്‍ക്കാനേ കഴിഞ്ഞുള്ളൂ. കണ്ടോ ഇപ്പോഴും ഞാനെന്നെപ്പറ്റി പറയാന്‍ വിട്ടു.ഞാന്‍ തെക്കേപണിക്കത്തു തറവാട്ടില്‍ വളപ്പിന്റെ പടിഞ്ഞാറേ മൂലയ്ക്കായി റോഡിനോടുചേര്‍ന്നു നില്‍ക്കുന്ന ഒരു പൂളമരം.
നന്നേ ചെറുപ്പത്തില്‍ ആര്‍ക്കും കണ്ടൂടായിരുന്നു.എല്ലാ കൊല്ലവും കണ്ടത്തിലേയ്ക്കു തോലു വെട്ടുന്ന പെണ്ണുങ്ങള്‍ അരിഞ്ഞരിഞ്ഞെടുത്തതു കൊണ്ട് ഞാനത്ര പെട്ടന്നു വലുതായില്ല.പിന്നെ ഓരോരുത്തരു പറയാന്‍ തുടങ്ങി

"ശ്ശോ നാശം എന്തൊരു മുള്ളാ ഇതിന്."

അപ്പോഴാണു ഞാനുമതു നോക്കിയത് അവിടവിടെയായി കുറേ മുള്ളുകള്‍.കൊള്ളാം അങ്ങനെ വര്‍ഷാവര്‍ഷമുള്ള തോലു വെട്ടലില്‍ നിന്ന് ഞാനൊഴിവാക്കപ്പെട്ടു.പിന്നെ പെട്ടന്നാണു ഞാന്‍ വളര്‍ന്നത് മുള്ളുകള്‍ക്കു ബലം വച്ചതോടെ എല്ലാവരും പയ്യെപ്പയ്യെ എന്നെ ഒഴിവാക്കിത്തുടങ്ങി എല്ലാ അനാവശ്യസാധനങ്ങളുടേയും ഉപേക്ഷിക്കേണ്ട ഇടമാക്കി എന്റെ ചുവട്.വര്‍ഷങ്ങളെന്നെ ഇരയും സാക്ഷിയുമാക്കി കടന്നു പോയി.ഇരയായി നിന്നതിനു കിട്ടിയ വടുക്കളും സാക്ഷിയായതിനു കിട്ടിയ കൂലിയും ചേര്‍ത്ത് എനിക്കുമൊരു നല്ല തടിക്കനവും പൊക്കവും വച്ചു.ആരും എന്റടുത്തു വരാതായപ്പോള്‍ ആദ്യമെനിക്കു സന്തോഷം തോന്നിയിരുന്നു.എങ്കിലും മാവു പൂക്കുമ്പോളവിടെക്കൂടുന്ന കുട്ടികളുടെ സന്തോഷവും ബഹളവും,കശുമാവിന്‍ചില്ലകളിലും,എന്തിന് മുത്തന്‍ പുളിമരത്തിന്റെ ചോട്ടില്‍ പോലും കളിവീടുകെട്ടിയും മണ്ണപ്പം ചുട്ടും കളിക്കുന്ന അവരുടെ ആഘോഷം കാണുമ്പോള്‍ എനിക്ക് ഇടയ്ക്കൊക്കെ കുശുമ്പു പോലും തോന്നിയിരുന്നു.

എന്റെ പ്രാര്‍ത്ഥനകേട്ടിട്ടോ എന്തോ പിന്നത്തെ വര്‍ഷത്തില്‍ എന്റെ ചില്ലകളിലും നിറയെ മൊട്ടുകള്‍ നിറഞ്ഞു കുറേ കുരുവികളും കിളികളും വന്നുതേന്‍ കുടിച്ചു കൂട്ടത്തില്‍ രണ്ടു കാക്കകളും വന്നു എന്റെ ഒരുശിഖരത്തില്‍ കൂടുവച്ചു അതോടെ എനിക്കു സന്തോഷമായി ഞാന്‍ വെറും പാഴല്ല എന്നു തോന്നി.അതിനിടയ്ക്കാണ് ഇവന്‍ എന്റെ ചോട്ടില്‍ വന്നത് വൈകുന്നേരം അച്ഛമ്മയുടെ വാലില്‍ തൂങ്ങി ഈ പീക്കിരിച്ചെക്കന്‍ എന്റെ ചുവട്ടിലൂടെ കാവലാംചിറയിലേയ്ക്കു കുളിക്കാന്‍ പോവും.അവനെ വേഗം കുളിപ്പിച്ചു കരയ്ക്കു വിട്ടിട്ട് അച്ഛമ്മ പറയും

''വേഗ്ഗം പോയി ചമ്മണമ്പടിഞ്ഞിരുന്ന് നാമം ചെല്ലണം ട്ടാ പൊന്ന്വോ."

ചെക്കനന്നേ വികൃതിയാ കുളിക്കാന്‍ പോവുമ്പഴേ അവനെന്റെ ചുവന്നപൂക്കളിലേയ്ക്കു നോക്കുന്നതു ഞാന്‍ കണ്ടതാണ് കുളിച്ചു കുട്ടപ്പനായി അവന്‍ തിരിച്ചുവന്ന് എന്റെ ചുവടു മുഴുവന്‍ പരിശോധിച്ചു കുറേ കൊഴിഞ്ഞ മൊട്ടുകള്‍ പെറുക്കിയെടുത്തു.എനിക്കത്ഭുതം തോന്നി എന്റെ മൊട്ടു തേടിയും ഒരു കുട്ടിയോ?ആകാംഷയോടെ ഞാന്‍ അവനെ നിരീക്ഷിച്ചു എന്തൊക്കെയോ പിറുപിറുത്തു കൊണ്ട് അവന്‍ അവിടെയിരുന്നു "കുളിച്ച കുട്ടി മണ്ണിലിരിക്ക്യേ അയ്യേ" എന്നെനിക്കു പറയാന്‍ തോന്നിയെങ്കിലും ഞാന്‍ മിണ്ടിയില്ല.

അവന്‍ വാടിയ മൊട്ടുകളുടെ ചെറിയവാലെല്ലാം കളഞ്ഞ് രണ്ടു കുഞ്ഞു വിരലുകള്‍കൊണ്ട് കൂട്ടിപ്പിടിച്ച് ഒറ്റത്തിരിപ്പിക്കല്‍ കൊള്ളാം പമ്പരം പോലെ നിന്നുകറങ്ങുന്നു ഒരു വാടിയ മൊട്ട്! ഇവനാളുകൊള്ളാമല്ലോ എന്റെ ശിഖരത്തില്‍ നിന്നു ഞാന്‍ കുറച്ചു മൊട്ടുകള്‍കൂടി പൊഴിച്ചു കൊടുത്തു അവന് ഏറെ സന്തോഷമായി.പിറ്റേന്നും അവന്‍ വന്നു കൂടെ അവന്റെ ചങ്ങാതിമാരുമുണ്ടായിരുന്നു.അവര്‍ മൊട്ടുകള് ‍കൊണ്ട് പമ്പരങ്ങളും ചുവന്ന പൂക്കളുടെ നീണ്ട ഇതളുകള്‍ മുറിച്ചു ചുരുക്കി കമ്മ്യൂണിസ്റ്റപ്പയുടെ വടികളില്‍ കോര്‍ത്ത് കൊച്ചു വണ്ടികളുമുണ്ടാക്കിക്കളിക്കുന്നത് കണ്ട് സന്തോഷം കോണ്ടെന്റെ മനസ്സു നിറഞ്ഞു ചില്ലകളില്‍ ചുവന്ന പൂക്കളും.ഇടയ്ക്കൊക്കെ നല്ല പൂക്കള്‍ക്കു വേണ്ടി കല്ലുകള്‍പെറുക്കി എറിയും അതുകൊണ്ട് അവിടവിടെ തോലു പോയാലും എനിക്കു വേദനിക്കില്ലായിരുന്നു.

"പിള്ളേരെപ്പഴും അതിന്റെ ചോട്ടിത്തന്ന്യാ? വല്ലകൊമ്പ്വൊടിഞ്ഞ് തലയ്ക്ക് വീഴും പൂളയാ അത് സാധനം ഒരൊറപ്പൂല്യാത്തത്. ഇക്കൊല്ലം എന്താ പറ്റീതണാവോ കൊമ്പോക്കെ നെറച്ചും പൂവ്വും കായീണ്ടലോ?."

അവിടുത്തെ തറവാട്ടു മുത്തശ്ശിയാണ്

എനിക്കെന്താ കണ്ണുകണ്ടൂടെ? ഞരമ്പുവണ്ണത്തിലുള്ള മാവിന്‍ തുമ്പത്തും മറ്റും കുട്ടികള്‍ക്കു കയറിമറിയാം എന്റെ ചുവട്ടിലിരുന്നു കളിച്ചാല്‍ വഴക്കായി അടിയായി.എന്റെ ചുവന്ന പൂക്കളില്‍ നോക്കിയാല്‍ കണ്ണിക്കേടു വരുമത്രേ ഓരോരോ കുശുമ്പുകള്‍ ആ മുത്തശ്ശിയങ്ങനെ തട്ടി വിടും എന്നോടെന്തോ മുജ്ജന്മ വൈരാഗ്യമുള്ളതു പോലെയാണ്.കുട്ടികള്‍ അതൊന്നും കാര്യമാക്കാതായി കളിക്കാന്‍ പറ്റിയ പൂഴിമണ്ണും എന്റെ തണലും പിന്നെ പൂക്കുന്ന കാലമായാല്‍ പമ്പരമുണ്ടാക്കാനും വണ്ടിയുണ്ടാക്കാനും പെമ്പിള്ളാര്‍ക്കാണെങ്കില്‍ എന്റെ കുഞ്ഞുകായ്കള്‍ക്കുള്ളിലെ അരികളെടുത്ത് പേന്‍ മുട്ടിക്കളിക്കാനും.ഒക്കെകഴിഞ്ഞാല്‍ കാളിത്തള്ളവരും ഉണങ്ങിക്കരിഞ്ഞ മൊട്ടുകളൊക്കെ പെറുക്കിയെടുത്തു പോകും അതൊക്കെ വാങ്ങാന്‍ വടക്കുനിന്ന് ഒരു മാപ്ല വരുമത്രെ ആ ചെക്കന്‍ പറയുന്നതു കേട്ടതാണ് അതുകൊണ്ടു പോയി പൊടിച്ച് കാപ്പിപ്പൊടിയില്‍ മായം കലര്‍ത്തുമെന്ന്!
എന്തു തന്നെയായാലും ആചെക്കന്‍ വല്ലാത്ത കുസൃതി തന്നെ അവനെങ്ങനെ ഇത്രയും സൂത്രങ്ങള്‍ കിട്ടുന്നു ആവോ. ഒരു ദിവസം അവന്‍ എന്റെ രണ്ടു നാലു മുള്ളുകള്‍ കല്ലു വച്ച് കുത്തി അടര്‍ത്തിയെടുത്തു എന്നിട്ട് വേലിയോടു ചേര്‍ന്നു നില്‍ക്കുന്ന പുള്ളിനീരോലിയുടെ ഇലയും ചേര്‍ത്ത് ചവയ്ക്കാന്‍ തുടങ്ങി മുള്ളിന്റെ മൂര്‍ച്ചയെ ഓര്‍ത്തപ്പോള്‍ എനിക്കു പേടിയായി എന്തു ചെയ്യാനൊക്കും! ചക്കന്‍ എന്തോ അതിക്രമം കാണിക്കുകയാണെന്നാണു കരുതിയത് കുറച്ചു കഴിഞ്ഞപ്പോള്‍ എന്റെ ചുവന്ന പൂക്കളെക്കാളും ചുവപ്പില്‍ അവന്‍ നീട്ടിത്തുപ്പി കാളിത്തള്ള നാലും കൂട്ടി മുറുക്കിത്തുപ്പിയാല്‍ പോലും അത്ര ചോപ്പു ഞാന്‍ കണ്ടിട്ടില്ല. പിന്നെ കുറേ ദിവസം അവനും കൂട്ടര്‍ക്കും മുറുക്കലിലായിരുന്നു കമ്പം.പിന്നെയൊരു ദിവസം കണ്ടു സ്കൂളില്‍ നിന്ന് വന്നപാടെ ഓടി വരുന്നു വന്നതും രണ്ടു നാലു മുള്ളുകള്‍ അടര്‍‍ത്തിയെടുത്ത് വന്നപോലെത്തന്നെ പാഞ്ഞു പോകുകയും ചെയ്തു.പിറ്റേ ദിവസമാണു അവനും കൂട്ടരും പിന്നെയെത്തിയത്
അവന്റെ കയ്യില്‍ തലേന്നത്തെ മുള്ളും കണ്ടു. കൂട്ടുകാരോട് അവന്റെ പുതിയ പരീക്ഷണം കാണിക്കുകയാണ്
അവന്റെ പേര് കൊത്തിയിരിക്കുന്നു പേനയിലെ മഷിയില്‍ മുക്കി അവന്റെ പേര് കടലാസില്‍ നിരനിരയായി പതിച്ചിരിക്കുന്നു! പിന്നെ കുറേ ദിവസം അതിലായിരുന്നു കമ്പം അതിനിടയ്ക്ക് ഒരു ദിവസം ചൂണ്ടു വിരലില്‍ ഒരു കെട്ടുമായി അവന്‍ വന്നിരുന്നു ബ്ലേഡ് കൊണ്ട് മുറിഞ്ഞതാവണം പിന്നെ അച്ചു നിര്‍മ്മാണം കണ്ടിട്ടില്ല.
എന്തായാലും എനിക്കു അഭിമാനവും സന്തോഷവും തോന്നിയ കുറേ കാലങ്ങള്‍ അവരെല്ലാം കൂടി സമ്മാനിച്ചു. മുത്തശ്ശിമാത്രം എന്നും പ്രാകും എന്റെ കൊമ്പില്‍ കൂടു കൂട്ടിയ കാക്കക്കുടുമ്പം കാരണം കയ്യില്‍ ഒരു മുള്ളുവടിയും കൊണ്ടേ മുത്തശ്ശി പുറത്തിറങ്ങൂ എന്നാല്‍ എന്റെ പഞ്ഞി നിറഞ്ഞ കായ്കള്‍ക്കു വേണ്ടി ആദ്യം വാശിപിടിക്കുന്നതും അവരാണ്.

എനിക്കോര്‍മ്മ വയ്ക്കുമ്പൊ മുതലേ കാണുന്നതാണ് അവരെ. നല്ല ഉച്ചത്തിലേ സംസാരിക്കൂ വലിയ ധൈര്യശാലിയാണെന്നാണു വെയ്പ്പ് എന്നാല്‍ എനിക്കറിഞ്ഞൂടെ ഭയങ്കര പേടിക്കാരിയാ .സന്ധ്യയ്ക്ക് കുളിയും കഴിഞ്ഞ് മൂപ്പത്ത്യാര് നമഃശിവായ നമഃശിവായ എന്നു ജപിച്ച് എന്റെ ചുവട്ടിലൂടെ നടന്നാണു പോവുക കൂടെ ആരുമില്ലെങ്കില്‍ കക്ഷിക്കു ഭയങ്കര ഭയമാണ്.എന്റെ ചുവട്ടില്‍ നിന്നല്പം മാറിയാണ് ആ തറവാട്ടിലെ കാരണവന്മാരെയൊക്കെ ദഹിപ്പിച്ച സ്ഥലം ആകെ ഉരുളന്‍ കല്ലുകളും മുള്ളുമൊന്തയും നിറഞ്ഞാണവിടെ കിടക്കുന്നത് ഇപ്പോളേറെയായി അവസാനത്തെ ശവദാഹം കഴിഞ്ഞിട്ട്. ഇവരുടെ അമ്മയായിരുന്നെന്നു തോന്നുന്നു അവസാനം, ഞാനന്നു ചെറുതായിരുന്നു ആളുകള്‍ എന്നെ ചവിട്ടി മതിച്ചും ഒടിച്ചു മടക്കിയും കടന്നു പോയി.ഇവിടെയെത്തിയാല്‍ മുത്തശ്ശിക്കു ഭയങ്കര പേടിയാണ് നാമജപമൊക്കെ അല്പ്പം ഉച്ഛത്തിലാകും എനിക്കു കുസൃതി തോന്നിയാല്‍ ചിലപ്പോള്‍ ഒരുണങ്ങിയ ചില്ലയോ വിത്തുണങ്ങി പഞ്ഞിനിറഞ്ഞു പാകമായ കായയോ ഉണങ്ങിയ തേക്കിലകളിലേയ്ക്കു കുടഞ്ഞിടും.വെപ്രാളം കൊണ്ട് അവരുടെ നാമജപം തെറ്റും,ഒരുചുവട് മുന്നോട്ട് ചാടും.എന്നിട്ട് ആരെങ്കിലും കാണുന്നുണ്ടോഎന്നും വെപ്രാളപ്പെട്ട് ഭയന്ന് ഇടയ്ക്കിടയ്ക്ക് തിരിഞ്ഞു നോക്കി ഓടും ഞാന്‍ തലയറഞ്ഞു ചിരിക്കും

ഉം.....നിയ്ക്കൊരു കെടയ്ക്ക നെറക്കാള്ള പഞ്ഞീണ്ടാവും നാടന്‍ പൂളടെ പഞ്ഞ്യൊക്കെ പ്പൊ കാശ് കൊടത്താകിട്ട്വോ?

"പടിഞ്ഞാറെ മുക്കിലെ പൂളടെ പഞ്ഞീന്നു വച്ചാല്‍ അതാണു പഞ്ഞി ഇപ്പഴത്തെയീ കെടക്കേലു വെരണ പഞ്ഞ്യൊക്കെ എന്തിനു കൊള്ളാം നിക്കാ പൂളടെ പത്തു കായ ങ്ങട്ടു തന്നാല്‍ മതി."

പിന്നെ പരമനോ കൊച്ചുണ്ണ്യാരോ വന്ന് കൊമ്പുകളൊക്കെ കുലുക്കി കായ്കളെല്ലാം പൊഴിച്ചിടും എന്തുത്സാഹമാണെന്നോ മുത്തശ്ശിക്കപ്പോള്‍! അന്നു മൊത്തം അവര്‍ക്കെന്നെ വല്യകാര്യമായിരിക്കും.

ഇപ്പോള്‍ എന്താണെന്നറിയില്ല വര്‍ഗ്ഗീസ് അവിടെ വന്നിട്ടുണ്ട്,തുരുമ്പിച്ച സൈക്കിള്‍ റോഡിലിരിപ്പുണ്ട്
ചുരുട്ടിയിട്ട വടവും ഒരു മഴുവായ്ത്തലയും ഉമ്മറത്തിണ്ണയില്‍ ചാരി നോക്കുന്നത് എന്നെത്തന്നെയാണോ?
ഒരു വിറ എന്റെ ഉടലില്‍ പടരുന്നു എനിക്കാ ചെക്കനെയൊന്നു കണ്ടാല്‍ കൊള്ളാമെന്നുണ്ട്. അവനിന്നു ഞായറാഴ്ചയായിട്ടും വീട്ടിലില്ലേ?...

പൊന്നോണ സ്മൃതികളില്‍.

2008-09-09T09:40:00.001+04:00

പൊന്നോണം വരുന്നുണ്ടെ-
ന്നെല്ലാരും പറയുന്നു

ഓണ വില്ലൊലിയില്ല
പൂവിളി കേള്‍ക്കാനില്ല
പൂക്കളം തീര്‍ക്കാനൊരു
കൊച്ചു മുറ്റവുമില്ല

മുക്കുറ്റിത്തൈകളില്ല
തുമ്പക്കുടങ്ങളില്ല
താണുപറക്കുന്നൊരാ
പൊന്നോണത്തുമ്പിയില്ല

പൂക്കളും പൂമ്പാറ്റയും
തുമ്പിയും തുമ്പപ്പൂവും
കോടിമുണ്ടുടുത്തുണ്ണാന്‍
മാതോരുമില്ലെങ്കിലും
ഓണം വരുന്നുണ്ടെന്നെന്‍
പാഴ്മനം തുടിയ്ക്കുന്നു.

കണ്ണാടിച്ചുമരുള്ള
കടകള്‍ക്കുള്ളിലെല്ലാം
കടലാസുപൂക്കള്‍തന്‍
കാടുകള്‍ അനവധി

നിറങ്ങള്‍ കണ്ണില്‍ കുത്തി
നീറ്റലുണ്ടാക്കുന്നിതു
നിറഞ്ഞ സ്മൃതികളില്‍
നെടുവീര്‍പ്പുയരുന്നു.

കണ്ണാന്തെളിപ്പൂക്കള്‍തന്‍
തെളിമയോര്‍മ്മകളില്‍
തുമ്പപ്പൂ തന്നൊരിറ്റു
മധുവെന്‍ രസനയില്‍
ഉത്രാട രാത്രികള്‍തന്‍
കേളികള്‍ കാതുകളില്‍
അലയായ് ഓണനിലാ-
വൊളിയായ് വിടരുന്നു.

കനവില്‍ ഓണമെന്ന-
സ്മൃതിയതുണരുമ്പോള്‍
കാതങ്ങളെത്ര ദൂരെയാകിലും
കാലത്തിന്റെയൊഴുക്കില്‍
ഒറ്റയ്ക്കൊരു തുരുത്തില്‍ പിണഞ്ഞാലും
വ്യഥകള്‍ മറന്നെന്റെ
മാനസം തുടിയ്ക്കുന്നു.

തുടിയ്ക്കാതിരിക്കുവതെങ്ങനെ
ഞാനുമൊരു കൈരളി പെറ്റപുത്രന്‍
കനവില്‍ പൊന്നോണത്തിന്‍
സ്മൃതികള്‍ പേറുന്നവന്‍.

വീണ്ടുമെന്തിനു വെറുതെ?

2008-08-23T13:56:00.007+04:00

നിനക്കായ് ഉരുവായ ഇടം
ഓര്‍മ്മതന്‍ വെണ്ണിലാ വെട്ടം പതിക്കവേ
മന്ദമൊഴിഞ്ഞുപോകുന്നൊരു മഞ്ജീര നാദം
പുടവത്തുമ്പുലയുമ്പോലൊരു ചെറുനിശ്വാസം
നേര്‍ത്ത തേങ്ങലിന്നലയെ മറച്ചൊരു
കുപ്പിവളച്ചിരിയുതിര്‍ക്കും കിലുക്കം.
വീണ്‍ടുമതുപോലെ...എന്തിനു വെറുതെ?

പത്തരമാറ്റാര്‍ന്നൊരു പൊന്‍ പുലരി
പട്ടലയുലയുമൊരു മലര്‍ വാടി
പ്രാണന്റെ വേനലില്‍ പെയ്തമരാനൊരു
വെണ്മേഘ ജാലം
പ്രണയത്തിനു പകരം തരാമെന്ന്
പാഴ്വാക്കു പറഞ്ഞില്ല ഞാന്‍
നിന്നോട്.

പാതിമെയ്യാകുവാന്‍ പാഴ്മോഹമല്ലെന്ന്
പട്ടടയോളവും പതറാത്ത പ്രണയത്തിന്നൊരുമാത്ര,
അതു മാത്രം മതിയെന്ന്
ഉള്ളിലെ വിങ്ങുന്ന പൊള്ളലില്‍
പ്രേമത്തിന്‍ നറുനിലാവിറ്റിച്ചു കണ്‍പാര്‍ത്തിരിക്കുമെന്ന്
നീ,കളിവാക്കു ചൊല്ലിയതല്ലെന്നറിഞ്ഞിട്ടും
കണ്ടെടുത്തില്ല ഞാന്‍
നിന്നെയല്ല,നിനക്കുവേണ്ടി നീ കാത്തിരിക്കുന്ന എന്നെ.

ഒടുവിലിങ്ങ് മനസ്സിലെ-
തെളിനീരു വറ്റുമീ മരുവില്‍,കാലത്തിനിപ്പുറം
ഞാനേകനായ്
തണലറ്റ ജീവിതപ്പാതകള്‍‍ താണ്ടവേ.

കനവിലാ കാന്തിയേറും നിന്റെ പുഞ്ചിരി
കണ്ണിലെ കളിവിളക്കിന്‍ തെളിനാളം
കാറ്റിലലിഞ്ഞൊരിലഞ്ഞിപ്പൂഗന്ധം
സ്മരണയിലുണരുന്നതെന്തിനു വെറുതെ?

വറ്റാത്ത പ്രേമത്തിന്‍ തെളിനീര്‍ പകര്‍ന്നുനീ
നോറ്റു വളര്‍ത്തിയ പാരിജാതം വെട്ടി
ചിതയൊന്നൊരുക്കുക.
തൂവിയ കണ്ണീരിനുപ്പും,നുകര്‍ന്ന മധുരവും
സ്നേഹം പകര്‍ന്നൊരാ മണ്‍ചെരാതും
ചൊരിഞ്ഞൊരു ശാപവഹ്നിതന്‍ നാളത്താല്‍
എന്നെ നീ ചാമ്പലായ് തീര്‍ക്കുക.

കെട്ടടങ്ങട്ടെയീ സ്പന്ദിക്കുമോര്‍മ്മകള്‍
കനവിലീ നീറുന്ന കനലുമായ് കാലത്തിനക്കരേയ്ക്ക്
ഇനിയെനിക്കാവില്ല തുഴയവാന്‍.

ചെറ്റ

2008-08-10T10:17:00.003+04:00

മസിലുറച്ച കായ ബലം
ഇടിയറ മുഴക്കം പോലെ
ശബ്ദ ധോരണി.

കരയിലാണെങ്കില്‍ ചാടും
വെള്ളത്തിലാണെങ്കില്‍ നീന്തും
ഒക്കെ തരം പോലെ.
എവിടെയായാലും,
അടക്കിവാഴാന്‍പോന്ന താന്‍പോരിമയാണ്
എടവപ്പാതികളില്‍ മുഴങ്ങിക്കേള്‍ക്കുന്നത്.

രണ്ടു കുടപ്പനപ്പട്ട അല്ലെങ്കില്‍
നാലു കരിമ്പനപ്പട്ട അതുമല്ലെങ്കില്‍
അഞ്ചാറ് ഓലമെടല്‍.

കാലവര്‍ഷത്തില്‍ പടിഞ്ഞാട്ടു ചരിച്ചു വയ്ക്കും
തുലാവര്‍ഷത്തില്‍ കിഴക്കോട്ട് ചരിച്ചു വയ്ക്കും
ഒക്കെ തരം പോലെ.
സര്‍വ്വരേയും കൊള്ളിക്കാവുന്ന കൊട്ടാരമാണെന്നൊക്കെ
വമ്പ് പറയുന്നതായല്ല തോന്നാറുള്ളത്.

മണ്ണ് പൊന്നായി മാനം നോക്കി കിടക്കുന്നു
മക്കള്‍ വായും പൊളിച്ച് അരിയും കാത്തിരിക്കുന്നു.

അരി കിട്ടിയില്ലെങ്കില്‍ കോഴിയെ തിന്നാമെന്ന്
അരി കെട്ടിക്കിടന്നാല്‍ കോഴിയെ തീറ്റാമെന്ന്
ഒക്കെ തരം പോലെ..

മുഴങ്ങിക്കേള്‍ക്കുന്നതപ്പൊഴും
അതേ വാഗ്ധോരണിയാണ്.

ഒരു പെട്രോമാക്സ് ഉണ്ടെങ്കില്‍ ........

എഷ്ക്ഴൂസ് മീ പ്ലീസ്

2008-07-02T12:22:00.004+04:00

ജോജ്വൊരു കാര്യം പറഞ്ഞു.
അവനൊരു മൊയലിനെ കിട്ടീത്രേ അയ്ന് മൂന്നു കൊമ്പാത്രേ....

സംഗതി ഞാനും കണ്ടതാണല്ലോ,ഞാമ്പറഞ്ഞു കൂട്ടരേ അയ്ന് മൂന്നു കൊമ്പല്ല ഒരു രണ്ടു രണ്ടര കൊമ്പൊക്ക്യേ ഉള്ളൂന്ന്.

അപ്പൊ ദേ അവന്‍ പറയ്ണു അല്ല അയ്ന് മൂന്നു കൊമ്പും തെകച്ച് ണ്ടാര്‍ന്നൂന്ന്,
പിന്നെ പറേണൂ മൂന്നു കൊമ്പുള്ള മൊയലല്ല മൂന്നു മൊയലുള്ള കൊമ്പാണെന്ന്.

ഇതെന്തൂട്ടാണ്......ഇദെവടത്തെ ന്യായാണ്? കൂട്ടരേ ങ്ങള് നോക്കീട്ട് പറയിന്‍ ആര്ടെ കൂട്ടത്തിലാ ന്യായംന്ന്.

ഇവനെ ഞാനിന്ന്.........

യെ ന്റെ ബ്ലൊഗരി പരമ്പര ദൈവങ്ങളേ.......
ന്റെ മൂന്നാം മൂര്‍ത്തീ......
ആ തറ സാമീ.................
ന്നെ ക്കാത്തോളണേ..........

ഓതിരം കടകം മറുകടകം,
വലത്തു മാറി എടത്തുമാറി,കട്ടേ പ്പളുങ്ങി
ഞെരിയാണീന്നെടുത്തു കോന്തല മടക്കിക്കെട്ടി,

ജ്വാജൂ ഒരുങ്ങ്യോ....?

ദേ ഒരു കാര്യം പറഞ്ഞേയ്ക്കാം ഞാന്‍ പറഞ്ഞ രണ്ടു രണ്ടരക്കൊമ്പെന്നുവച്ചാല്‍ അതു മൂന്നുകൊമ്പും അതിനേക്കാള്‍ കൂടുതലും വേണമെങ്കില്‍ കുറവും വരാം.ഗണിതം നിശ്ശം വേണം.ആദ്യം അതു മൂന്നു കൊമ്പാവുന്നതെങ്ങനേന്നു കണ്ടോളു.എഷ്ക്ഴൂസ് മീ പ്ലീസ് ലിസണ്‍ ബിലൊ.

രണ്ടു രണ്ടര കൊമ്പ് എന്നു വച്ചാല്‍ രണ്ട്+രണ്ട് അരക്കൊമ്പ് = മൂന്നു കൊമ്പ്. ക്ലിയര്‍.... എനി ഡൗട്ട്?

എന്നാ പിന്നെ മലയാളത്തിലു പറയാം.

സീ....
കുട്ട്യേയ്. 2+1/2+1/2=?

2=2
1/2+1/2=1.

ആയതുകൊണ്ട് രണ്ട് രണ്ടര = മൂന്ന് പുരിഞ്ചിതാ......

എന്താണു വിശ്വാസം

2008-07-01T09:45:00.001+04:00

എന്താണു വിശ്വാസം
അറിഞ്ഞതിലുള്ള ഉറപ്പുതന്നെയല്ലേ
വിശ്വാസിക്ക് സംശയമുണ്ടാകുമോ?

ഇല്ലെങ്കില്‍,
സംശയമില്ലാത്തവന് ആകുലതയെന്തിന്?

ഉണ്ടെങ്കില്‍,
വിശ്വാസം എന്ന വാക്കിന്
ആ വാക്കുദ്ധേശിക്കുന്ന അര്‍ത്ഥം തന്നെയല്ലേ,
എന്നൊരു സംശയം.

അടയാളങ്ങളെടുത്തു കളഞ്ഞാല്‍
അപ്രസ്ക്തമാവുന്നതാണു വിശ്വാസമെങ്കില്‍
തുമ്മിയാല്‍ തെറിക്കുന്ന മൂക്കും
അതും തമ്മിലെന്തു വിത്യാസം?

മറ്റുള്ളതെല്ലാം കരിഞ്ഞ ചാരത്തിലേ
വിശ്വാസത്തിനു വേരു പിടിക്കുള്ളൂവെങ്കില്‍
മറ്റുള്ളതിന്റെ ചോരയിലേ
അതു വാടാതിരിക്കൂവെങ്കില്‍
അതു നടാതിരിക്കുന്നതു തന്നെയല്ലേ നല്ലത്?

ഇതിന്റെ വേരുകള്‍ ഇവിടെനിന്നും.

ഇടയിലെരിയുന്ന കനലുകള്‍.

2008-06-30T07:20:00.000+04:00

ഒന്നുമില്ലെന്നു സമാധാനിക്കുമ്പോഴും
ഏതു കനലിന്റെ പൊട്ടലുകളാണുയരുന്നതുള്ളില്‍?
എത്ര വേനലുകളുണക്കിയെടുത്തവ,
എത്ര വര്‍ഷങ്ങളൊഴുക്കി ക്കളഞ്ഞവ!

എങ്കിലും ഏകാന്തതയുടെ
തണുത്ത നിമിഷങ്ങളില്‍
അവയിലൊരു കുഞ്ഞു കനല്‍ വീണു
തീ പടരുന്നു.

പിന്നെയും ബാക്കിയായ ചില ശേഷിപ്പുകളില്‍
പിറുപിറുത്തു കൊണ്ട് തീ പടരുന്നു.
ഉരുകാത്ത കട്ടിപ്പുറമ്പാളിക്കുള്ളിലായ്
വിങ്ങുന്ന ഹൃദയം തേങ്ങലൊതുക്കുന്നു.

മിഴിനീരിന്‍ പുഴയില്‍ നിമജ്ജനം കാത്ത്
ആ ശേഷിപ്പുകള്‍ മോക്ഷത്തിനായെന്റെ
നിഴലിന്റെ കൂടേ നടക്കുന്നു.

അഭിനവ സ്മാര്‍ത്തവിചാരം

2008-06-26T10:50:00.003+04:00

കല്ലിന്മേല്‍ കല്ലു ശേഷിക്കാതെ കുളം കോരിക്കളഞ്ഞ കുറിയേടത്തു മന മണ്മറഞ്ഞു.പക്ഷേ ചരിത്രത്തില്‍ താത്രിയുടെ,സ്വന്തം പിതാവു മുതല്‍ കാവുങ്ങലെ കീചകവേഷക്കാ‍രന്‍ തുടങ്ങി സ്മാര്‍ത്ത വിചാരമവസാനിപ്പിക്കാന്‍ ഹേതു വായെന്നു കരുതുന്ന അംഗുലീയത്തിന്റെ കഥകള്‍ക്കുവരെ പുതു കിളിര്‍പ്പുകള്‍ പൊടിക്കുകയാണ്.താത്രിയെ അവസാനം മദ്രാസിലുള്ള ക്രൈസ്തവവിശ്വാസിയായൊരു വ്യവസായിയോ മറ്റോകൊണ്ടു പോയി അവരുടെ തലമുറ ഇപ്പൊഴും അന്തസ്സായി ജീവിക്കുന്നു എന്നൊക്കെയാണു തുടര്‍കഥകള്‍.താത്രിയെ പ്രാപിക്കാന്‍ അരങ്ങില്‍ നിന്ന് വേഷത്തോടെ കുളക്കടവില്‍ വന്നത് അരങ്ങിലെ വേഷങ്ങളുടെ തമ്പുരാനായിരുന്ന പ്രമുഖനയിരുന്നു.അതായിരുന്നു കുറിയേടത്തു മന സാവിത്രി അന്തര്‍ജ്ജനം എന്ന താത്രി.

അഭിനവതാത്രിമാര്‍ക്ക് ഇല്ലാത്തതും അതാണ്.
കേവലം കാമപൂരണത്തിന് നട്ടുച്ചയോ നടു റോഡെന്നോ ഇണയാരെന്നോ എത്തരക്കാരനെന്നോ പ്രശ്നമല്ല.അടിസ്ഥാനപരാമയ പ്രശ്നം ഒന്നു മാത്രം ലൈംഗിക ചോദനാ ശമനം.അത് ഏത് ജീവിക്കും പോലെ മനുഷ്യനും ബാധകമെന്നിരിക്കിലും,മറ്റുജീവികളുടെ ചുറ്റുപാടില്‍ നിന്നു വ്യത്യസ്ഥമായ,സൃഷ്ടിച്ചെടുത്തൊരു സാമൂഹ്യ ചുറ്റുപാടില്‍ ജീവിക്കുന്ന മനുഷ്യരില്‍ ഉണ്ടാക്കുന്ന പ്രതികരണത്തെക്കുറിച്ച് അല്പമെങ്കിലും ബോധവതിയായിരുന്നെങ്കില്‍ തിരുവസ്ത്രമെന്ന പെരില്‍ അവരണിഞ്ഞിരുന്ന ആ ഉടുതുണിയെങ്കിലും അവര്‍ ‍മാറ്റിവയ്ക്കുമായിരുന്നില്ലേ?.കാമപൂരണത്തിനപ്പുറം അതു മറ്റുള്ളവരെക്കൂടി പ്രദര്‍ശിപ്പിച്ചുകിട്ടുന്ന മനഃസുഖമോര്‍ത്തല്ലായിരുന്നെങ്കില്‍ അവര്‍ സമ്മതിക്കുമായിരുന്നോ അതിന്റെ വീഡിയോ പകര്‍ത്തുവാന്‍?തെരഞ്ഞെടുത്ത ഇണ അവന്‍ എത്ര വിശ്വസ്ഥനാണെങ്കിലും കുറച്ചു കാലം മുമ്പു നടന്ന കോളെജ് വിദ്യാര്‍ത്ഥിനികളുടെ ഫോട്ടോകളുണ്ടാക്കിയ പ്രശ്നങ്ങളെക്കുറിച്ചും മുറിവുകളെക്കുറിച്ചും
അവര്‍ എപ്പോഴെങ്കിലും അറിഞ്ഞിരിക്കില്ലെന്നാണോ? അത്രമാത്രം നിഷ്കളങ്കമായ ലൈംഗികതയാണോ അവര്‍ ആ വേഴ്ചയിലൂടെ ഉദ്ധേശിച്ചരിക്കുക?.ലൈംഗീക പീഡനക്കേസുകള്‍ ഫ്ലാഷ്ന്യൂസായും വെണ്ടക്കായായും കൂട്ടിക്കൊടുത്ത് കാശാക്കിമാറ്റുന്ന മാധ്യമ പിമ്പുമാരെ ഓര്‍ത്തില്ലെങ്കിലും സിറ്റികളിലെ വീടുകളുടെ കുളിമുറിയും അടുക്കളയും ബെഡ്റൂമും മൊബൈലില്‍ വീഡിയോ ക്ലിപ്പിങ്ങുകളായി പറന്നു നടക്കുന്ന വിവരം പോലും ഒന്ന് ഓര്‍ക്കാതിരിക്കാന്‍ വിധം ബോധശൂന്യയായിരുന്നോ അവര്?.
സമരമായിരുന്നിരിരിക്കാം അടിച്ചുറപ്പിച്ച ചട്ടക്കൂടുകള്‍ക്കെതിരെ,അല്ലെങ്കില്‍ മഗ്ദലനക്കാരി മറിയയ്ക്ക് മാപ്പു കൊടുത്ത ദൈവപുത്രരാണിപ്പൊഴും ലോകത്ത് എന്നു കരുതിയിരിക്കാം.

താത്രിക്ക് ഒരിടത്തു നിന്നും കിട്ടാതിരുന്ന ചിലത് അവര്‍ക്കു കിട്ടുന്നുണ്ട്.അവരെ സ്മാര്‍ത്തന്‍ കേവലം സാധനമാക്കി വിസ്തരിക്കില്ല,നീളന്‍ വേഷങ്ങള്‍ അഴിച്ചു വയ്ക്കപ്പെട്ട് ആരും ജാതിയില്‍ താഴ്ന്നവനാകേണ്ടി വരില്ല,പടിയടച്ചു പിണ്ഡം വെച്ച് തറവാടു കുളം കോരി തേവിടിശ്ശിയായി പ്രഖ്യാപിച്ച് നാടു കടത്തില്ല.
എല്ലാറ്റിനുമുപരിയായി അവര്‍ക്കു ചില ശക്തമായ പിന്തുണകള്‍ പോലും ലഭിച്ചേയ്ക്കാമായിരുന്നു.എന്നിട്ടും അവര്‍ ഒളിച്ചോടുക
അല്ലെങ്കില്‍ ആത്മഹത്യ ചെയ്യേണ്ടി വരിക എന്ന അവസ്ഥയിലേക്ക് കാര്യങ്ങളെത്തുമ്പോള്‍ ചിന്തിക്കേണ്ടിയിരിക്കുന്നു അനവസരത്തിലെത്തുന്ന ലൈംഗീകതയും തുറന്ന ലൈംഗികതയുമൊക്കെ എത്രമാത്രം പ്രാവൃത്തികമാണ് ഇന്നത്തെ സമൂഹത്തിലെന്ന്.

കൊരച്ചു നടക്കുന്ന പേ പിടിച്ച നായ്ക്കളോട്..

2008-06-24T20:24:00.007+04:00

പ്രിയപ്പെട്ട എല്ലാ വായനക്കാരോടും

ക്ഷമിയ്ക്കുക പരുഷവാക്കുകള്‍ക്ക്.
വെറും രോഷത്തില്‍ നിന്നുമുയര്‍ന്ന,ചങ്ങലയ്ക്കിട്ടൊരു നാടന്‍ നായയുടെ കൊരയ്ക്കലായി കണ്ടാല്‍ മതി.
അഭിപ്രായം പറയാതെ പോവാം,കൊള്ളരുതാത്തവനെന്നു വിധിയ്ക്കാം,എങ്കിലുംഅനേകം ദരിദ്രവിദ്യാര്‍ത്ഥികള്‍ക്കു ദാനം ചെയ്യാനെങ്കിലും കഴിയുമായിരുന്ന പാഠ പുസ്തകങ്ങള്‍ കത്തിച്ചു കളഞ്ഞ പട്ടികള്‍ നടു റോട്ടില്‍ ഞെളിഞ്ഞു നടക്കുമ്പോള്‍ പോസ്റ്റാതിരിക്കാനാവുന്നില്ല.

കൊള്ളില്ല എന്നറിഞ്ഞിട്ടും തോന്നുന്നെങ്കില്‍ മാത്രം വായിച്ചാല്‍ മതി.
കവിതയെന്ന ലേബല്‍ കൊടുക്കുന്നില്ല.

നായ്ക്കള്‍ക്കു പോലും അപമാനമണ് പിന്നെന്തു പേരു കൊടുക്കാന്‍.

നല്ലതു നായക്കു ചേരില്ല എങ്കിലും
അമൃതു വിളമ്പിയതഴുക്കില്‍ കളഞ്ഞിട്ടു
അമേധ്യം തിരയുന്ന നായിന്റെ മക്കളേ

പുസ്തകം ചുട്ടോരു ചാരത്തില്‍ നിങ്ങടെ
തലമുറ മുഴവനും പെറ്റു പെരുകട്ടെ

അലയുവാന്‍ നിങ്ങള്‍ക്കു തെരുവൊരുക്കീടുന്നു
അണയുവാന്‍ ചേരിചെളിക്കുണ്ടൊരുക്കുന്നു

നിങ്ങളെത്തമ്മില്‍ക്കടിപിടികൂടിക്കും
നിങ്ങടെ നേതാക്കള്‍-
വെള്ളക്കദറിട്ടു നായാടി നേടിയ
ചോരപ്പണം കൊണ്ടുമാളിക കെട്ടിയോര്‍.

അറിയില്ല നിങ്ങള്‍ കടിപിടിയൊച്ചയില്‍
കൂട്ടത്തിലൊരുവന്റെ പൊലിയുന്ന പ്രാണന്‍
ഉച്ചത്തിലുയരുന്ന രോദനം,ഒഴുകിപ്പടരുന്ന ചോര
കണ്ണീരില്‍ മുങ്ങി മരിക്കുമുടയവര്‍.

അതുവിറ്റ കാശിന്നധികാരപീഠത്തില്‍
ആസനമൂന്നിയിരിക്കുന്ന നേതാവിന്‍
ആക്രാന്തം,സംതൃപ്തി ആത്മസംതൃപ്തി.

വിദ്യയുപേക്ഷിക്ക മുദ്രാവാക്യങ്ങള്‍തന്‍
ഹിസ്റ്റീരിയതരും ലഹരിയില്‍ മുങ്ങുക.

അറിയില്ല നിങ്ങള്‍ക്ക്.
ഏടുകള്‍ കീറിയ,വക്കുചുരുണ്ടൊരു
മങ്ങിയ മഞ്ഞനിറം പൂണ്ടൊരാരാന്റെ-
പുസ്തകമതു പോലും വാങ്ങുവാനാവാതെ
വലയുന്നൊരുവനെ.

അറിയുന്നതെങ്ങനെ കണ്ണുകള്‍ കെട്ടുന്നു
കെട്ട ന്യായങ്ങള്‍തന്‍ നാറിയ ശീലയാല്‍
കുത്തി നിറയ്ക്കുന്നു മുദ്രാവാക്യങ്ങളാം
തീട്ടം-
നിങ്ങടെ വായിലീ നേതാക്കള്‍.

എങ്കിലും അറിയാതെ പോകുവതെങ്ങനെ?
നിങ്ങള്‍
വിശപ്പിന്‍ വിളിയെങ്ങാനൊരുനാളില്‍
കേള്‍ക്കുകില്‍?

എനിക്കു വേണ്ടിമാത്രം പെയ്ത മഴയ്ക്ക്.

2008-06-23T18:00:00.000+04:00

എനിക്കു വേണ്ടിമാത്രം അന്നു പെയ്തൊഴിഞ്ഞൊരു മഴയ്ക്ക്,ഇത് സമര്‍പ്പണം.

പഴി പറയാമോ ചാവേറെന്ന്?

2008-06-15T13:15:00.001+04:00

നിറഞ്ഞ കാമ്പ്
ചുരണ്ടിമാറ്റി
ഉറച്ച തോടില്‍
നിറച്ചമര്‍ത്തി
അടിച്ചുറപ്പിച്ച്
വരിഞ്ഞു കെട്ടിയത്
പാത(തി)യില്‍ വച്ചു
പൊട്ടിത്തെറിച്ചാല്‍
പഴി പറയാമോ
ചാവേറെന്ന്?

സന്ധ്യക്ക് ചിലയിടങ്ങളില്‍

2008-06-12T09:37:00.000+04:00

ആരെടീ അവടെ വെളക്ക് കത്തിച്ചെ?

അതിനെന്താ ഉമ്മറത്തല്ലേ

ന്നോടൊന്നു ചോയ്ച്ച് ട്ടാവാര്‍ന്നില്യേന്ന്

പിന്നേ ഇര്ട്ടാവുമ്പോ ചൊയ്ച്ചിട്ടു വേണല്ലോ

ന്റകത്തൊരു വെളിച്ചല്യ പിന്ന്യാപ്പൊ മ്മറത്ത്

അവടൊരെണ്ണം കത്തിച്ച് വെച്ചൂടെ

ആരാപ്പതൊന്ന് കത്തിക്കാന്‍ ഇബടെ?

കൂട്ട്യാറ്റ്ല്യാച്ചാല്‍ ആര്നേങ്കില്വൊന്നാ വിളിച്ചൂടെ?

ഞാന് പ്പോ വിളിച്ച് ട്ട് വേണോ വന്നങ്ക് ട് കത്തിക്ക്വല്ലേ വേണ്ടേ? അല്ലാച്ചാല്‍ ഉമ്മറത്തേങ്കുട്യങ്കട് കെട്ത്തിക്കോളൂ.

കാര്‍ന്നോരേ പണ്‍ടത്തെ കാലോന്ന്വല്ലപ്പൊ കല്പ്പന കാര്യം നടത്ത്യേ കാലം, അതു പണ്ട്.

വെട്ടം വേണ്ടാച്ചാല്‍ കണ്ണടച്ചിര്ന്നോളൂ.

കളവൊരു കുറ്റമല്ല. (അഗ്രീശ്വരന്മരേ കാത്തോളണേ).

2008-06-11T09:51:00.000+04:00

കളവൊരു കുറ്റമല്ല.ഇവിടെ

ഒരാനക്കാരന്റെ മാത്രം,ഇനി പിറകേ വരുന്നവരുടേയും.

2008-06-10T22:30:00.001+04:00

ഞാനാ സുപ്രമണ്യന്‍
ഊരമന വിനയന്‍ ചവിട്ടിക്കൊന്നോന്‍
മനസ്സിലാവില്യ
ഹഹ യ്ക്കറിയാം മനസ്സിലാവില്യ
യ്യ് ന്നലെ മൊബെയല് ഫോണ് ല് കണ്ട
ആനേന്റെ പാപ്പാന്‍.....

നെലത്ത് ട്ട് കുത്തണ കണ്ടില്യേ
കാലോണ്ട് തട്ടണ കണ്ടില്യേ
കൊമ്പില് കോരണ കണ്ടില്യേ
തുമ്പ്യോണ്ട് എറിയണ കണ്ടില്യേ

മനം പെരട്ടുണൂന്ന് പറഞ്ഞ് ട്ട്
വെള്ളം വീഴ്ത്താതെ മോന്തീട്ട്
കണ്ണൊന്നു തിരുമ്മീട്ട്
യ്യ് ചോയ്ച്ചില്യേ?

എന്തിനാ അയ്യാളതിന്റെ മുന്നില്‍ക്ക് ചാട്യേ
പ്രാന്തെളകി നിക്കണേന്റെ കൊമ്പിന്റെ ചോട്ടില്ക്ക്
വിഢ്ഢി.......

ഇനിയ്ക്കൊന്നും പറയാല്യ
ന്നാലും,അഞ്ചു മിനിട്ടോണ്ട്
അമ്പതുര്‍പ്യയ്ക്ക് ന്റെ ചാവുകാഴ്ച
നാടുമുഴ്വോനും കാണണുണ്ട്
കണ്ടോരൊക്കെ കഷ്ടം വയ്ക്കണുണ്ട്.
കാണാത്തോര്ക്കൊക്കെ കാട്ടിക്കൊടുക്കണുണ്ട്

ചോരപ്പൂ വെതറി
തുറിച്ച കണ്ണുംകൊണ്ട്
ചിതറി ത്തെറിച്ച മെയ്യും കൊണ്ട്
പുത്യേ കാഴ്ചകള് വെര്വാണ്

വഴീല്ട്ട് വെട്ടണത്,
തലയറത്ത് മാറ്റണത്
പടക്കെറിഞ്ഞ് കൊല്ലണത്
തെളച്ച റോട്ടില് ചോരവാര്‍ന്ന്
വെള്ളം ചോയ്ച്ച് പെടയണത്

ഇവിടെ വച്ച് ഇത് എത്രവേണമെങ്കിലും പിരിച്ചു കൊണ്ടു പോകാവുന്ന ഒരു കയറായിമാറുന്നു.
അതൊടുവില്‍ നമ്മളെത്തന്നെ ചുറ്റിവരിയുന്നു.

ചോരയില്‍ മുക്കിയ ഒരിഴ ഇങ്ങനെ ചേര്‍ക്കാം
കൊല്ലം തീവണ്‍യാപ്പീസിനു തൊട്ട്
അറ്റു പോയ വലതുകരവുമായി
തീവണ്ടിയെഞ്ചിനടിയില്‍
അല്പം കരുണതേടി
ഒരു പെണ്‍കുട്ടി.

മനസ്സാക്ഷിയെന്നേമരിച്ച ജനക്കൂട്ടത്തില്‍ നിന്നും
അമ്മയോ,മകളോ,പെങ്ങളോ,കാമുകിയോ,ഭാര്യയോ ഉള്ള
ഒരാളുണ്ടായി വരാന്‍ അരമണിക്കൂറെടുത്തു.
അവള്‍ക്കു ജീവന്‍കിട്ടി
ഒരു ജീവിതം പോയെങ്കിലും.

ഇനി വരും കാഴ്ചകള്‍ ഇമെയിലില്‍
ഫോട്ടോയായി,വീഡിയോ ക്ലിപ്പായി
കണ്ടു മറക്കുക കണ്ടു മറക്കുക
പുതിയ കാഴ്ചയ്ക്കു കാത്തിരിക്കുക.

ഒടഞ്ഞരഞ്ഞ പുത്യേ കാഴ്ചോളടെടയ്ക്ക്

ആര്ക്കും വേണ്ടാത്തൊര് കാഴ്ചേണ്ട്
ആനക്കാരന്റെ പെര
ആനക്കാരന്റെ പെണ്ണ്
തള്ളാളര്‍ത്തിക്കുട്ട്യോള്

ആലോയ്ക്കുമ്പോ തോന്ന്വാണ്
എന്തിനാ ഞാനയ്ന്റെ മുന്ന് ല് ചാട്യേ
നാലഞ്ചെണ്ണം അരഞ്ഞൂച്ചാല്‍ ങ്ങക്കും കോളല്ലേ
അമ്പതുര്‍പ്യേം കൂടി കൂട്ടി വാങ്ങാര്ന്നു
അയ്യഞ്ചു മിന്ട്ടും കൂടി കണ്ണ് നെറെ കാണാര്‍ന്നു
ചാവ്,അലമുറ....

ന്നാലും സാരല്യ
ഒരാനക്കാരന്റെ കുടുമ്മല്ലേ
ഒരാനക്കാരന്റെ മാത്രം.

ഒന്നുമില്ലെന്നേ

2008-05-28T14:16:00.000+04:00

ഒന്നുമില്ലെന്നേ ഇതൊരു കമന്റായി ഒരു ബ്ലോഗിലിട്ടപ്പോള്‍ അവിടം നശിപ്പിച്ചേ അടങ്ങൂന്നൊരു അനോണി എന്നു വച്ച് എന്റെ അഭിപ്രായത്തെ എനിക്കു ഞെക്കിക്കൊല്ലാനാകുമോ?

അമൃതാനന്ദമയിയേയും,ശ്രീരവിശങ്കറിനേയും കുറിച്ചന്വേഷിക്കുന്നില്ല!ജനസേവ ശിശു ഭവനെക്കുറിച്ചു പോലും ആക്ഷേപവും അന്വേഷണവും നടത്താമെങ്കില്‍ എന്താണു അവിടെ മാത്രം?അവരുടെ കണക്കുകളൊക്കെ കിറു കൃത്യമാണോ?.അതോ മന്ത്രി‍മാരുടെയൊക്കെ മക്കളും പരിവാരങ്ങളും അവരുടെയൊക്കെ സ്ഥാപനങ്ങളില്‍ പഠിക്കുന്നതുകൊണ്ടോ? രാജ്യ സേവനമെന്ന പേരില്‍ കുറേ ഖദറിട്ട കള്ളപ്പരിഷകളാണു കൂട്ടു നില്‍ക്കുന്നത് ജനത്തെ പറ്റിയ്ക്കാന്‍.യഥാര്‍ത്ഥത്തില്‍ ഇത്രയും ജനത്തെ കപടവിശ്വാസികളാക്കിത്തീര്‍ത്തതിന് സകല രാഷ്ട്രീയ ക്കാരനും പങ്കുണ്ട്.യഥാസമയം കണക്കുകള്‍ നോക്കുകയും അവലോകനങ്ങള്‍ നടത്താതെയും വിളിക്കുന്നതിനേക്കാള്‍ മുന്നേ ആമ്പുലന്‍സുദ്ഘാടനത്തിനും കൊടിയേറ്റത്തിന്നും വോട്ടു ബാങ്കില്‍ കണ്ണു നട്ടുനടത്തിയ പ്രകടനങ്ങള്‍ സാധാരണ ജനത്തിനെ കബളിപ്പിക്കാന്‍ വേണ്ടിയായിരുന്നില്ലേ? "മുമ്പേ ഗമിച്ചീടിന ഗോവു തന്റെ പിമ്പേ ഗമിക്കും ബഹു ഗോക്കളെല്ലാം" എന്നു പറഞ്ഞ പോലെ ജനം കബളിപ്പിക്കപ്പെടുകയായിരുന്നു. ഇപ്പോഴും അതു തുടരുന്നു ഇവര്‍ക്കെതിരെ ഉയര്‍ന്ന ആരോപണങ്ങളില്‍ അന്വേഷണം നടത്താതെ ഉരുണ്ടു കളിക്കുകയാണ് ഭരണകര്‍ത്താക്കള്‍,വൈകുന്തോറും ജനം വിശ്വസിക്കുന്നതോ ഓ അവര്‍ നല്ലതായിരിക്കും എന്ന്.ഡിഫി കാണിക്കുന്ന അക്രമങ്ങള്‍ മണ്ടത്തരം തന്നെയാണ് അവര്‍ക്കു തന്നെ അറിയുമോ എന്തോ അവരുടെ എത്രനേതാക്കന്മാര്‍ക്ക് രക്ഷപ്പെടാനുള്ള പുകമറയാണ്
അവരൊരുക്കിക്കൊടുക്കുന്നതെന്ന്.യുവത്വത്തെ ബലികൊടുത്ത് രാഷ്ട്രീയത്തിലെ കടല്‍ ക്കിഴവന്മാര്‍ ഭരണസിംഹാസനത്തില്‍ അള്ളിപ്പിടിച്ചിരിക്കുകയാണ്.

ഓടോ;
1'സുധാകരന്റെ വചനസുധ ഇപ്പോള്‍ കേള്‍ക്കാനില്ല വായ്ക്കുരിപ്പു പിടിച്ചോ കോച്ചുവാതം പിടിച്ചോ എന്തോ.

2,'ദേ പാണക്കാട്' എന്നൊരച്ഛനും മോനും ഇത്തിരിയുറക്കെ പറഞ്ഞതിന് ഒരുകൂട്ടരിതേ പാണക്കാട്ടെ തറവാട്ടു മുറ്റത്ത് പ്രായ്ശ്ചിത്ത ശയനപ്രദക്ഷിണം.കാന്തപുരം എന്നോ മറ്റോ അബദ്ധവശാല്‍ പറഞ്ഞിരുന്നെങ്കില്‍ എന്തായേനെ സ്ഥിതി!!

യുക്തിഭീകരവാദം.

2008-05-22T10:36:00.001+04:00

ഒരു ചര്‍ച്ച കണ്ടു ഇന്നലെ ഏഷ്യാനെറ്റില്‍ വിശ്വാസികളും,യുക്തിവാദികളുമുണ്ടായിരുന്നു.

വി:എന്തു കൊണ്ട് സര്‍ക്കാര്‍ തുടക്കത്തിലേ അന്വേഷിക്കുന്നില്ല?

യു:രാഷ്ട്രീയക്കരനെ പറയരുത് അവനല്ല കുറ്റക്കാരന്‍.

വി:ശബരിമലയിലെ കോടിക്കണക്കിനു സ്വത്ത് പൊതു ഖജനാവിന്,
വിശ്വാസം,അമ്പലം പാടില്ല രണ്ടും ഒരേനാവുകൊണ്ട്
രാഷ്ട്രീയക്കാരനല്ലേ പറയുന്നത്?

യു:മകര വിളക്ക് സത്യമാണോ? അതു മനുഷ്യന്‍ കാട്ടുന്നതല്ലേ

വി:അതല്ല ചര്‍ച്ചാ വിഷയം

യു:അല്ല അതു ത.....ട്ടി..പ്...പാ (മൈക്കു തട്ടിപ്പറിയ്ക്കുന്നു വികാരക്ഷോഭത്താല്‍ തുള്ളുന്ന യുക്തി വാക്കുകള്‍ അപൂര്‍ണ്ണം.)

വി:ഇങ്ങട് താടോ മൈക്ക്, പോ അവിടന്ന്

യു:എന്താ തനിക്കെന്നെ തല്ലണോ?

വി:ന്നാ പിടിച്ചോ. പിടിച്ചൊരു തള്ള്.

ഇത്രയും യുക്തി ഹീനരായ യുക്തിവാദികളും,ഭീകരവാദികളും തമ്മിലുള്ള നേരിയ വ്യതാസം എന്തെങ്കിലു മുണ്ടോ എന്നാണു ഞാന്‍ ആലോചിക്കുന്നത്.യുക്തി എപ്പോഴും മികച്ചു നില്‍ക്കുമെന്നായിരുന്നു എന്റെ ധാരണ
കാരണം വിശ്വാസം പോലെ അതു വരുന്നത് ഹൃദയത്തില്‍ നിന്നല്ല തലച്ചോറില്‍ നിന്നാണല്ലോ.

കിട്ടാവുന്നത്

2008-05-12T13:07:00.000+04:00

കാലത്തിന്‍ കനലൂതി
പ്പഴുപ്പിച്ച പ്രാണനാല്‍-

ജീവിതത്തിന്‍ ഉരുക്കച്ചുകൂടത്തില്‍
പണിതെടുത്തത് ഒരൊറ്റ നാണയം

രണ്ടു മുദ്രകളിലൊതുങ്ങുന്ന
മൂല്യം

വിഡ്ഡി,സ്വാര്‍ത്ഥന്‍.

കൊടുത്തൊടുങ്ങിയ വിഢ്ഢിയും
പടുത്ത പടവിന്നുള്ളില്‍ പെട്ട സ്വാര്‍ത്ഥനും.

മേടകളുയരണം പാടത്തിന്‍ നെഞ്ഞത്ത്

2008-04-30T20:57:00.001+04:00

മേടകളുയരണം പാടത്തിന്‍ നെഞ്ഞത്ത്
കുറ്റിയും കല്ലും ചുമന്നു മാറ്റീട്ടൊരു
കുന്നു കിളച്ചിട്ടു പാടമൊരുക്കിയ
പൂര്‍വ്വികരൊന്നും വരില്ലിനി നിശ്ചയം.

കുന്നു നിരത്തുന്ന യന്ത്രങ്ങളനവധി
കുഴികള്‍ നികത്തുന്ന യന്ത്രങ്ങളനവധി
എവിടെയും കേട്ടില്ല,എവിടെയും കണ്ടില്ല
യന്ത്രക്കരങ്ങളാല്‍ തീര്‍ത്തൊരു പാടത്തെ!.

നിറയാത്ത പെരുവയറുമായ് വരും ടിപ്പറില്‍
നിറയുന്നിതസ്ഥികള്‍,ചെന്നിറമ്മുറ്റുന്നമാംസവും.
ആര്‍ക്കുമേ വേണ്ടാത്ത ചവറു നിറയ്ക്കുവാന്‍
മാറിടം കാട്ടി ക്കിടക്കുന്നു പാടവും.

മാവും മരങ്ങളും വെട്ടിമാറ്റീട്ടവിടെ
ഓര്ക്കിഡിന്‍ തോട്ടങ്ങളാക്കി മാറ്റീടണം.
കൈയ്യാലൊരു പിടിമണ്ണു മാറ്റീട്ടൊരു
മാന്തൈയ്യു വയ്ക്കരുത് മാനം നശിക്കില്ലേ.

പാടമില്ലെങ്കിലും നാടുനന്നാവണം.
നാട്ടുവഴി വേണ്ട? എക്സ്പ്രസ്സു വേ മതി.
പ്ലാസ്റ്റിക്കു പാക്കറ്റിലരിയുണ്ട്,കോഴീണ്ട്
മിസ്കോളിലെത്തുന്ന ബ്രാന്റുണ്ട്,കോളയും.

വില്‍ക്കണം കേരളം കാല്പണം പൊന്നിന്.
ഫ്ലാറ്റുകള്‍ പൊന്തട്ടെ.
പ്ലാറ്റുഫോം സ്വര്‍ഗ്ഗത്തില്‍ പാഴ്ക്കിനാക്കള്‍ കാണും
വേപഥുവില്ലാത്ത വര്‍ഗ്ഗവും പെരുകട്ടെ.

കുത്തിച്ചുട്ടതാണ്

2008-04-16T10:58:00.000+04:00

നിലം പറ്റെ വീശിയൊരുകാറ്റിലാണ്
കവിതയങ്ങനെ ചാഞ്ഞുവീണു പോയത്.

കുത്തനെനിന്നു പെയ്തൊരുമഴയിലാണ്
കതിരിലെല്ലാം കണ്ണീരു നിറഞ്ഞത്

വാരിപ്പുതച്ച വെണ്മഞ്ഞിനുടയാടയിലാണ്
നെറ്റിയില്‍ നിന്നു രക്താര്‍ച്ചന ചെയ്തത്

വിറച്ചു കൂനിയിരുന്ന ഭ്രാന്തമൗനത്തിനൊടുവിലാണ്
കുപ്പിവളകളെല്ലാം ആരോ ഉടച്ചുകളഞ്ഞത്

ഇടിഞ്ഞമരുന്ന കനലില്‍ സതിചെയ്തതല്ല,
കൂര്‍പ്പിച്ച പച്ചമുളന്തണ്ടുകൊണ്ട്
കുത്തിച്ചുട്ടതാണ് അവളെ.

എങ്കിലുമൊരു കുല കണിക്കൊന്നപ്പൂവിതാ.....

2008-04-13T23:40:00.000+04:00

കേള്‍ക്കുന്നോ വിഷുപ്പക്ഷിയുച്ചത്തില്‍ ഘോഷിക്കുമാ
'വിത്തും കൈക്കോട്ടു'മെന്ന പഴയ ശ്രുതി വീണ്ടും!
മനസ്സിന്നുള്ളിലേതോ കൊന്നയില്‍ വീണ്ടു മിതാ
പൊന്നലുക്കിന്റെ കൂട്ടം വിടര്‍ന്നു നിറയുന്നു.

അവധിക്കാലത്തിന്റെ യാഘോഷത്തിമിര്‍പ്പിനു
മാറ്റുകൂട്ടുവാനായിട്ടെത്തിടും വിഷുക്കാലം.
കണിയും കൈനീട്ടവും സ്വപ്നംകണ്ടുറങ്ങുമ്പോള്‍
വിളിക്കും അമ്മ വരൂ,കണ്ണുകള്‍ തുറക്കാതെ.

ഓട്ടുരുളിയിലൊരു കണ്ണന്റെ പ്രതിമയും,
മുന്നലായൊളിചിന്നും കൊന്നപ്പൂപുഞ്ചിരിയും,
തെളിഞ്ഞു കത്തുന്നൊരു നിറദീപവും പിന്നെ,
കണിവെള്ളരി,ചക്ക,കുല മാങ്ങയും ചേര്‍ന്നു
നിറയും മനം വിഷുക്കണിതന്‍ സമൃദ്ധിയില്‍.
അണയും പുതു വര്‍ഷൈശ്വര്യവു മാവേശിച്ചു
കത്തുന്നൂ കമ്പിത്തിരി,മേശപ്പൂ,മത്താപ്പുകള്‍.

കനവില്‍ നിറഞ്ഞൊരാ കണിതന്‍ നിറ ഭംഗി,
കാഴ്ചയില്‍ നിറഞ്ഞൊരാ പൂത്തിരിത്തെളിച്ചങ്ങള്‍,
കാതില്‍ വന്നലച്ചൊരാ പടഹ ധ്വനികളു-
മെങ്ങുപോയ്....കാലത്തിന്റെ യങ്ങേകവാടത്തിങ്കല്‍
എന്നെയും പ്രതീക്ഷിച്ചു നില്‍ക്കുമോ ഒരു വേള?
ഇല്ലെന്നതറിഞ്ഞിട്ടും കനവിന്‍ വ്യാമോഹങ്ങള്‍!.

വാണിഭദ്ദുരകളാല്‍ മണലിലുയര്‍ന്നൊരീ-
ജ്യാമിതീ ഹര്‍മ്യങ്ങളില്‍ വരുമോ വിഷു?
ഇല്ല.വിഷമം വരാമൊരു വിഷു കൂടിയിന്നിതാ
വിടചൊല്ലുന്നൂവെന്നതോര്‍മ്മയില്‍ തെളിയുമ്പോള്‍.

എങ്കിലുമൊരു കുല കണിക്കൊന്നപ്പൂവിതാ
വെറുതേ തുടിക്കുമീ മനസ്സില്‍ വിടരുന്നൂ.

ഉരഞ്ഞു തീര്‍ന്നു പോകുന്നവയുടെ ഉള്ള്.

2008-04-07T10:16:00.000+04:00

ഉരഞ്ഞു തീര്‍ന്നു പോകുന്നവയുടെ ഉള്ളില്‍നിന്ന്
ഉയരുന്നശബ്ദങ്ങള്‍ രോദനങ്ങളുടേതു മാത്രമല്ല.

കടുപ്പംകൊണ്ട് തേഞ്ഞുപോവാന്‍ മടിയ്ക്കുന്ന
ചിലതില്‍ നിന്നും അമര്‍ത്തിയപല്ലിറുമ്മലുകള്‍. ‍

അറിയാത്ത ഇരുണ്ട മാളങ്ങളില്‍ നിന്നുമിടയ്ക്ക്
ഇളം ജീവന്റെ മിടിപ്പുള്ള സംഗീതം.

കല്ലിനുള്ളില്‍നിന്നും ചിലപ്പോഴൊക്കെ കാട്ടുതേന്മധുരം
കാറ്റില്‍,വെയില്‍ കാഞ്ഞ ചെങ്ങണപ്പുല്ലിന്‍ വിയര്‍പ്പുമണം.

വേട്ടയ്ക്കൊരുങ്ങി ദംഷ്ട്രയിലിറ്റുന്നവിഷവുമായ്
ഒരു കൈയ്യിലൊരു കുഞ്ഞുപൂവ്വുമായ്
അതെ അവള്‍ തന്നെ ആ തൊട്ടാവാടി.

നിറമാര്‍ന്ന പൂക്കളില്‍ നിന്നു വാര്‍ന്നത്
ജീവനെ ദ്രവിപ്പിച്ചു കളയുന്ന അമ്ലരസം.

എങ്കിലും,എല്ലാമങ്ങനെ തേഞ്ഞു തീരാന്‍ വഴിയില്ല
എല്ലാമങ്ങനെ ഇടിഞ്ഞു തൂര്‍ന്നു പോവില്ല.

തേഞ്ഞു തീരാത്ത ചില മൃദുത്വങ്ങളും,
ഇടിഞ്ഞു പോവാത്ത ചില ദാര്‍ഡ്ഡ്യങ്ങളും
ശേഷിക്കാതിരിക്കയോ?

ഗൂഗിളറുകൊലേ.....കൊല്ല്,കൊല്ല്.

2008-04-02T17:14:00.000+04:00

ഗൂഗിളറുകൊലേ.....കൊല്ല്,കൊല്ല്.

പ്രണയം/ജീവിതം.

2008-03-31T11:16:00.001+04:00

നേര്‍ത്ത ഹിമകണങ്ങളിറ്റു വീഴുന്ന
ഇളം വെയില്‍ പട്ടുതിളങ്ങുന്ന
നിഴലുകളുടെ കണ്ണുരുട്ടലില്ലാത്ത
നേരെ നിവര്‍ന്നുകിടക്കുന്ന
അനന്തമായൊരു വീഥി...
പ്രണയം।

വിങ്ങിനില്‍ക്കുന്ന സുഗന്ധത്തിലൂടെ
വാടാത്ത പൂക്കള്‍ വിരിച്ച പാതയിലൂടെ
ഹംസരഥത്തിലെ പട്ടുസിംഹാസനത്തില്‍
നാം...രണ്ടേ രണ്ടു പേര്‍।

...............................

വിയര്‍പ്പിന്‍ പുഴുക്കു ഗന്ധത്തിലൂടെ
സ്വപ്നങ്ങളുടെ,പാദം പൂണ്ടു പോകുന്ന ചാരത്തിലൂടെ
വിണ്ടടര്‍ന്ന പാതയിലെ ചരല്‍ മുനകളിലൂടെ
വേച്ചും വിറച്ചും നാം....ഒരു പാടു പേര്‍

മരവിച്ച വെള്ളപ്പുകയ്ക്കിടയിലൂടെ
ഉരുകുന്ന വെയിലൂര്‍ന്നു വീണു ചെമ്പിച്ച
ഇരുട്ടു ഭൂതങ്ങള്‍ ഒളിപാര്‍ത്തു നില്‍ക്കുന്ന
തിരിവൊന്നും മുന്നേ കാണുവാനാവാത്ത വീഥി...
ജീവിതം...

നിഴലില്ലാത്ത വെളിച്ചം

2008-03-24T15:39:00.000+04:00

അന്തിയ്ക്ക് ചെങ്കല്ലരച്ചു തേച്ച ചുമരില്‍
നിഴല്‍‍ നോക്കി ക്കളിച്ചതിന്
അച്ഛന്‍ തലമണ്ടയ്ക്കൊന്നു കിഴുക്കി।

നിഴലുകളാണു കുഴപ്പം,
നിഴലില്ലാത്തൊരു വിളക്കുവേണം

ചക്കപ്പശയിലുമി കുഴച്ച് എരിക്കിന്തണ്ടിലൊരു തിരി
കടലാവണക്കിന്‍‍ വിത്തുകോര്‍ത്ത് പച്ചീര്‍ക്കില്‍ പന്തം
കത്തും,പുകയുണ്ട് പക്ഷേ നീണ്ടൊരു നിഴലുണ്ട്-
നേരിയൊരു മണം കൂടിയുണ്ട്.

അന്ത്യാളങ്കാവില്‍,നൊട്ടന്റെ തോറ്റത്തിനൊപ്പമുറയുന്ന
കരിങ്കോലങ്ങളുടെ കൈപ്പന്തങ്ങള്‍ക്ക് തെളിച്ചമുണ്ട്
പക്ഷേ പിടിവിട്ടു ചാടുന്ന മരക്കാളയുടെ നിഴലുണ്ട്
മുടിയാട്ടമുലയ്ക്കുന്ന ഉടലുകളുടെ ഇളകുന്ന നിഴലുണ്ട്.

നിറങ്ങളിണചേര്‍ന്നു കിടക്കുന്ന സര്‍പ്പക്കളത്തില്‍
അഞ്ചു തിരിയിട്ടു നിറഞ്ഞു കത്തുന്ന നിലവിളക്കുണ്ട്
പക്ഷേ പൂക്കുല വിറയ്ക്കുന്ന കന്നിനാഗത്തിന്നി‍ളം കയ്യിന്റെ,
ഗുരുതിയാടുന്ന മണിനാഗത്തിന്റെ, നനഞ്ഞ നിഴലുകളുണ്ട്.

പകുത്ത നാളികേരത്തിലെള്ളെണ്ണ പാര്‍ന്ന്
വെളുത്ത തിരശ്ശീലയ്ക്കുപിന്നില്‍ ഇളകുന്ന നാളങ്ങള്‍
ആട്ടിന്തോല്‍ പാവക്കോലങ്ങളോടു ചേര്‍ന്ന്
കൂത്തു പാട്ടിനൊപ്പം പുലരുവോളം കഥപറയുന്ന നിഴലുകളുണ്ട്.

പിന്നെ ചെമ്മണ്ണുപാതയുടെ ഓരത്ത് അസ്ഥിശേഷിപ്പില്‍
വിറയ്ക്കുന്ന കാലില്‍ മുനിഞ്ഞും തെളിഞ്ഞുമൊരു ബള്‍ബുണ്ട്
വികസിക്കുകയും ചുരുങ്ങുകയും ചെയ്യുന്ന ജീവനുള്ളൊരു നിഴലാണവിടെ.

നിഴലില്ലാത്ത വെളിച്ചത്തെക്കുറിച്ചൊന്നു സങ്കല്പ്പിച്ചു നോക്കി-
കണ്‍ പോളകളില്ലാത്ത കണ്ണുകള്‍പോലെ ഭീകരം
ഇടക്കൊരു കിഴുക്കു കിട്ടിയാലെന്ത്? നിഴലില്ലാതെ എനിക്കുവയ്യ.
വെളിച്ചത്തിലും നിഴലിലും ഒളിച്ചുകളിക്കുകയെങ്കിലുമാവാമല്ലോ?.

മിഴിനീരുറഞ്ഞുപോവുന്നു കണ്ണാ.....

2008-03-15T12:49:00.000+04:00

മിഴിനീരുറഞ്ഞുപോവുന്നു കണ്ണാ നിന്‍,
പുഞ്ചിരി മനതാരില്‍ തെളിയുന്നേരം.
കദനങ്ങളകന്നു പോവുന്നു കണ്ണാ നിന്‍,
സ്നേഹമെന്നകതാരില്‍ നിറയുന്നേരം.

പാതകള്‍ പല‍തും താണ്ടി കണ്ണാനിന്‍,
തിരുമുമ്പിലവശനായ് ഞാനണഞ്ഞിടുമ്പോള്‍.
കരുണയാല്‍ കരം കവര്‍ന്നെന്നെ കണ്ണാ നീ,
മാറോടുചേര്‍ത്തു പുല്‍കുന്നു.

ഇല്ലായമകളുടെ കരടു നിറഞ്ഞോരാ അവില്‍പൊതി,
കണ്ണുനീരിന്നുപ്പു കലര്‍ന്നോരാ അവില്‍പൊതി,
കരങ്ങളില്‍ ഞാന്‍ മറച്ചു വയ്ക്കുമ്പോള്‍.
ഗോപികമാരുടെ മനം കവര്‍ന്നോരാ കരങ്ങളാലേ
പാടേ നീയതു കവര്‍ന്നെടുക്കുന്നു.

കദനങ്ങളകന്നു പോവുന്നു കണ്ണാ നിന്‍
സ്നേഹമെന്നകതാരില്‍ നിറയുന്നേരം.
മിഴിനീരുറഞ്ഞുപോവുന്നു കണ്ണാ നിന്‍
പുഞ്ചിരി മനതാരില്‍ തെളിയുന്നേരം.

പ്രവാസം ഡോട്ട് കോം പ്രസിദ്ധീകരിച്ച എന്റെ കവിത

2008-03-08T08:33:00.000+04:00

http://www.pravasam.com/kavithavVinod-march2008.htm

പിണം പിളര്‍ന്നെടുത്ത ഇരട്ടക്കവിത.

2008-03-06T11:03:00.000+04:00

നമ്മളുകൊയ്യും തലയെല്ലാം മുച്ചകിരിത്തേങ്ങകള്‍
ഇതാ പുതു വിപ്ലവക്കോട്ടയ്ക്കകം മെഴാന്‍ ചോര.
ഇതാ വിപ്ലവക്കോട്ടപ്പടിയ്ക്കലായ് ചാര്‍ത്താന്‍ തലകള്‍
ഇതാ പാദം കഴുകിക്കടക്കുവാന്‍ വാല്‍കിണ്ടിയില്‍ കണ്ണീര്
‍ ചുടുചോര കൊണ്ടുനാം കെട്ടണം വിപ്ലവക്കോട്ടകള്‍
കാവലായ് നിര്‍ത്തണം കണ്ണിരുണങ്ങാത്ത കവിളുള്ള
അമ്മയെ,പെങ്ങളെ,ഭാര്യയെ...പിന്നെ-
കരളിന്റെ കനവില്‍ പ്രതികാരക്കനല്‍ വീണ പുത്രനെ.
വിപ്ലവക്കുഴലൂതി തീക്കാറ്റായ് മാറ്റണം.
ആചുടുകാറ്റിന്റെ ആരവം കേട്ടുനാം യന്ത്രത്തണുപ്പില്‍,മയങ്ങണം.
ഇല്ല പുലരില്ല രാത്രി നാം ആവോളം തട്ടിപ്പറിക്കണം.
പിണംനാറും വഴികളില്‍ കഴുവേറിച്ചാവാ-
നീ നാട്ടില്‍ ഇനിയുമിതെത്ര ചെറുപ്പക്കാര്‍.

ഇതാ നവഭാരത പ്പിറവിക്കു ബലിയായിച്ചോര
മണ്ണു ചെമ്പിയ്ക്കണം ഭ്രാതാവിന്‍ ചോരയാല്‍.
ആ മണ്ണിന്റെ കാവി പുതയ്ക്കണം ഇന്ത്യയെ.
ചോരയുടെ ചെകിടിച്ച നാറ്റം മറക്കുവാന്‍,
ചാര്‍ത്തണം ചന്ദനം,ഭസ്മം,ചെങ്കുറി നെറ്റിയില്‍.
വറ്റിറങ്ങാതെ പ്പിടക്കുന്ന കണ്‍ഠത്തിന്‍ രോദനം
ഭേദിച്ചുമുയരട്ടെ മന്ത്രങ്ങള്‍ ഉച്ചത്തില്‍,മൃത്യു താളത്തില്‍.

മന്ത്രങ്ങളോതിയോതി തലമുറകളുടെ താളം തെറ്റിച്ച
ബ്രാഹ്മണ്യം ഛേദിച്ചു ഗോവിന്‍ വലം കാല്‍.
മുദ്രാവാക്യങ്ങളോതിപ്പഠിപ്പിച്ചു വെട്ടുന്നു ക്ഷാത്രം ഇടംകാല്‍.
മാറ്റിയെഴുതിയ വ്യാപാരതന്ത്രങ്ങള്‍ മെല്ലെയറുക്കുന്നു പാണി.
ഇനിയൊറ്റക്കാല്‍മാത്രം....
അധ്വാനഭാരം ചുമന്ന തോളെല്ലുകള്‍ താങ്ങുന്ന ശൂദ്രം.
ഇനിയെത്ര നാള്‍ കൂടിത്താങ്ങുമീക്കൈകള്‍ വഴുതുന്ന ചോരയില്‍ കണ്ണുനീര്‍ മാരിയില്‍......

വഴി വെട്ടുന്നോരോട് ഒരു തള്ളയ്ക്കു പറയാനുള്ളത്.

2008-03-01T13:53:00.000+04:00

വഴി വെട്ടുന്നോരേ ങ്ങളോടെനിക്കൊരു വിരോധൂല്യാട്ടോ.
ങ്ങക്ക് ഞാന്‍ കട്ടഞ്ചായ തരാം കഞ്ഞ്യെള്ളം തരാം.
എറയത്ത് ഇരിയ്ക്കാന്‍ പനന്തട്ക്ക് തരാം.
വഴിപ്പണിക്കാരെ നിയ്ക്ക് ന്റെ എട്വോഴി മാത്രം മതി.
നിയ്ക്ക് ന്റെ വേലിപ്പടര്‍പ്പ് മാത്രം മതി.

വഴിവെട്ടുന്നോരേ...
ങ്ങടെ വഴീക്കൂടെ കാളവണ്ടീം,തീവണ്ടീം വരും.....ന്ന് കേട്ടു.
ങ്ങടെ വഴീക്കൂടെ വീമാനൂം കപ്പലും വരും....ന്ന് കേട്ടു.
ങ്ങടെ വഴീക്കൂടെ തേനും പാലും വരും...ന്ന് കേട്ടു.
ങ്ങടെ വഴീക്കൂടെ മാത്രേ ഇതൊക്കെ വരുള്ളൂന്നും കേട്ടു.

വന്നോട്ടെ വന്നോട്ടെ പക്ഷേ,
ന്റെ അതിര്ന്ന് ഒരു തൂമ്പാകെളച്ചാല്,
ന്റെ വേലിക്കല്ന്ന് ഒരു തൂപ്പ് ഒടിച്ചാല്,
കഷ്ണിയ്ക്കും ഞാന്‍ എല്ലാറ്റിനീം.

ങ്ങള് കാണ്..ണ്ടാ തെക്കേപ്രത്തൂടെ പോണ പൊന്തക്കാട്?
അതൊരു വഴിയേര്ന്നു, ങ്ങക്കും മുമ്പേ കൊറേപ്പെര് വെട്ട്യേത്.
ങ്ങക്കറിയ്വോ ?... ഒക്കെ ആ വഴീക്കൂടെ വരുംന്ന് പറഞ്ഞാ...
ന്റെ പൊന്നൂം...ന്റെ പൊന്നൂം അവര്ടെ കൂടെ പോയ്ത്.
ങ്ങക്കറിയ്വോ ആവഴീക്കെടന്നാ...ന്റെ പൊന്നു.....

ങ്ങക്ക് ഞാന്‍ കട്ടഞ്ചായ തരാം, കഞ്ഞ്യെള്ളം തരാം കുട്ട്യോളെ.
എറയത്ത് ഇരിയ്ക്കാന്‍ പനന്തട്ക്കും തരാം.
യ്ക്ക് ന്റെ എട്വോഴി മാത്രം മതി,
നിയ്ക്ക് ന്റെ വേലിപ്പടര്‍പ്പ് മാത്രം മതി.

വഴിപ്പണിക്കാരെ......
ന്റെ വേലിയ്ക്കലെങ്ങാനും കയ്യ് വച്ചാ
ന്റെ എതയ്ക്കലെങ്ങാനും തൂമ്പാ കൊണ്ടാല്
കഷ്ണിയ്ക്കും ഞാന്‍.

പുതിയ ബലിക്കോഴികള്‍ക്ക്.

2008-02-25T15:19:00.000+04:00

കുഴിച്ചുമൂടുക അനുഭവങ്ങളെല്ലാം..
സ്മരണകളെല്ലാം മുഷിഞ്ഞ മണ്ണാത്തിക്കെട്ടുകള്‍.

ഓലക്കൊടിച്ചൂരുള്ള കട്ടങ്കാപ്പി,
കാഞ്ഞ എരിവുള്ള പരിപ്പുവട
കാന്താരി ചതച്ച ചമ്മന്തി.
പ്ലാവിലക്കുമ്പിളില്‍കോരിക്കുടിച്ച കുത്തരിക്കഞ്ഞി.
ഭ്ഫൂ.. വെറുക്കപ്പെടേണ്ട ഭൂതകാലങ്ങള്‍.

ഓര്‍മ്മയുടെ നടുമുറ്റം മെഴുകിയ
ചാണകമെല്ലാം ചുരണ്ടി റോഡരികില്‍ തള്ളുക.

മേദസ്സു മുറ്റിയ മീറ്റ്റോളും കോളയും
ആസ്വദിക്കണമെങ്കില്‍ വായിലെ ബാക്ടീരിയകളെ
മുഴുവന്‍പേസ്റ്റു തേച്ചുകൊന്നുകളയുക.

ചെമ്പന്തോട്ടിലെയും ആമക്കൊളത്തിലേയും
കലക്കവെള്ളം തേച്ചുപിടിപ്പിച്ച ഊതനിറം
ഇതാ പുതിയ-സോപ്പുകൊണ്ടു കഴുകിക്കളയുക.

അണ്ണന്‍ തരുംചിക്കന്‍ ആന്ധ്രതരും അരി,
ഇല്ലെങ്കില്‍ അര വയറങ്ങു മുറുക്കിയുടുക്കണം -ഹും! .

പ്രവസിയുടെ ചോര കലര്‍ന്ന വിയര്‍പ്പിലുയരുന്ന
മണിസൗധങ്ങളുടെ നിഴലിലേയ്ക്ക് മാറി
ദാരിദ്ര്യത്തിന്റെ ഉച്ചവെയിലേല്‍ക്കാതെ നമുക്കുതീര്‍ക്കാം
പുതിയൊരു വിപ്ലവം.
കൊടിച്ചോപ്പു വാടാതിരിയ്ക്കാന്‍ ചോരതരാന്‍-
ചവിട്ടു തുടങ്ങാത്ത ബലിക്കോഴികള്‍ ക്യൂവിലുണ്ടല്ലോ.

പ്രണയത്തെക്കുറിച്ചുതന്നെ വീണ്ടും

2008-02-13T16:00:00.000+04:00

വെണ്‍മുകില്‍ മാലകളായ് വരുന്നൂ പ്രണയത്തിന്‍,
പനിനീര്‍ തൂവി വീണ്ടുമുണര്‍ത്താന്‍ കനവിനെ.

കാലത്താല്‍ കട്ടവിണ്ട മനസ്സിന്‍ പാടത്തൊരു,
ഞാറ്റുപാട്ടുയര്‍ന്നേയ്ക്കാം നാമ്പിടാം തളിരുകള്‍.

ആവണിപ്പൂചൂടുന്ന വസന്തം വിടര്‍ന്നേയ്ക്കാം,
ഓണപ്പൂവിളി വീണ്ടുമുയരാം അങ്കണത്തില്‍.

ആതിരപ്പൂനിലാവിന്‍ വെണ്‍ചേല ചുറ്റിവീണ്‍ടും,
പാതിരാപ്പൂചൂടുവാന്‍ വന്നേക്കാം ധനുമാസം.

മാന്തളിര്‍ പൊഴിയുന്ന വൃശ്ചികപ്പുലരികള്‍,
പൂങ്കുയില്‍നാദത്തിനാല്‍ പുളകമണിഞ്ഞേയ്ക്കാം.

വര്‍ണ്ണനാതീതമായ പ്രണയസുഗന്ധത്താല്‍,
നിറയാം മനം വീണ്ടുമുയരാം കിനാവുകള്‍.

പ്രാണനില്‍ പ്രണയത്തിന്‍ പനിനീരലിയുമ്പോള്‍,
കനവില്‍ വീണ്‍ടുമൊരു കവിതയുണര്‍ന്നേയ്ക്കാം.

ചില ചിതറിയ കാഴ്ചകള്‍.

2008-02-09T12:06:00.000+04:00

ആത്മാവില്‍ മുറിവേറ്റവന്റെ മിഴികളിലെ
നിസ്സഹായതയെ കണ്ടില്ലെന്നു വച്ചും
നിങ്ങള്‍ക്കു കടന്നു പോകാം.
നിറപ്പകിട്ടാര്‍ന്ന പുറംകാഴ്ചകളില്‍
ആ മിഴികളിലെ നിഴല്‍ പ്രതിഫലിക്കില്ലെങ്കില്‍.

നഷ്ടസ്വപ്നങ്ങള്‍ ഏകാന്ത തടവിലിട്ടവനെ
മറഞ്ഞിരുന്നു ചരല്‍ക്കല്ലെറിഞ്ഞു നിങ്ങള്‍ക്കു ചിരിക്കാം.
ഏകാന്തതയിലെ വസന്ത സ്വപ്നങ്ങളില്‍
ആ ചരല്‍ക്കല്ലുകള്‍ ചാറിവീഴില്ലെങ്കില്‍.

ആദ്യ പ്രണയലേഖനം - അപൂര്‍ണ്ണം

2008-02-02T16:42:00.001+04:00

അതെ,ഇനി എഴുതുക തന്നെ അല്ലെങ്കില്‍ അവളെന്തു കരുതും.എത്രനാളിങ്ങനെ കൊണ്ടുനടക്കും?
മാതൃഭൂമി ഡയറിയുടെ ഏട് ശ്രദ്ധാപൂര്‍വ്വം കീറിയെടുത്തു, അവിടവിടെ എലി കരണ്ടപോലെയായപ്പോള്‍ സ്കെയിലു വച്ചുകൃത്യം വീതിയില്‍കീറിയെടുത്തു.
ശ്ശെ, വീതിവല്ലാതെ കുറഞ്ഞോ? എന്തെങ്കിലുമാവട്ടെ
പേനയെടുത്തു
പ്രിയേ..... ഹേയ്, അതുവേണ്ട,പ്രിയേന്നൊക്കെ എല്ലവരുമങ്ങു കാച്ചുന്നതല്ലേ നമുക്കൊരു വെറൈറ്റിവേണ്ടേ?
പ്രിയപ്പെട്ടവളെ,!!!!!!!ശ്ശെ വെലകൊറവ്.
സഖീ... ഛെ, മഹാമോശം ഞാനാര് ദുഷ്യന്തനോ?
ഡിയര്‍..........ഹൂ.... യെന്തരോ ഒരു കൊറവ്.!
ഡാര്‍ലിംഗ് ............ അതു കൊറേ ഓവറാവില്യേ?
സ്വീറ്റ്,ലൗലി, ശ്ശെ ശ്ശെ മഹാ ബോറ്......
ഇതിത്ര പാടുള്ള പരിപാടിയാണോ?
അമ്മ ഇപ്പോ ഉണ്ണാന്‍ വിളിയ്ക്കും അപ്പഴേയ്ക്കും ഒന്നെഴുതിത്തീര്‍ക്കണം.
വാഹനങ്ങള്‍ പോയിപ്പോയി ചരല്‍ കല്ലുകള്‍ ഒരരുകിലേയ്ക്കൊതുങ്ങി ക്കിടക്കുന്ന ആ തിരിവില്‍ വച്ച് നാളെയും അവളെക്കാണും. ഇളം റോസ് ചുരിദാറിട്ട്,ലേഡീസ് ബേഡിന്റെ ഒരു പുത്തന്‍ സൈക്കിളില്‍.

ഇഴയെടുത്തു കെട്ടിയ മുടിത്തുമ്പില്‍ നിന്നിറ്റു വീണ തുള്ളികളാല്‍ അവളുടെ വസ്ത്രമല്പം നനഞ്ഞിട്ടുണ്ടാകും ഒരു തുളസിക്കതിരോ,നന്ത്യാര്‍ വട്ടത്തിന്റെ ഇതളുകളോ, തെച്ചിപ്പൂക്കളോ മുടിയിലവിടവിടെ തങ്ങിക്കിടക്കുന്നുണ്ടാകും. അതങ്ങനെ കാണാന്‍ വേണ്ടി തിരിഞ്ഞു നോക്കിയപ്പോഴാണ് അന്ന് പിറകിലെന്തോ കൊണ്ടപോലെ പെട്ടന്നവള്‍ പിന്തിഞ്ഞു നോക്കിയത് കണ്ണുകളിലൂടെയാ പ്രകാശം കടന്നുള്ളില്‍ കയറിയത്,മനസ്സിലെവിടെയൊക്കെയോ അതേറ്റ്, സ്വസ്ഥത വെളിച്ചം കണ്ട പാറ്റകളെപ്പോലെ പരക്കംപാഞ്ഞു നടന്നത്.രാത്രികളില്‍ ലൈറ്റണഞ്ഞിട്ടും കണ്മുന്നിലവളിങ്ങനെ നിറഞ്ഞുനിന്നത്,ധനു മാസ നിലാവിണിഞ്ഞ നീണ്ട പാതയിലൂടവള്‍ അകലേ നിന്നു വരുന്നതും സങ്കല്പ്പിച്ച് രാത്രികള്‍ വെളുപ്പിച്ചത്....

നേരെ മാത്രം നോക്കി അലസമായി അവള്‍ വരുന്നത് ഇപ്പുറത്തുനിന്നേ കാണാം വെള്ള പൂക്കള്‍ പൂത്തു കിടക്കുന്ന വേലിത്തലപ്പുകള്‍ക്കിടയിലൂടെ.
അതിനുവേണ്ടീ സമയ നിഷ്ട പാലിക്കുന്നതിനാല്‍ ഇപ്പോള്‍ ഫാക്റ്ററിയില്‍ നേരത്തെ എത്താറുണ്ട്. മിനിട്ടു വൈകിയാല്‍ ആ തിരിവു നഷ്ടപ്പെടും പിന്നെ റോഡു മുഴുവന്‍ വൈക്കോലുണക്കുന്ന വീട്ടമ്മമാരുടെയും,മീന്‍ കച്ചവടക്കാരുടെയും പണിയ്ക്കു പോകുന്നവരുടേയും തിരക്കായിരിക്കും.

ടാ......
ഈ ചെക്കനവടെ എന്ത്..ട്ക്ക്വാ.....
വന്ന്..ട്ട് വല്ലതും കഴിച്ചിട്ട് കെടന്നോ അത്താഴപ്പട്ടിണി കെടക്കണ്ട..ഒറങ്ങ്യോ പുസ്തകും തലയ്ക്ക് വച്ചിട്ട്?
ശ്ശെ ഇന്നത്തെ ദിവസൂം ഗോവിന്ദ..... ദാ.... വരണു അമ്മേ ഒര് മിനിറ്റ്.

എന്തുകൊണ്ടാ അവളിപ്പോ മിണ്ടാതായത്

2008-01-22T12:49:00.000+04:00

എന്തുകൊണ്ടാ അവളിപ്പോ മിണ്ടാതായത്

പഴുക്കപ്ലാവിലയിലെ കറുത്ത പുള്ളിക്കുത്തുകളില്‍ നോക്കി
കഥകളേറെ പറഞ്ഞുതന്നിരുന്നവള്‍ എന്താണിത്ര മൗനിയായത്?

മാമ്പൂക്കാലത്തെ ഇളം കാറ്റില്‍ വീണ മധുരപ്പുളിപെറുക്കാന്‍
ഓടിവന്നിരുന്നവളെന്താണ് ഒറ്റയ്ക്കിരുന്നാലോചിക്കുന്നത്?

മുട്ടറ്റമെത്തുന്ന അവളുടെ ചീട്ടിത്തുണിപ്പുള്ളിപ്പാവാടയെല്ലാം
ഉറികെട്ടിക്കൊണ്ടേ നടക്കുന്ന നായാടിക്കു കൊടുത്തതെന്തിനാണ്?

ചൂരക്കാലുള്ള ശീലക്കുടക്കീഴിലേയ്ക്ക്
മഴയില്‍നിന്നെന്നെ വലിച്ചുകയറ്റിയിരുന്നവള്‍
കുടയൊന്നു തേടിയീ മഴയില്‍ ഞാന്‍ വിറയ്ക്കുമ്പൊഴും
കാണാതെ പോവുന്നതെന്താണ്?

പെണ്ണേ സൂക്ഷിച്ചും കണ്ടും യ്യ് നടന്നോ...
അവളുടമ്മ എന്നെയൊരു നോട്ടത്താലുഴിഞ്ഞ്
അവളോടുപറഞ്ഞതു കേട്ടപ്പോള്‍!

തലയിലൊന്നു തപ്പിനോക്കി
ചുരുളന്‍ മുടിയ്ക്കടയില്‍ രണ്ടിളം കൊമ്പുകള്‍?!
നാക്കൊന്നു നീട്ടിനോക്കി ചോര?!
കണ്ണാടിയിലൊന്നുനോക്കി രണ്ടുകോമ്പല്ലുകള്‍?!
ഒഴിഞ്ഞു നടക്കാനങ്ങനെ ഞാനും ശീലിച്ചു.

ശില്പത്തിലെ ശില ചിന്തിക്കരുതിങ്ങനെ.

2008-01-21T17:24:00.001+04:00

ശില്പത്തിലെ ശില-
ചിന്തിക്കരുതിങ്ങനെ.

ഉറഞ്ഞിരുന്ന തറയില്‍നിന്നൊരിക്കലും
ഇളകാതിരുന്നെങ്കില്‍!

ഉരുണ്ടു വീണ ചെളിയില്‍തന്നെ
പുതഞ്ഞുപോയിരുന്നെങ്കില്‍!

ഉളികള്‍ ചാഞ്ഞും ചരിഞ്ഞും പതിച്ചപ്പോള്‍
പൊട്ടിച്ചിതറിയിരുന്നെങ്കില്‍!

കാറ്റും,മഴയും കൊണ്ട്
വെയിലും,നിലാവും നക്ഷത്രങ്ങളും കണ്ടങ്ങനെ...

ഏറ്റുമുട്ടലല്ല.അമ്പിളി ഇരുട്ടില്‍ തള്ളിയ കമന്റ്.

2008-01-17T15:02:00.001+04:00

ഒരു കമന്റു ഡിലിറ്റാക്കി അമ്പിളി ശിവന്‍.
അരുതാത്തതല്ലായിരുന്നു എന്നെന്നെ ഓര്‍മ്മിപ്പിക്കാന്‍ മാത്രം അതു സൂക്ഷിക്കുന്നു.

:കാര്യം പറയുമ്പോ നൊന്തിട്ടു കാര്യമൊന്നുമില്ല.

നോവിക്കാന്‍ തക്ക കാര്യമൊന്നുമീയെഴുത്തിലില്ല.

ആണുങ്ങളെക്കുറിച്ചുള്ള ഒരു പെണ്പക്ഷ വാചകങ്ങളില്‍ നിന്നുതന്നെ, അവനെ അവരെങ്ങനെ കാണുന്നു എന്നു ഞാന്‍ വിലയിരുത്തിയതാണ് ആ വാചകങ്ങള്‍.

:ഏതെങ്കിലുമൊരു കാമഭ്രാന്തന്‍ എന്നു പറയുമ്പോ അരിശം വരുന്നതെന്തിന്?.

പവിത്രമായ ഒരു വികാരം ആണിനോടു ചേരുമ്പോള്‍ മാത്രം ഭ്രാന്തായിത്തീരുന്നതുകൊണ്ട്.
ചോദിച്ചുകോണ്ടേയിരിക്കാന്‍ എന്തെളുപ്പം! ലോകത്തിനു കിട്ടിയിട്ടുള്ള അറിവുകളേറെയും സ്വയം ചോദ്യം ചെയ്ത് നേടിയിട്ടുള്ള ഉത്തരങ്ങളാണ്.വൃദ്ധരും ബാലരും പീഡിപ്പിക്കപ്പെടുന്നെങ്കില്‍ അവിടത്തെ സംസ്കാരം നാശത്തിലേയ്ക്കു ഗതിതിരിച്ചിരിക്കുന്നു.

ഇതായിരുന്നു കനന്റ്. പെണ്‍ വര്‍ഗ്ഗമല്ലേ, ഒരു സേഫ്ഡിഫന്‍സ്. ആരും കമന്റേണ്ട.

ബലിതവിചാരം അറിയാന്‍.

2008-01-14T17:39:00.001+04:00

ബലിതവിചാരം

"എന്താണ്‌ വിപ്ളവം?????"
:കാവലാന്‍

നയിച്ചുണ്ടാക്കുന്നവന്റെ നക്കിത്തിന്നുന്നവനോട് തെണ്ടിത്തിന്നുന്നവനുണ്ടാവുന്ന അസൂയ.

നയിച്ചുണ്ടാക്കുന്നവനെ പറഞ്ഞു പറ്റിച്ച് നക്കിത്തിന്നുന്നതിനു പകരം ഊറ്റിക്കുടിക്കുന്നവര്‍.
:ബലിതവിചാരം
Dear Kavalan,

Is it answer to the question in quotes or to ourselves? Can u pleasae explain?

:കാവലാന്‍

നയിച്ചുണ്ടാക്കുന്നവന്‍ തൊഴിലാളി.
നക്കിത്തിന്നുന്നവന്‍ മുതലാളി
തെണ്ടിത്തിന്നുന്നവന്‍ മടിയന്‍(മടിയാളി,രാഷ്ട്രീയക്കാരന്‍)

മൂന്നാമത്തെ വര്‍ഗ്ഗത്തില്‍ പെട്ടവന്‍ പരിണാമത്തിന്റെ ഒരു പ്രത്യേക സന്ധിയില്‍ വച്ച്,പാദ പാണികള്‍ മടിമൂലം ഇളക്കാത്തതിനാല്‍ അവ നഷ്ടപ്പെട്ട്,ദീര്‍ഘ വീക്ഷണം ചെയ്യാത്തതിനാല്‍ കാഴ്ചനഷ്ടപ്പെട്ട്,ആധുനീക വിപ്ലവകാരി എന്ന അട്ട ജന്മമെടുക്കുന്നു.വിപ്ലവം വളരെ രക്ത പങ്കിലമാണ്.ചോര ചോര്‍ന്നുപോവുന്നത് അണികള്‍ അറിയാറില്ല അത്ര സ്മൂത്തയിട്ടാണ് ഊറ്റല്‍.ചണ്ടി പരുവമായിക്കഴിഞ്ഞാല്‍ പിന്നെ വിപ്ലവം വരും.പുതിയ വെളിപാടുകളും.
പരിപ്പ് വടയോ?കട്ടനോ അതൊക്കെ പണ്ട് പണ്ട്...ട്ടോ.
അര്യൊക്കെ യെന്ത്?? ചിക്കനല്ലേ തിന്നണ്ടത്?
കഞ്ഞ്യെള്ളൊക്കെയെന്ത്?? പാലല്ലേ കുടിയ്ക്കണ്ട സാധനം!!!
തൊട്ടുകൂട്ടാനോ ഹ ഹ മൊട്ട മൊട്ട...യെവടെ! എങ്ങനെ വിപ്ലവം വരാനാ ഒറ്റെണ്ണത്തിന്റെ മേല് തുള്ളി ചോര യില്യ.
ഇല്ലാത്ത തണ്ടെല്ലു മൂത്ത നേതാവിനുടന്‍ പുതുവിപ്ലവത്തിനു വെളിപാടു ലഭിക്കുന്നു.
മൊതലാളി ച്ചോരയാണ് ചോര എന്താ അയിന്റൊരു മധുരം!
ഇതാണ് ഞാന്‍ കണ്ട വിപ്ലവം. ആധുനീക രാഷ്ട്രീയത്തിന്റെ നെറികേടിനോട് വെറുപ്പുണ്ട്.

രാധയോടു മാത്രം പറയട്ടെ.

2008-01-10T12:27:00.000+04:00

ഞാനറിയാതെ നിശബ്ദമായ്
പെയ്തു തോര്‍ന്നൊരാ-
പുലരി മഴയുടെ
കണ്ണുനീര്‍ ശേഷിപ്പുകളില്‍.

എന്നെത്തഴുകിയൊന്നുണര്‍ത്താന്‍-
തുനിയാതെന്നെക്കടന്നു
പോയൊരിളം തെന്നലിന്‍
ചുടു നിശ്വാസങ്ങളില്‍.

എന്നെപ്പുണരാതെന്നിലൊരു
കുഞ്ഞുപൂ വിടര്‍ത്താതെന്നെ-
കടന്നു പോയൊരാ
വസന്ത മൗനങ്ങളില്‍.

കാളിയനൊഴിഞ്ഞൊരു
യമുനയും കനവിലൊരുക്കി.

കണ്ണിലൊരു നിറദീപ വെട്ടവും,
ചുണ്ടിലൊരു പുഞ്ചിരിപ്പൂമാലയുമാ-
യെന്നെ കാത്തുകാത്തിരുന്ന.

നിന്നെ ഞാന്‍ കാണുന്നു. ഞാനറിയുന്നു.

കവിതയിതെന്നാലെന്താണ്?

2008-01-09T11:25:00.000+04:00

കവിതയിതെന്നാലെന്താണ്?
കനവിനെ തഴുകും തിരയാണ്.
കവിയുടെ കനവിലതെന്താണ്?
കനലെരിയുന്നൊരു നോവാണ്.

കവിയുടെ കാഴ്ച്ചയിലെന്താണ്?
കഥകള്‍ മൊഴിയും ശില്പങ്ങള്‍.
കവിയുടെ കേള്‍വികളെന്താണ്?
കേഴും വ്യഥ തന്നീണങ്ങള്‍.

കവിയുടെ യത്രയിതെന്താണ്?
കഥ തേടുന്നൊരു വ്യഥയാണ്.

ഹും!...അപ്പോളീ കവിയെന്നു വച്ചാലാരാണ്??

കഥയുടെ ചിപ്പിക്കുള്ളിരിക്കും
മുത്തിനെ നേടും കുഞ്ഞാണ്.

കവിയെന്നു വച്ചാല്‍.,മനസ്സിലായോ??.

ശല്യം.?!

2008-01-08T10:10:00.001+04:00

ഈ ശങ്കര പുത്രന്‍ കുറേ നാളായി ഒപ്പം നടന്നു ശല്യം ചെയ്യുകയാണ്.ശല്യത്തിന്റെ മൂര്‍ദ്ധന്യത്തില്‍, ബോറടിയുടെ ആരംഭത്തില്‍, ഉച്ചയൂണും കഴിഞ്ഞിങ്ങനെ യിരിക്കുമ്പോള്‍ 'മൊഴിയില്‍' വിരലുകള് വെറുതേ ‍തിരുപ്പിടിക്കുന്നതിടയ്ക്ക് ശങ്കരനിങ്ങൂര്‍ന്നിറങ്ങി വിര‍ലുകളീലൂടെ.ക്ലൈമാക്സിലേയ്ക്കവനെന്നെയുംകൊണ്ട് നടക്കുന്നതിനിടയ്ക്ക് ആറുമണിയായതറിഞ്ഞില്ല.ഡ്രൈവാളി മിസ്കോളടിച്പ്പോള്‍ ശങ്കരന്റെ കൈ വിടുവിച്ചു ഞാനോടി. ഫിനിഷിങ്ങു മോശമായതിങ്ങനെയാണ് ക്ഷമിക്കുമല്ലോ.അവനവിടെ കുത്തിയിരുന്നു ചിണുങ്ങുകയാണ് ഒരു പാടിനിയും പറയാനുണ്ടെന്നു പറഞ്ഞ്. കേട്ടില്ലെന്നുനടിക്കാനെനിക്കാവുന്നത്രഞാന്‍ ശ്രമിക്കുന്നു. അതു വാവിട്ടൊരു നിലവിളിയായുയരുകയാണെങ്കിലൊരുപക്ഷേ കാവലാനു കേട്ടില്ലെന്നു നടിക്കാനാവില്ല. കാരണം
അവനിരുന്നു ചിണുങ്ങുന്നത് എന്റെ മനസ്സിന്റെ ഉമ്മറപ്പടിയിലിരുന്നുതന്നെയായതു കൊണ്ട്.അവനു പറയാനുള്ളതില്‍ ചിലതിലെല്ലാം എന്റെകൂടി ജീവിത ഗന്ധമുള്ളതുകൊണ്ട്.കുറേ ശങ്കരന്മാരിപ്പോഴും തെങ്ങിന്‍ മണ്ടയില്‍ത്തുടരുന്നതു കൊണ്ട്.ശങ്കരന്മാരെ തെങ്ങില്‍ മാത്രം പ്രതീക്ഷിക്കുന്ന ഒരു സമൂഹമിപ്പോഴുമുള്ളതുകൊണ്ട്,സദയം ക്ഷമിക്കൂ പ്രിയരേ

കോരന്റെ മോന്‍!!!...

2008-01-03T13:44:00.001+04:00

കോരാ കോരാ വരുന്നെടാ ചാതന്ത്ര്യം.....
വ്വോ???.....ചങ്കരാ....ചാന്ത്ര്യം..ന്ന്വെച്ചാ???
യെല്ലാവര്ക്കും....സൊകം.....വര്ന്നെടാ.....
വ്വോ...കഞ്ഞി...ഞ്ഞി പിഞ്ഞാണത്തിലാവ്വോ കിട്ട്വാ...
കുഴീം,കുമ്പ്.ളോന്നും വേണ്ടീരില്ല്യന്നേയ്...
തെങ്ങുമ്മീം..കേറണ്ട...ഉതരും.തേങ്ങ്യൊക്കെ.
വ്വൊ ചങ്കരാ...കാലം പോണ പോക്കേയ്...
.............
ചങ്കരാ......
ഉം........
വന്നോടാ...ചാന്ത്ര്യം!!
ഉം........
യ്യെന്താ തെങ്ങുമ്മെത്തന്നെ......?
ഉം........
കുമ്പ്ലുത്താന്‍...പടിച്ചോപട്ടിണ്യെടക്കണ്ട.
...................
കോരന്റെ മോന്‍!!!!......ഹാപ്പീ ന്യൂ ഇയര്‍...ര്‍..ര്‍.ര്‍.
സേം റ്റു യൂ സണോഫ് ശങ്കര്‍....
വെല കുറയും ന്നാ ശ്രുതി..
കുറയും മനുഷ്യന്റെ!. തളപ്പ് കളയണ്ട. ഒരു പ്രൊട്ടക്ഷന് കൈയ്യില്‍ വച്ചോളൂ.
ഉം............

നെഞ്ചിലേറും നോവില്‍നിന്നൊരു കവിതയുണരട്ടെ

2007-12-31T11:44:00.000+04:00

വീണടിഞ്ഞ ദിനങ്ങളെല്ലാം പശിമ നല്‍കട്ടെ- അതില്‍
നവ്യവര്‍ഷ ദിനങ്ങളെല്ലാം പൂ വിടര്‍ത്തട്ടെ.
വീണുപോയ വിയര്‍പ്പില്‍ നിന്നും വീര്യമുയരട്ടെ- അതില്‍
വീണ്ടുമുയരും തരുക്കളൊത്തിരി തല്പമേകട്ടെ.

വിണ്ടുണങ്ങിയ മനസ്സില്‍ വീണ്ടും പ്രണയം പെയ്യട്ടെ-അതില്‍
വീണ്‍ടുമൊരു പുതു നാമ്പുയര്‍ന്നതു പൂത്തുവിടരട്ടെ.
വ്യഥകളേറ്റ മനസ്സുവീണ്ടും പുതുമ നേടട്ടെ -അതില്‍
കഥകളേറെ നിറഞ്ഞതെല്ലാം കദനമൊഴിയട്ടെ.

വ്യഥിതമായൊരു ഭൂതകാലമതെന്തിനോര്‍ക്കുന്നു-ഇനി
വ്യക്തമായൊരു ഭാവിസ്വപ്നം നെഞ്ചിലേറ്റീടൂ
നെഞ്ചിലേറും നോവില്‍നിന്നൊരു കവിതയുണരട്ടെ
ചേതനയ്ക്കതു നവ്യമാമൊരു ശോഭ നല്‍കട്ടെ....

Posted by കാവലാന്‍ at 2:10 AM 4 comments

വീണടിഞ്ഞ ദിനങ്ങളെല്ലാം പശിമ നല്‍കട്ടെ

2007-12-30T14:10:00.000+04:00

എന്റെ വളപ്പിന്റെ വേലി

2007-12-27T13:44:00.000+04:00

എന്റെ വളപ്പിന്റെ വേലി,
ജീവന്‍ തുടിക്കുന്ന വേലി.
നിറമേറെയുള്ളോരു വേലി,
പുഷ്പ മണമേറെയുള്ളോരു വേലി.

അതില്‍..

ഒരുപാടുപൂക്കുന്നചെടികള്‍,
ഒട്ടുമേപൂക്കാത്തചെടികള്‍.
ഔഷധമാകുന്ന ചെടികള്‍,
വിഷമയമാകുന്ന ചെടികള്‍.

വര്‍ഷ ഹര്‍ഷമേറ്റുയിരുന്ന ചെടികള്‍‌‌-
വര്‍ഷപാതമേറ്റുലയുന്ന ചെടികള്‍.
വേനലില്‍ വാടുന്നചെടികള്‍-
കൊടും ചൂടിലും വാടാത്തചെടികള്‍.

അത്...

തുമ്പിയിരുന്നാടുമൂഞ്ഞാല്‍,
തുന്നാരങ്കുരുവിയുറങ്ങുന്ന തൊട്ടില്‍.
പുളിയനുറുമ്പിന്റെ കൂട്,
പച്ചിലപ്പാമ്പിന്റെ മേട്.

ഒരു പാടു വഴിയുള്ളെ വേലി
ഒരുപാടുകഴയുള്ള വേലി.

കുഞ്ഞിക്കളിവീടു തീര്‍ക്കാം‍,
ഓണത്തിന്‍ പൂക്കളിറുക്കാം.
അയലത്തെ വീടിന്‍ കരച്ചില്‍ കേട്ടാല്‍,
ഓടിക്കടന്നങ്ങു ചെല്ലാം.

അതിനില്ല..
ആഴത്തിലുള്ള കിടങ്ങ്
ആയത്തിലുള്ള ചടങ്ങ്.
ആമാട പൂട്ടിട്ട ദ്വാരം,
ആയുധമേന്തിയ കാവല്‍.

മതിലതു വേണ്‍ട എനിക്കു,
മതിവേലിയിതൊന്നിതുമാത്രം.
ജഡമായ മതിലുകളെല്ലാം
ജൈവരീതിക്കു വിഘ്നങ്ങള്‍ തന്നെ.

ചിറ്റാനിനെല്ല് പത്തു പറ കൃഷിചെയ്താല്‍

2007-12-24T13:02:00.001+04:00

ചെറിയൊരു കണക്കാണ്, അക്കം ടൈപ്പുചെയ്യാനറിയില്ല ക്ഷമിച്ചേക്കണേ.
ചിറ്റാനിനെല്ല് പത്തു പറ കൃഷിചെയ്താല്‍!!! നൂറ്റിനാപ്പതു പറ ലാഭം

"ഭ്ഫ പുല്ലേ യെത്രപറ ലാഭം????"

"എഴ്തിക്കറാ കണക്ക് ലാഭത്തിന്റെ."
വിതച്ചത് = പത്തുപറ
വിളവെടുത്തത്=നൂറ്റമ്പതുപറ. ലാഭം നൂറ്റിനാല്പ്പതുപറ.
ലാഭം = എത്ര പറ?

വഴിക്കണക്കാ മറക്കണ്ട.

മെനക്കേട്+സമയം= വിളവ്
മെനക്കേട് എ = വരമ്പുകിള ഗുണം മൂന്ന് + വരമ്പുവെയ്പ്പ് ഗുണം നാല്. = ഏഴ് കൂലി + തീറ്റീം കുടീം = ആയിരത്തി മുന്നൂറ്.

മെനക്കേട് ബി = ട്രാട്ടറു പണി‌+വിത്തിടല്‍ = നാനൂറ്+അമ്പത്=നാനൂറ്റമ്പത്

മെനക്കേട് സി = ട്രാട്ടറുപണി+ഞാറു പറി,നടീല്‍ = ആയിരത്തിരുന്നൂറ്+ആയിരം=രണ്ടായിരത്തിരുന്നൂറ്.
മെനക്കേട് ഡി = രാസവളം + പ്രയോഗം = മുന്നൂറ്
മെനക്കേട് ഇ = വെള്ളംകൂട്ടല്‍കുറയ്ക്കല്‍,ചാഴിമരുന്നടി,വെള്ളത്തിനടിപിടി,വരമ്പിനടിപിടി,ആറ്റക്കാവല്‍,പന്നിക്കാവല്‍‍ = ഇത്രയും/പൂജ്യം

മെനക്കേട് എഫ് = കൊയ്ത്ത് ഗുണം പന്ത്രണ്ട്+തീറ്റ,കുടി = ആയിരത്തറുന്നൂറ്.
മെനക്കേട് ജി = വണ്ടിക്കൂലി കറ്റവീട്ടിലെത്താന്‍ = അഞ്ഞൂറ്

മെനക്കേട് എച്ച് = മെതി ഗുണം പതിനഞ്ച്+തീറ്റ,കുടി = ആയിരത്തഞ്ഞൂറ്

മെനക്കേട് ഐ = വൈക്കോലും നെല്ലും വില്‍ക്കല്‍ = അതൊരൊന്നൊന്നര മെനയാ എഴുതണ്ട.

സമയം = ആറുമാസം

മൊത്തം ചെലവ് = [ {മെനക്കേട്(എ+ബി+സി+ഡി+ഇ+എഫ്+ജി+എച്ച്+ഐ)} + സമയം ] =ഏഴായിരത്തെണ്ണൂറ്റമ്പത്.

മൊത്തം വരവ് = നൂറ്റമ്പതുപറ നെല്ല് -(മുപ്പത്തഞ്ചു പറപാട്ടം+പത്തുപറവിത്ത്)=നൂറ്റഞ്ചു പറ
.
. . മൊത്തം വരവ് = നൂറ്റഞ്ചുപറ + വൈക്കോല് =എട്ടുരൂപപ്രകാരം നെല്ലിന് വില കിട്ടിയത് =ആറായിരത്തെഴുന്നൂറ്റിരുപത്.
വൈക്കോലിനു കിട്ടിയത്=രണ്ടായിരം മൊത്തം എണ്ണായിരത്തെഴുന്നൂറ്റിരുപത്

ലാഭം = എണ്ണൂറ്റെഴുപത് രൂപ!!!!!!

ബോണസ്സ് = മെനക്കേട് ഇ,മെനക്കേട് ഐ,അല്ലറ ചില്ലറപരിക്ക്, പനിപിടിച്ചാശുത്രീക്കെടന്നത് മുതലായവ.

ന്നാ പ്പിന്നെ സന്തോഷത്തിനു രണ്ടെണ്ണാ വീശ്യാലോ?
ഒഴി, ഒരു തുള്ളി മറ്റവനുമിറ്റിച്ചോ.
അടി..
ബോഡി.. ഡെഡ് ബോഡി

കര്‍ഷകഹത്യാ...സിന്ദാബാദ്, പാലുകുടിക്കൂ,മുട്ടകഴിക്കൂ,ചിക്കനടിക്കൂ സിന്ദാബാദ്..
കര്‍ഷക ബൂര്‍ഷ്വകള്‍ തുലയട്ടേ.... മുട്ടവസന്തം വിടരട്ടേ..

വ്യഭിചാര ദേശസാല്‍ക്കരണ നിയമം അന്വേഷണം

2007-12-23T12:25:00.001+04:00

ബൂലോകത്തെ അല‍ച്ചിലില്‍ യാദൃശ്ചികമായി കണ്‍ടുകിട്ടിയതാണിത്. ആരോ വാശിയോടെ പണിതുതുടങ്ങി പാതിയിലുപേക്ഷിച്ചൊരു ശില്പ്പം പോലെ. അതിന്റെ ഭീകരസൗന്ദര്യം അതിങ്ങോട്ടെടുക്കാനെന്നെ പ്രേരിപ്പിച്ചു.

വേനലില്‍ വറ്റിയ തോട്ടിലൊലിച്ചുവന്ന മരപ്പാവയെ വീട്ടിലേയ്ക്കെടുത്തുചെന്നപ്പോള്‍ ചന്തിക്കുരണ്ടെണ്ണം ടപേ, ടപേ ന്നു പൊട്ടിച്ചിട്ട് അമ്മ പറഞ്ഞു
"കൊണ്ട്...ട്റാ..അസത്തേ കൂടോത്രൂം കുട്ക്ക്യേം കിട്ട്യോട്ത്തന്നെ."

അടിയുടെ വേദനയും കൂടോത്രത്തിന്റെ പേടിയുമുള്‍പ്പെട്ട അന്നത്തെ അതേ വികാരത്തോടെ ഞാനിതിവിടെ വയ്ക്കുന്നു. മന്ത്രവാദിയെക്കാത്ത് അല്ലെങ്കില്‍ കളത്തിക്കമ്മളെക്കാത്ത്.

http://nithyapillai.blogspot.com/എന്ന ഒരു ബ്ലോഗാണ് സംഭവം. ശ്രദ്ധിക്കുക അവര്‍ പറഞ്ഞവയില്‍ ചിലത്.

(ഇടയ്ക്ക്‌ വൈദ്യുതി ഉള്ളപ്പോള്‍, പപ്പ വീട്ടില്‍ ഇല്ലാത്തപ്പോള്‍, മമ്മി നല്ല മാനസികാവസ്ഥയിലാവുമ്പോള്‍ ഞാന്‍ കഴിയും വണ്ണം നിങ്ങള്‍ക്കൊപ്പമെത്താം. എന്റെ ആമുഖ പ്രസ്താവന വായിച്ച്‌ അഭിപ്രായം പറഞ്ഞ എല്ലാ ബഹുമാനപ്പെട്ട ബന്ധുക്കള്‍ക്കും നന്ദി പറയുന്നു. വീണ്ടും കാണാം. - നിത്യ)

ഇത്‌ പുരാതനമായ
വെറുംഒരു മൃത തംബുരുവല്ല
അന്ധനായ ബധിരനായ സ്നേഹിതാ!
ഇത്‌... കൊതിക്കുന്ന ഹൃദയം
ചുഴറ്റുന്ന അലാതചക്രം
മിടിക്കുന്ന അലാറശ്രുതി...

ഇത്‌ ഞാനാണെന്നറിയാന്‍
നീ...ഇനിയെത്ര തപസ്സിലുരുകണം?"

ശ്രീനാരായണഗുരുവിന്റെ യഥാര്‍ഥ പാത പിന്തുടര്‍ന്ന ഗുരു നിത്യചൈതന്യയതിയുടെ ഓര്‍മ്മയ്ക്ക്‌ ശ്രദ്ധാഞ്ജലിയോടെ, ഭൌതികതയിലൂന്നിയ എന്റെ കാഴ്ച്ചകള്‍ ഞാന്‍ നിങ്ങളോട്‌ പറഞ്ഞു തുടങ്ങട്ടെ.

കൗതുക വാര്‍ത്ത 2032
'വ്യഭിചാര ദേശസാല്‍ക്കരണ നിയമം പ്രാബല്യത്തില്‍'

ഇതാണ് അവരെഴുതിയ അവസാനത്തെ കുറിപ്പെന്നു തോന്നുന്നു. ആര്‍ക്കെങ്കിലുമറിയാമെങ്കില്‍ പറഞ്ഞുതരിക.

ഇതാണെന്നെയീ സാഹസം ചെയ്യാന്‍ പ്രേരിപ്പിച്ചത്. ഭക്ഷണരീതി മാറ്റാനുദ്ഘോഷിക്കുന്ന മന്ത്രിമാരുള്ള ഈ നാട്ടില്‍ സമ്പാദ്യരീതിയും,ജീവിതരീതിയും മാറ്റാന്‍ നിയമം വരാന്‍ നിത്യയുദ്ധേശിച്ചത്ര വര്‍ഷമെടുക്കില്ല. പക്ഷേ അവരിത്രയും പറഞ്ഞപ്രത്യക്ഷയായെന്നു തോന്നുന്നു.

ഹരിനാമ കീര്‍ത്തനം വന്നവഴി

2007-12-22T16:39:00.001+04:00

ഓം ഹ്രീം തലമാറട്ടെ... അതെ കറുമന്റെ തലയിതാ തറുമന്റെ തലയില്‍...

ചക്രവര്‍ത്തി ആര്‍ത്തിമൂര്‍ത്തന്‍ തിരുനാള്‍ വലിയകോയിത്തമ്പുരാന്‍ തലയ്ക്കുകൈവച്ചുറക്കെ പള്ളിച്ചൊല്ലി...
ഒന്നായ നിന്നെയിഹ രണ്ടെന്നുകണ്‍ടളവി ലുണ്ടായൊരിണ്ടല്‍ ബത മിണ്ടാവതല്ല....ഇത്രയും രസിച്ചു വായിച്ച്
ഞാനാ വരികളൊന്നു കൂടി വായിച്ചു,ഒന്നായ നിന്നെയിഹ...കൊള്ളാം പലവിധത്തിലതു ഞാന്‍ പാടിനോക്കി.
ബാലരമയിലാണോ ബാലമംഗളത്തിലാണോ 'തലമാറട്ടെ' എന്ന കഥയുണ്ടായിരുന്നതെന്നു വ്യക്തമലവേണുവായിരുന്നു
കഥാകാരന്‍.

ചെണ്‍ട കൊട്ടുന്ന താളത്തില്‍, ഉരലില്‍ ഇടിക്കുന്ന താളത്തില്‍,
തീവണ്‍ടി പോകുന്നതാളത്തില്‍,സൈക്കിളില്‍ നിന്നുകൊണ്ടു കയറ്റം ചവിട്ടിക്കയറ്റുന്ന താളത്തില്‍,ചവിട്ടു നാടകത്തിന്റെ പാട്ടുതാളത്തില്‍, എന്റെ ഓരോ കാല്‍വയ്പ്പിന്റേയും താളത്തില്‍.! എവിടേയും സ്യൂട്ടാവുന്ന തരത്തിലെഴുതിയിരിക്കുന്ന ഈ രണ്ടുവരി ഞാന്‍ കുറേക്കാലം പാടിനടന്നു. ബാക്കി കിട്ടിയാല്‍ കൊള്ളാമെന്നുണ്‍ടായിരുന്നു,എവിടേയുമന്വേഷിച്ചില്ല ആരും പറഞ്ഞുതന്നൂല്യ.
കുറേ വര്‍ഷങ്ങള്‍ക്കു ശേഷം ഒരുദിവസം മാതൃഭൂമിയിലെ കത്തുകള്‍ എന്ന കോളത്തില്‍ ഇതിന്റെ ബാക്കി കുറച്ചുവരികളും താഴെ 'എന്ന് ഹരിനാമകീര്‍ത്തനത്തില്‍എഴുത്തച്ച്ന്‍ പറഞ്ഞതു പോലെ' എന്നുകണ്ടു എഴുത്തച്ചനാണണു സ്രഷ്ടാവെന്നുമനസ്സിലായി.പിന്നീട് ഗുരുവായൂരില്‍നിന്ന് പത്തു രൂപയ്ക്കു ഞാനാ പുസ്തകംവാങ്ങി,
വായിച്ചുനോക്കി. മലയാളത്തിലെ അന്‍പത്തൊന്നക്ഷരവും അക്ഷരമാലാക്രമത്തില്‍ യോജിപ്പിച്ചു വളരെ സാധാരണ പദങ്ങള്‍ കൊണ്ടു തീര്‍ത്തിരിക്കുന്ന അതെന്നെ അത്ഭുതപ്പെടുത്തി. രണ്ടാഴ്ച കൊണ്ട് ഞാനതു മുഴുവന്‍ പടിക്കുകയും ചെയ്തു.
പടിക്കേണ്ടകാര്യമൊന്നുമില്ല എങ്കിലും ഞാനതു പടിച്ചു എന്താണതിലുള്ളതെന്നറിയാന്‍ വേണ്‍ടി. എനിക്കുതോന്നി ഇങ്ങനെ പലതും നമുക്കു ലഭിച്ചിട്ടില്ലെന്ന്.

സ്മരണയിലെ മഴ...

2007-12-18T16:26:00.001+04:00

താഴത്തെ വള‍പ്പിലെ കവുങ്ങിന്‍ തലപ്പുകള്‍ കാറ്റ് മഴവില്ലുപോലെ വള്യ്ക്കുമായിരുന്നു.കാറ്റിന്റെയാവേശത്തിനൊപ്പം പറന്ന ഉണങ്ങിയ കരിമ്പനപ്പട്ടപ്പട്ടകള്‍ ആര്‍ത്തലച്ചുവീഴുന്നതുകേട്ട്, ചിറകെല്ലാമൊതുക്കി മഴ കാത്തുനില്‍ക്കുന്ന കോഴികള്‍ പരക്കം പായും.
അകലെ വടക്കുയര്‍ന്നുനില്‍ക്കുന്ന കുന്നുകളില്‍നിന്നു മയിലുകള്‍ അഘോഷത്തിനു ആര്‍പ്പുവിളിയോടെ തുടക്കമിടും. അതങ്ങനെ ചുറ്റും പടര്‍ന്നു പിടിച്ച് ചിലപ്പോള്‍ മുറ്റത്തെ മൂവാണ്‍ട്നില്‍നിന്നു വരെ കേള്‍ക്കും.
മയിലിനെക്കാണാന്‍ മുറ്റത്തേയ്ക്കു പായുന്ന ഞങ്ങളെ പ്പിടിയിലൊതുക്കാന്‍ കഴിയാഞ്ഞ് അച്ഛമ്മ രണ്ടു കൈകളും എളിയില്‍കുത്തി അല്പ്പം മുന്നോട്ടാഞ്ഞുനിന്ന് ദൂരെ പണിക്കു പോയ അച്ഛനെ ഉറക്കെ വിളിക്കാന്‍ തുടങ്ങും. എല്ലാ വീടുകളില്‍ നിന്നും ഇങ്ങനെയോരോ തിക്കും തിരക്കും കേട്ടു തുടങ്ങും.
ഒരു വേനലസ്ഥമിക്കുകയാണ്.

മഴക്കാലം തുടങ്ങിയിരുന്നതു പലപ്പോഴും സന്ധ്യയ്ക്കായിരുന്നു.
ആദ്യത്തെ മഴ പെയ്യുന്ന ദിവസം ഞങ്ങള്‍ക്കടച്ചുപൂജ പോലെ പ്രിയപ്പെട്ടതായിരുന്നു. അന്നു സന്ധ്യാനാമം വേണ്ട,പുസ്തകം നോക്കേണ്ട, വിളക്കിലെല്ലാം മണ്ണെണ്ണയൊഴിച്ച് നേരത്തെ ചോറുണ്‍ട് കിടക്കാം. സന്ധ്യക്കു പെയ്യാന്‍ മറന്ന മഴ, ഊണെല്ലാം കഴിഞ്ഞു ഞങ്ങള്‍ കിടന്നുകഴിഞ്ഞാണു വരുക. തണുപ്പ് മല്ലങ്കുഴികടന്നാല്‍ ചങ്ങലയില്‍കിടന്ന് കൈസര്‍ മുറുമുറുത്തുതുടങ്ങും അഴിച്ചുവിടാന്‍. പിന്നാലെ വേനലില്‍ കിടന്നു പൊരിഞ്ഞ ഇലകളുമായി കാറ്റു ചുറ്റിനുമോടിക്കളിക്കുന്നതുകേള്‍ക്കാം. ജനലയിലൂടെ ഒരുവെള്ളിവെളിച്ചം എത്തിനോക്കും,അതിന്റെ ശബ്ദത്തിനു കാതോര്‍ത്തു ഞങ്ങള്‍ ഭയത്തോടെ ചുരുണ്ടുകൂടും. കുറേ നേരത്തിനു ശേഷമൊരിടി ശബ്ദം കേള്‍ക്കാം അകലെ.അതിനിടയിലെപ്പൊഴോ മഴയെത്തിയിരിക്കും. ഇലകളുടെയും കാറ്റിന്റേയും കളിചിരിക്കിടെ മഴയൊരു കൊലുസ്സു കിലുക്കം പോലെത്തുടങ്ങി, പയ്യെപ്പയ്യെ പാണ്ടീമേളം പോലെ കൊട്ടിക്കയറും. അതിന്റെ അവരോഹണാരോഹണങ്ങളലെപ്പൊഴോ ഞങ്ങള്‍ ഉറങ്ങിത്തുടങ്ങിയിരിക്കും. നിരവധി നിറങ്ങളിലുള്ള പുതുനാമ്പുകള്‍ സ്വപ്നം കണ്‍ട്...